Ikpa Etip Pọọlu Ogebe Ijet
Ebi Kọlọsi
1
1 Emi Pọọlu ogwu òrere ogwu otuchieen̄ kè Jisọs Karais inan̄a me nkeek Awaji, emi melek Timọti gwun̄ Nte kiji ege ikpa etip keyi 2 ijet enyi bọn Awaji me ama Kọlọsi, enyi bọn Nte ebi ìgbegbe utoon̄-ejit me emen Karais.
Kè Awaji, ogwu òrere Nte kiji, inyi enyi atata nnwọn kan̄ mè esuuk kan̄.
Pọọlu îtọn̄ Awaji mè iriaak uriaak me ibot ebi ntitiin̄ Awaji òkup me Kọlọsi
3 Mgbọ geelek eji ekiriaak uriaak me ibot kinyi, eji kpekilọlọ itọtọn̄ Awaji, ogwu òrere Nte Okaan̄ kiji Jisọs Karais. 4 Eji ekitọn̄ ọmọ, mije, eji mînọ ibe ke ichechieek kinyi îkeke inye, mè inọ si ibe ke enyi mîmun̄ otutuuk bọn Awaji me chieen̄. 5 Enyi ekaan̄ ichechieek yi mè imumechieen̄ yi mije enyi ekikpọ chieen̄ ikakaan̄ ugbana eyi Awaji osun̄be iban enyi me emen inyọn̄. Enyi mîwuuk lek inọ inu ofolek ugbana yi me emen ata etip eyi atikọ eyi elookbe enyi. 6 Ata etip yi òkitaan̄ si ikana otutuuk linyọn̄, mè ikisi ata ikwaan̄ me ugwem ebi ene. Owuwa ene mêkichieek me lek. Ubọk yaage si ke ata etip yi osi ata ikwaan̄ me emen ugwem kinyi karake enyi enọbe, mè isa me ikeya iriọọn̄ ubọk atata nnwọn eyi Awaji okupbe me atikọ. 7 Epafaras odasi isa ata etip yi inilook enyi. Ọmọ ìre ata ogwu eji emun̄be me chieen̄ enenen, ogwu melek kiji ekisi ikwaan̄ inyi Jisọs Karais. Ọmọ ore ogwu òsasa ejit ge isi ikwaan̄ kè Karais me irek kiji me etete kinyi. 8 Ọmọ si onikpa inyi eji ubọk enyi ekimun̄ ene me chieen̄ inan̄a me unye eyi Ekwukwu Awaji.
9 Mije keyi, karake adasi usen eji enọbe inu ofolek kinyi, eji ekpọkpọ ikiriaak uriaak me ibot kinyi, mè ikibeek Awaji ibe irọ mè enyi eriọọn̄ nkeek kan̄ ejaan̄ lek, mè ekaan̄ òjot òjot iriọọn̄-inu eyi Ekwukwu kan̄ okinyi, inyi enyi ekekọt egobo inu geelek etet. 10 Iriọọn̄-inu yi oborọ inyi enyi ekeluk ugwem ògbegbe ebi ìkigọọk Okaan̄-ene, mè ekerọ inu òkibele ọmọ ejit mgbọ geelek. Sa me ikeyi, enyi mêkirọ ata inu me oniin̄ geelek, mè ikpọkpọ ikiriọọn̄ inu eyi Awaji ifo isi. 11 Eji ekiriaak si uriaak ibe mè Awaji isa ikpele unye kan̄, eyi òmimin ichit, irọ mè enyi ekeke enye, mè ekaan̄ ujọn̄ọ ukarajit, mè ekawọ lek, mè ekebele ejit me emen inu geelek. 12 Eji ekiriaak si ibe mè enyi eketọn̄ Nte kiji ogwu òrọrọ inyi enyi egbe ebi ìbegọọk ikaan̄ uche me lek ugbana eyi ọmọ osun̄be iban ebi kan̄ me emen mkpulu eyi utoon̄ kan̄, 13 mije, Awaji îtaba eji isibi me irak ubọk mkpulu eyi udun, mè isa eji isi itap me emen mkpulu eyi ogwu Gwun̄ ogwu îmun̄be me chieen̄. 14 Îre ogwu Gwun̄ ya ofaka eji isibi me usun̄ eyi ijo inu, mè itele otutuuk ijo kiji inyi eji.
