6
Nteme òkup inyi nsabọn mè ebi ute mè uga
1 Nsabọn, enyi kubọk ebi eyi Okaan̄-ene, ìkisiki ibot ìnyi ebi nte kinyi mè nga kinyi, mije, ikeyi otat. 2 Adasi Ikan kè Mosis eyi òkaan̄ use me emen ìre eyi òbe,
“Ìmin nte kinyi mè nga kinyi,
3 inyi otutuuk inu ije ijaan̄ me lek kinyi,
inyi enyi eluk ujọn̄ọ ugwem me linyọn̄ keyi.”a
4 Enyi ebi ute, ikakitap nsabọn kinyi unaan̄-ejit. Kpan̄asi ikeya ìkijeen̄ ema inu, mè ìkiteme ema nteme eyi Okaan̄-ene.
Nteme òkup inyi ebi usun̄ mè ebi nte uwu
5 Enyi ebi usun̄, ìkisa me ukpook mè ulibi ìkisiki ibot, mè ìkisi ikwaan̄ ìnyi ebi nte uwu kinyi me otutuuk ejit kinyi, kubọk enyi ekisiki ibot mè ikisi ikwaan̄ inyi Karais. 6 Ikakisiki ibot ìsi ikwaan̄ ìnyi ema me isi kiban̄ gaalek, inyi ema emun̄, mè ema enyi. Ire, ìkisi ikwaan̄ ìnyi ema kubọk ebi usun̄ kè Karais ebi ìkisa otutuuk ejit kiban̄ irọ inu Awaji okiweek. 7 Ìkisa otutuuk ejit kinyi ìsi ikwaan̄ ìnyi ema kubọk ke îre Okaan̄-ene ke enyi ekisi inyi. Ikakisi kubọk ke enyi ekisi inyi ebilene ikike. 8 Mije, enyi mîriọọn̄ ibe ke Okaan̄-ene môkpe ene geelek mkpukpe ògbegbe me ibot ata inu geelek ene ya orọbe, mè ìre ene ya ìre usun̄, mè ìre ìkare usun̄, kpunu esese me lek.
9 Enyi ebi nte uwu, ìkisa si ubọk yaage ìkpulu ebi usun̄ kinyi. Ikakirọ ema inu me lek unye unye, mije, enyi mîriọọn̄ ibe ke ogwu òrere Ute inyi ema melek kinyi ọmọ òwa me emen inyọn̄, mè iriọọn̄ si ibe ke Ute yi ìkakigobo ene geege isi.
Otutuuk nroon̄ akọn̄ eyi Awaji
10 Me òta ikọ n̄a, ǹkitumu inyi enyi ibe: Ìkeke ìnye me emen Okaan̄-ene sa me lek ikpele unye kan̄. 11 Ìtap otutuuk nroon̄ akọn̄ eyi Awaji onyibe enyi, inyi enyi ekọt ekeke eda otutuuk ijo otitọt eyi yọk okitọt ibak enyi. 12 Mije, ìkare akpalek mè eje ikike ke eji ekitim akọn̄ yi ikeme. Ire, eji ekitim akọn̄ ikeme ebi ibot ijo erumun̄, mè ebi unye geelek, mè ogbogbo urum ijo erumun̄ ìkirọ inu ikpak, ebi ìkikpulu me linyọn̄ eyi kpekisa chieen̄ ìmun̄, mè unye geelek òkikpulu linyọn̄ eyi udun keyi. 13 Eya orọ, ìtap otutuuk nroon̄ akọn̄ eyi Awaji, inyi, mgbọ ijo usen ya isinu, mè ogwu ochicha isijibi akọn̄ kan̄ igọọk enyi, enyi mêkọt ikeke ida, mè itim ọmọ ikpan̄, mè ikeke inye si me irek kinyi isi ire okputut. 14 Eya orọ, ìkeke ìnye, mè ìsa atikọ ìtobo me ebon kinyi kubọk fanti. Ìsa ata irọrọ ìkwek isi ejit kinyi kubọk ukwek-ejit. 15 Ìtap mbem-lek ilolook ata etip kè Karais, eyi òkinyi ene esuuk, ìsa ìkwek ukot kinyi kubọk ikpukot, mije, îre ọmọ obokọt itet ukot kinyi inye me ijọn̄. 16 Ofifi si, ìmọnọ ichechieek ìkaan̄ me ubọk kubọk agbọ, inyi enyi ekesa ekọt eniin̄ ukan̄ me otu otutuuk oraan̄ cha, echi ogwu ijo ya, òrere Setan, okisa isook enyi. 17 Ìmọnọ unyan̄a ìkwuun̄ ìkwek ibot kinyi kubọk okpibot akọn̄, mè ìmọnọ si oge akọn̄ eyi Ekwukwu Mbuban, eyi òrere ikọ Awaji, ìkaan̄ me ubọk. 18 Ìkiriaak uriaak me emen inu geelek, sa me unye Ekwukwu Mbuban, mè ìkibeek mbeek me ubọk Awaji. Mije keyi, ìkup me mbem lek, mè ìkat ejit ìkiriaak uriaak mgbọ geelek me ibot otutuuk bọn Awaji, ikatetele mgbọ geege.
19 Ìriaak uriaak me ibot n̄a si, ibe mè Awaji inyi emi inu mbatumu mgbọ geelek nchilibe otu n̄a itumu ikọ kan̄, inyi ukpook ita emi me lek, mè ǹkọt ǹrọ inyi ebi ene eriọọn̄ nlelet inu eyi Awaji ochilibe ibook me emen ata etip yi. 20 Mgbọ keyi, emi ìre ogwu òkeke me otuchieen̄ ata etip yi, ubọk geelek nkupbe me mkpọn. Ìriaak uriaak ibe mè Awaji irọ mè ǹkọt ǹkenlook ata etip yi ubọk îgbebe ibe ǹkenlook, mè ukpook geege ikatet emi.
Òta amọn
21 Taikikọs, atata gwun̄ Nte ogwu ògbegbe utoon̄-ejit me emen ikwaan̄ Okaan̄-ene môkpa otutuuk inu inyi enyi, inyi enyi eriọọn̄ ubọk emi nkupbe, mè eriọọn̄ si inu nkirọ. 22 Îre mije keyi ke nria ọmọ inu me lek kinyi, inyi enyi eriọọn̄ ubọk eji ekupbe, mè ọmọ si iyaka itap enyi efuuk me emen.
23 Bọn Nte n̄a, kè esuuk, mè imumechieen̄, melek ichechieek ònan̄a me ubọk Awaji Ute mè Okaan̄-ene Jisọs Karais ikup inyi enyi.
24 Atata nnwọn eyi Awaji ikup inyi enyi otutuuk, ebi ekawọge lek me imama Okaan̄ kiji Jisọs Karais.