Ebi Kọrint Eyi Adasi 1

Adasi Ikpa Etip Pọọlu Ogebe Ijet

Ebi Kọrint

¹ Emi Pọọlu, ogwu Awaji osabe me nkeek kan̄ igwen ibe inire ogwu otuchieen̄ kè Jisọs Karais, emi mè Sọsitenis gwun̄ Nte kiji ² ege ikpa etip keyi ijet enyi ebi ntitiin̄ Awaji òkup me ama Kọrint, ebi Awaji osan̄abe isun̄ esese inyi lek kan̄ sa me lek kè Jisọs Karais, mè igwen ibe eneluk ugwem òkup me mbuban. Eji ege ikpa yi inyi enyi melek otutuuk ebi geelek ìkigwen erieen̄ Okaan̄ kiji Jisọs Karais, ogwu òrere Okaan̄ kiban̄, mè ire si Okaan̄ kiji.

³ Atata nnwọn mè esuuk eyi ònan̄a me ubọk Awaji ogwu òrere Nte kiji, mè Okaan̄-ene Jisọs Karais ikup melek kinyi.

Pọọlu îtọn̄ Awaji me ibot ebi ntitiin̄ Awaji ìkup me Kọrint

⁴ Nkitọn̄ Awaji mgbọ geelek me ibot kinyi, mije atata nnwọn eyi înyibe enyi sa me lek kè Karais Jisọs. ⁵ Mije, inan̄a me lek kè Karais, enyi mîbọọn̄ ubọọn̄ enenen me oniin̄ geelek, ìrere me otu itumu-ikọ kinyi geelek, mè ifuk-ibot kinyi geelek. ⁶ Îsibi utoon̄ ibe ke etip ofolek Karais eyi enyi ebọkọbe itap îtibi ugwun̄-ijọn̄ me emen kinyi. ⁷ Eya orọ, kpunu uche eyi Ekwukwu Mbuban geege ònanan enyi me mgbọ keyi enyi ekikup ikpọ mgbọ Awaji môchilibe Okaan̄ kiji Jisọs Karais ijeen̄ eji. ⁸ Ọmọ môtet enyi ikaan̄ inye mege ire òta mgbọ, inyi ekamun̄ okpa geege me emen kinyi me usen ọmọ, Okaan̄ kiji Jisọs Karais, môkpọkbe inu. ⁹ Awaji ogwu ògwegwen enyi ibe enyi enegọọk Gwun̄ kan̄ Jisọs Karais egbaan̄ inu erọ îgbe ogwu etoon̄be ejit me lek.

Nteme ofolek icheche lek me ntitiin̄ Awaji

¹⁰ Bọn Nte n̄a, nsa erieen̄ Okaan̄-ene Jisọs Karais iriaak enyi ibe enyi otutuuk ene ere otu ge, inyi icheche lek ikakup me etete kinyi, inyi enyi egbaan̄ ere ge ejaan̄ lek, mè ekaan̄ ejit ge, mè ekiket ge. ¹¹ Bọn Nte n̄a, usini ebi ìnan̄a me ototun̄ ukan̄ kè Kolowi mîkpa inyi emi ibe ke owuwa ibaak òwa me etete kinyi. ¹² Ikọ nkitumu ìre ke usini kinyi ekibe, “Emi ǹkigọọk Pọọlu.” Usini ekitumu ibe, “Emi ǹkigọọk Apọlọs.” Usini ekitumu ibe, “Emi ǹkigọọk Pita.” Sà usini ene ekitumu si ibe, “Emi ǹkigọọk Karais.”

¹³ Ìre mîche Karais? Ìre Pọọlu ke egon ikpan̄ me uti nkwurieen̄ mije kinyi? Sà ìre me erieen̄ kè Pọọlu ke egwook enyi mun̄? ¹⁴ Ntọn̄ Awaji ibe ke ǹkagwook ene geege mun̄ me etete kinyi, ilọ me lek Kirisipọs mè Gayọs gaalek. ¹⁵ Eya orọ, kpunu ogwu òbotumu ibe ke emi ǹsa me erieen̄ n̄a igwook enyi mun̄. ¹⁶ Iin̄, nkeek si ibe ke îre emi ngwook ebi ototun̄ ukan̄ kè Sitifanas mun̄. Isan̄a me lek kè ebibi, ǹkayaka ìkeek ibe ke ngwook ebi ofifi ife mun̄. ¹⁷ Karais ìkaria emi ìnu ibe emi ǹnengwook ene mun̄. Ìria emi inu ibe emi ǹnenlook ata etip, mè nkasa ikọ iriọọn̄-inu ebilene ìlook ata etip ya, inyi mkpa eyi Karais okwube me inyọn̄ uti nkwurieen̄ ikakana inu kpunube unye me emen.