Ogwu Karais orebe, mè ikwaan̄ Karais osibe
15 Karais, ogwu eji esabe chieen̄ imun̄, ìre inu geelek eyi Awaji ogwu eji kpesa chieen̄ imun̄ orebe. Ọmọ ore adasi Gwun̄ enerieen̄ eyi Awaji. Ọmọ îmin enenen, kpebekọt isa inu geege Awaji orombe itọ me lek kan̄. 16 Mije, Awaji ìsa me ubọk kè Karais irom otutuuk inu geelek, echi òkup me emen inyọn̄, mè echi òkup me linyọn̄, echi ekisa chieen̄ imun̄, mè echi kpekisa chieen̄ imun̄, mè irom si otutuuk ebi osat geelek, mè otutuuk ijo erumun̄ geelek, mè ebi ibot ìkikpulu ema, mè ebi unye kiban̄, mè otutuuk kiban̄ me irek me irek. Awaji ìsa me ubọk Gwun̄ kan̄ yi irom otutuuk inu geelek eyi îrombe. Otutuuk inu chi ìnan̄a me ubọk kè Karais. Karais si ke otutuuk inu chi okup inyi. 17 Ọmọ ìwuwuuk lek ikup sabum enirom otutuuk inu. Me emen kan̄ si ke otutuuk inu okigbaan̄ isọk. 18 Ọmọ ore ibot isa inyi akpalek kan̄ eyi òrere ntitiin̄ Awaji, eyi ọmọ me lek kan̄ obenebe. Me etete otutuuk ebi geelek ìkwakwaan̄, ọmọ odasi ijomo me mkpa. Eyi ìkijeen̄ ibe ke ọmọ ore ogwu òmimin ichit me emen inu geelek. 19 Mije, îbele Awaji ejit ibe otutuuk inu geelek ọmọ orebe ikup iso ifuk òjot òjot me emen kè Karais. 20 Îneme si Awaji isasa me lek kè Karais ikpulu otutuuk inu geelek îrombe iyaka isa ika inu me lek kan̄. Awaji ìsa me eje, eyi Gwun̄ kan̄ ofiin̄be mgbọ îkwube me inyọn̄ uti nkwurieen̄, irọ esuuk melek otutuuk inu geelek, echi òkup me linyọn̄, mè echi òkup me emen inyọn̄, inyi ema otutuuk eyaka egwu ekom eka egọọk ọmọ.
21 Me mgbọ òraraka, enyi me lek kinyi si mîjọn̄ọ ere me lek Awaji, mije enyi erebe ebi ochicha Awaji, inan̄a me lek ijo ekiket enyi ekikeek me emen ejit kinyi melek ijo ugwem enyi ekiluk. 22 Ire, me mgbọ keyi, Awaji îrọ inyi enyi melek kan̄ eyaka enere unene, sa me mkpa eyi Gwun̄ kan̄ okwube me akpalek ebilene me inyọn̄ uti nkwurieen̄, mije kinyi. Sa me ikeyi ke îgwọk enyi itana me emen ejit kinyi, mè isun̄ enyi me mbuban inyi lek kan̄, inyi ene geege ikamun̄ inu ìbosa ifieek enyi ikọ me isi kan̄. 23 Ìkeke ìnye me emen ichechieek ìfo isi, ikasisik. Ìkaan̄ ikpọchieen̄ me lek inu geelek etumube inyi enyi me emen ata etip. Ata etip yi, eyi ekilook otutuuk ene me otutuuk linyọn̄, ke Awaji ogwen emi Pọọlu, kubọk ogwu usun̄ kan̄, ibe emi ǹkenlook ǹkana ere.
Pọọlu îsi ikwaan̄ me ibot ntitiin̄ Awaji
24 Mgbọ keyi, ejit îbele emi enenen me lek ufialek mbọkọbe mije kinyi. Mije, ubọk Karais obọkọbe ufialek, ikeya si ke emi nkisa akpalek n̄a ibọkọ ufialek me ibot ntitiin̄ Awaji, eyi òrere akpalek kè Karais. Ǹkibọkọ ufialek yi isasa irọ inyi ikwaan̄ eyi Karais osibe iso ifuk. 25 Awaji ìgogobo emi ibe emi ǹnensi ikwaan̄ ǹnyi ntitiin̄ kan̄. Ìgobo emi ibe emi ǹnenlook otutuuk ene otutuuk ata etip kan̄. 26 Ata etip yi ìre nlelet inu eyi Awaji ochitbe isun̄, ìkachili ìnyi ene geege karake ukot ukot, ire, mè inichili ibook me mgbọ keyi inyi ebi kan̄. 27 Awaji îwuuk lek itumu ifieek ibe ke ọmọ môrọ inyi ebi kan̄ eriọọn̄ ubọk nlelet inu yi osabe imin iyaka, mè ubọk îsabe ikaan̄ ikpele oruru inyi ebilene me otutuuk ido geelek. Nlelet etip yi eyi Awaji ochilibe ibook ìre, ke Karais ọmọ òwa me emen ejit kinyi. Eya orọ, ke enyi mîkaan̄ ikpọchieen̄ ibe ke enyi mêgọọk ọmọ ikup me emen ujamgbugbo kan̄.
28 Îre mije keya ke eji ekilook otutuuk ene ata etip ofolek kè Karais, mè ikitaba ene geelek ubọk me utọn̄, mè ikisa me otutuuk iriọọn̄-inu ijeen̄ ebilene inu, inyi ogwu geelek òchechieek me lek kè Karais imin iso ifuk ubọk ògbegbe, me mgbọ môkekebe me isi Awaji. 29 Eya orọ, ǹkisa otutuuk ikpele unye Karais onyibe emi irọ ikwaan̄ yi, ubọk efuuk n̄a obenbe, inyi ǹkọt ǹrọ ǹre okputut me atata.