2
Awaji îkinyi ebi kan̄ aya ugwem
1 Me mgbọ òraraka, enyi ekwakwaan̄ ita me emen erumun̄, mije unye-ibot kinyi mè nrọ-nlọ kinyi. 2 Emen nrọ-nlọ chi ke enyi ekiluk me mgbọ ya, mgbọ enyi ekigọọk orọmijọn̄ eyi linyọn̄ keyi okido, mè ikisi ikwaan̄ inyi Yọk, òrere ogwu ibot mkpulu inyi otutuuk ijo erumun̄ òkiluk me isinyọn̄. Yọk yi ore erumun̄ òkitọ ikọ mgbọ keyi me emen ebi ìkikpaka ibot inyi Awaji. 3 Me ugwem kiji otutuuk ene, îkaan̄ mgbọ eji elukbe si igọọk me ida eyi akpalek ijo inu kiji, kubọk ebi ife chi ekiluk. Mgbọ ya, eji mîkinyi akpalek kiji inu geelek îweekbe, mè ikirọ otutuuk ulọk kan̄ geelek mè ekiket kan̄ geelek iso. Me mgbọ ya, mije ijo ugwem ya, otutuuk kiji melek ebi unye-ibot cha egbaan̄ ikup me irak unaan̄-ejit Awaji. 4 Ire, Awaji îmun̄ eji me chieen̄ enenen. Ejit nsan kan̄ si îmin me lek kiji enenen. 5 Eya orọ, ubọk geelek eji ekwaan̄be ita me emen erumun̄ me mgbọ ya, mije nrọ-nlọ kiji, Awaji onenitap eji ayaya ugwem me emen, inyi eji eneluk ugwem melek Karais. Awaji ìnyan̄a enyi sa me atata nnwọn kan̄. 6 Me emen kè Karais eji ekupbe, Awaji îgbaan̄ eji melek Karais ijomo me mkpa, mè ibene eji si, inyi eji egọọk Karais esiki ekweek me irek umin kan̄ me emen inyọn̄, mè egọọk ọmọ ekekpulu. 7 Awaji ìrọ inu yi inyi eji, mije ata ejit eyi îkaan̄be me lek kiji me emen kè Karais Jisọs, inyi ọmọ isa me ikeya isa atata nnwọn kan̄, eyi kpunube inu ebesa itọ me lek, ijeen̄ ebi ene me owuwa ukot òkinu me isi. 8 Mije, Awaji ìsa me atata nnwọn kan̄ inyan̄a enyi, bak me lek enyi echieekbe me lek kè Karais Jisọs. Awaji ìkanyan̄a enyi mije ebi enyi erebe. Unyan̄a yi ìre uche Awaji ocheche inyi enyi me ikike. 9 Ìkanan̄a mije ikwaan̄ geege enyi esibe, inyi ene geege ikakọt ìsa ìgugo lek. 10 Mije, îre Awaji orom eji. Awaji ìrom eji me emen kè Karais Jisọs, inyi eji enerọ ata ikwaan̄ eyi îwuukbe lek idọmọ isun̄ ibe eji enerọ.
Eji otutuuk ene ìre ge me emen kè Karais
11 Eya orọ, ìkeek ebi enyi erebe me adasi mgbọ! Me iman kinyi, enyi kpere ebi Ju. Ebi Ju ekigwen enyi ebi ekafieekge afi, mè ikigwen lek kiban̄ ebi efieekbe afi. Ire, ifefieek afi keya ìre inu ubọk ebilene orọbe me akpalek ebilene. 12 Ìkeek si ibe, me mgbọ ya òraraka, ke enyi kpekaan̄ Karais. Kpefuk si enyi kubọk bọn owot ido ebi Ijeren, ebi Awaji ogobobe isibi inyi lek kan̄. Enyi kpekaan̄ uche geege me emen otutuuk inyan̄a-ibot eyi Awaji onyan̄abe isa ichieek ebi kan̄ use. Enyi ekiluk me linyọn̄ keyi, kpekaan̄ ikpọchieen̄ geege, kpekaan̄ Awaji, enyi echechep. 13 Ire, me mgbọ keyi, me emen kè Jisọs Karais, enyi cha ebi mgbọ ìjọjọn̄ọ ere me lek Awaji, Awaji îtaba enyi igbet ere me lek kan̄ inan̄a me eje kè Karais.
14 Mije, Karais me lek kan̄ ore ogwu òtatap esuuk me etete kiji, mè irọ inyi eji agan̄ iba, ebi Ju mè ebi ekarege ebi Ju, enekana ere ge. Me mkpa îkwube, îsa akpalek kan̄ igbugbọ mgban eyi òcheche eji, mè ikitap ochicha me etete kiji agan̄ iba. 15 Karais îsa akpalek kan̄ igbugbọ mgban ya, eyi òrere Ikan kè Mosis mè ogbogbo asabọn ikan mè orọmijọn̄ òje me lek. Sa me ikeyi ke îrọ inyi eji, ido iba cha, enekana ere ayaya ido ge gaalek me emen kan̄. Inan̄a me ikeya, esuuk okukup me etete kiji agan̄ iba cha. 16 Inan̄a me lek mkpa Karais okwube me inyọn̄ uti nkwurieen̄, Karais îsan̄a ochicha isan̄a me etete ebi Ju mè ebi ekarege ebi Ju, mè irọ inyi ema ekana ere ge me emen kan̄, mè iniyaka ema inyi Awaji. 17 Karais îsa ata etip eyi esuuk yi inilook enyi ebi ofifi ido, ebi mgbọ ìjọjọn̄ọ ere me lek Awaji, mè isa si inilook eji ebi Ju, ebi mgbọ ìgbegbet ere me lek Awaji. 18 Îre mije kè Karais ke eji egbaan̄ ikaan̄ irek inunu me isi Awaji Ute, sa me lek Ekwukwu Mbuban ge ya, ogwu Karais onyibe otutuuk kiji, ebi Ju mè ebi ekarege ebi Ju.
19 Eya orọ, me mgbọ keyi, enyi ebi ekarege ebi Ju, enyi kpeyaka ire ebi ofifi ido mè ebi ichen. Enyi mîgọọk bọn Awaji geelek igbaan̄ ikana bọn owot, mè ikana si ebi ototun̄ ukan̄ eyi Awaji, 20 mè ikup kubọk uwu eyi enamabe itoon̄ me inyọn̄ ewuuk irak ijọn̄, eyi ebi otuchieen̄ kè Karais mè ebi nriran enamabe, eyi Karais me lek kan̄ orebe atà ibot uwu. 21 Îre atà ibot uwu ya okigbaan̄ otutuuk uwu ya isọk. Inyọn̄ kan̄ si ke ekinama uwu ya ibene, mege, îra inikana Uwu Mbuban eyi òkup me mbuban me emen Okaan̄-ene. 22 Me emen kan̄ si ke Awaji okigbaan̄ enyi si melek otutuuk bọn Awaji geelek inama isọk, inyi enekana uwu eyi Awaji okiluk sa me Ekwukwu kan̄.