Karais ore unye mè iriọọn̄-inu eyi Awaji

¹⁸ Ata etip ofolek mkpa eyi Karais okwube me inyọn̄ uti nkwurieen̄ ìre inu burubut isa inyi ebi ìbechechep. Ire, me lek kiji ebi ekinyanyan̄a isibi, ata etip ya ìre unye eyi Awaji. ¹⁹ Ege me Ikpa Mbuban ibe,

“Mâjijaka iriọọn̄-inu ebi ìriọọn̄ inu;

Mârọ inyi ifuk-ibot ebi ìkween̄

uga ikpa ikayaka ìkup me lek inu geege.”

²⁰ Mọmọ ebi ìriọọn̄ inu cha? Mọmọ ebi ìkween̄ uga ikpa cha? Sà ebi uga ifan̄a ibot ikpa eyi linyọn̄ mgbọ keyi cha ekup me owa? Me atikọ, Awaji îjeen̄ ibe ke iriọọn̄-inu eyi linyọn̄ keyi ìre burubut. ²¹ Me iriọọn̄-inu eyi Awaji, Awaji ìkasun̄ ibe ebi linyọn̄ esa me iriọọn̄-inu eyi kiban̄ eriọọn̄ ọmọ. Eya orọ, îbele Awaji ejit isasa me lek burubut ikọ eyi eji ekitumu inyan̄a ebi geelek ìchechieek. ²² Ebi Ju ekiweek imumun̄ uyeke uyeke inu ijejeen̄ sabum ema ènechieek ibe ke ata etip yi ìre atikọ. Ikeya si, ebi Giris ekiweek isasa ifuk-ibot ebilene igobo ata etip yi itet. ²³ Ire, ata etip eji ekilook ebi ene ìre ata etip ofolek kè Karais ogwu egonbe ikpan̄ me inyọn̄ uti nkwurieen̄. Eya orọ, ata etip yi ìre njijọ inu me lek ebi Ju, mè ire inu burubut me lek ebi ekarege ebi Ju. ²⁴ Ire, me lek ebi Awaji ogwenbe, ebi Ju mè ebi kpere ebi Ju, Karais ore unye eyi Awaji, mè ire si iriọọn̄-inu eyi Awaji. ²⁵ Ire ebi ene ikimọnọ ibe ke inu yi Awaji orọbe ìre inu burubut, burubut eyi Awaji îgak iriọọn̄-inu ebilene. Ofifi si, ire ebi ene ikimọnọ ibe ke Awaji îdek, idedek eyi Awaji odekbe înye igak unye geelek ebilene ekaan̄be.

²⁶ Bọn Nte n̄a, ìkeek-nu ojelek ife enyi erebe sabum Awaji onigwen enyi! Me chieen̄ ebilene, owuwa kinyi kpere ebi ìriọọn̄ inu, owuwa kinyi kpere ebi isi ile, ebi ìkakaan̄ unye isasa ikitọ ikọ, owuwa kinyi si kpemiin̄ me irek. ²⁷ Ire, Awaji ìgobo ebi ebi linyọn̄ emọnọbe kubọk ebi burubut, inyi esip itet ebi ìriọọn̄ inu, mè igobo si ebi ìdedek me linyọn̄, inyi esip itet ebi unye. ²⁸ Awaji ìgobo inu òsisiki ichit me linyọn̄ keyi, mè inu echi ebi linyọn̄ ekpọbe ilọ chieen̄, mè inu echi ikarege inu geege, isa irọ inyi inu ebi linyọn̄ esabe igwen inu ikayaka ìkup me lek inu geege. ²⁹ Awaji ìrọ ikeyi inyi ene geege ikagugo lek me isi kan̄. ³⁰ Îre Awaji orọ mè eji egọọk Jisọs Karais egbaan̄ ere ge. Ọmọ si orọ inyi eji ekaan̄ iriọọn̄-inu, mè ekana ebi ata irọrọ, sa me lek kè Jisọs Karais. Sa me lek kè Karais si ke eji ekana ebi ìkup me mbuban. Karais si ofaka eji isibi me irak ubọk ijo inu. ³¹ Îre mije keyi ke Ikpa Mbuban otumu ibe, “Ogwu geelek òbogugo lek, igugo lek mije inu echi Okumugwem orọbe.”