Ikpa Etip Pọọlu Ogebe Ijet
Ebi Galesia
1
1 Emi Pọọlu, ogwu otuchieen̄ kè Jisọs Karais nge ikpa etip yi. Ìkare ebilene eria emi ikwaan̄ otuchieen̄ yi, ìkarere si ebilene egwen emi itap me lek ikwaan̄ yi. Îre Jisọs Karais me lek kan̄ melek Awaji Ute, ogwu òjojomo Jisọs me mkpa, egwen emi iria ikwaan̄ yi. 2 Emi melek otutuuk bọn Nte ebi melek n̄a ekupbe ege ikpa etip yi ijet enyi ebi ntitiin̄ Awaji ìkup me agan̄ Galesia.
3 Atata nnwọn mè esuuk eyi Awaji Ute, mè Okaan̄-ene Jisọs Karais ikup melek kinyi! 4 Jisọs Karais ore ogwu òsasa ugwem kan̄ inyi ibe esa egwa ngwugwa mije ijo inu kiji, inyi ọmọ isa me ikeya itaba eji isibi me emen ugwem eyi ijo linyọn̄ keyi, ubọk Awaji, ogwu òrere Nte kiji oweekbe. 5 Itọn̄ ikup inyi Awaji ire mgbọ ikakaan̄ge itata! Ikup ikeya!
Ata etip ge gaalek okup, kpunu ofifi
6 Îke emi chieen̄ enenen ike enyi esabe igwat lek iyaak itele Awaji ogwu òsasa me atata nnwọn kè Karais igwen enyi itap me lek kan̄, mè ikana ikigọọk ofifi etip eyi enyi ekikeek ibe ìre ata etip. 7 Me atikọ, etip ya ìkare ata etip kubọk ge. Ǹkitumu ikọ yi, mije, îkaan̄ ebi ìkiwuwọlọ enyi ibot, mè ikiweek si iwuwuwọlọ ata etip kè Karais. 8 Ire, eji ekitumu inyi enyi ibe, ìrere eji me lek kiji, mè ìyaka ire ogwu osat onan̄a me emen inyọn̄ inu, inilook enyi ofifi ata etip inwene me lek eyi eji elookbe enyi me adasi ya, unaan̄-ejit Awaji ikeme ene ya ire mgbọ ikakaan̄ge itata. 9 Eya orọ, ubọk eji ewuukbe lek itumu, ikeya si ke nkitumu mgbọ keyi. Ire ikaan̄ ogwu inu inilook enyi ofifi ata etip inwene me lek eyi enyi ewuwuuk lek ibọkọ itap, unaan̄-ejit Awaji ikeme ene ya ire mgbọ ikakaan̄ge itata.
10 Me emen ikọ yi ntumube, ìre enyi ekikeek ibe ke îre ebi owa ke nkiweek irọrọ inyi ejit ibele? Ìre ebilene, sà ìre Awaji? Mebe ìre ebilene ke nkiweek irọrọ inyi ejit ibele, emi kpamakana ogwu ikwaan̄ inyi Karais.
Îre Awaji ogwen Pọọlu iria ikwaan̄
11 Bọn Nte n̄a, ǹkiweek ibe enyi eriọọn̄ ibe ke ìkare ubọk ebilene ke ata etip eyi nlookbe enyi onan̄a. 12 Ǹkabọkọ me ubọk ene geege, ǹkakwekween̄ si ìnan̄a me ubọk ene geege. Îre Jisọs Karais me lek kan̄ ochili ata etip yi inyi emi.
13 Nkeek ibe ke enyi mînọ ukpatu ofolek ubọk nlukbe ugwem n̄a me mgbọ òraraka igọọk me ubọk ebi Ju ekiriaak Awaji, mè ubọk nsabe isisaak ebi ntitiin̄ Awaji uyọt uyọt, mè ikiweek ijijijaka ntitiin̄ Awaji, inyi ichep. 14 Me etete otutuuk ebi Ju ebi ìrere ogbo n̄a, emi me otu ifuk ebi ìjeje ijọn̄ọ ere ichit me igọgọọk orọmijọn̄ ebi Ju. Emi ǹsasa otutuuk ugwem n̄a inyi orọmijọn̄ ebi nte nte kiji. 15 Ire, Awaji îwuuk lek igobo emi sabum enimaman emi, mè isa me atata nnwọn kan̄ igwen emi inyi lek kan̄, 16 mè isa me ubelejit kan̄ ichili Gwun̄ kan̄ ijeen̄ emi, inyi ǹsa ata etip ofolek kan̄ ǹsi ǹlook ebi ekarege ebi Ju. Mgbọ Awaji oriabe emi ikwaan̄ yi, ǹkasa ikọ yi ìsi ìkpa melek ebilene geege. 17 Ǹkaje si ìsi Jeruselem ìsi ìmun̄ ebi ìdadasi ire ebi otuchieen̄ kè Karais me isi n̄a. Kpan̄asi ikeya, ǹnanan̄a mgbọ yaage ije isi agan̄ Arebia. Sọnja mgbọ iraraka, ngwugwu ikom ika inu ama Damasikọs.
18 Mgbọ acha ita orakabe, nnenisi Jeruselem, inyi ǹsi ǹriọọn̄ Pita, mè igọọk ọmọ ikup akọp mè usen go. 19 Ìkakaan̄ ofifi ogwu otuchieen̄ geege mmun̄be, îtata Jemis ngwan̄ Okaan̄-ene gaalek. 20 Ǹkitumu inyi enyi me isi Awaji ibe ke otutuuk inu chi ngebe ijet enyi ìre atikọ, kpunu ataak geege me emen. 21 Sọnja mgbọ iraraka, nneninan̄a isi agan̄ Siria mè agan̄ Silisia. 22 Mege inire ike mgbọ ya, otutuuk ntitiin̄ kè Karais òkup me agan̄ Judia kperiọọn̄ ogwu nrebe. 23 Etip gaalek ke ema ekinọ ibe ke ogwu mgbọ òkisisaak ema ya ìyaka inikilook ata etip ofolek ichechieek ya eyi mgbọ îweekbe ibe ichep. 24 Ema enenibene ikitọn̄ Awaji mije inu îrọbe me ugwem n̄a.