16
Òta amọn
1 Ǹkiweek ibe enyi eriọọn̄ gwun̄ Nte kiji enenwaan̄ ekigwen Fibi, òrere ogwu ntap-ubọk me ntitiin̄ Awaji òkup me ama Kenkiriye. 2 Soso, ìbọkọ ọmọ ìtap me erieen̄ Okaan̄-ene ubọk ògbegbe ibe ebọkọ gwun̄ eyi Awaji etap, mè ìtap ubọk ìnyi ọmọ me inu geelek òkup ọmọ me uyọt. Mije, ọmọ îtap ubọk enenen inyi owuwa ene, mè itap si inyi emi.
3 Ìtọp Pirisila mè Akwila amọn ìnyi emi. Îre ema melek n̄a ekigbaan̄ isi ikwaan̄ inyi Jisọs Karais. 4 Ema mîsa ugwem kiban̄ isun̄ inu ikike, inyi ema ekọt etap ubọk enyi emi. Ejit îbele emi enenen mije kiban̄. Ìkare emi gaalek nkitọn̄ ema, otutuuk ebi ntitiin̄ Awaji ìkup me ido ebi kpere ebi Ju si mîbele ejit enenen me lek kiban̄. 5 Ìtọp si ebi ntitiin̄ Awaji eyi òkup me uwu kiban̄ amọn ìnyi emi.
Ìtọp ata ogwu une n̄a, Epenitọs, amọn ìnyi emi. Ọmọ ore adasi ene òchechieek me lek kè Jisọs Karais me otutuuk agan̄ Esia.
6 Ìtọp Meri amọn ìnyi emi. Ọmọ îsa otutuuk unye kan̄ isi ikwaan̄ inyi enyi.
7 Ìtọp Andọrọnikọs mè Junias amọn ìnyi emi. Ema ìre ebi Ju ama n̄a, ebi melek n̄a ekupbe me uwu mkpọn. Ema ìre ebi eriọọn̄be erieen̄ me etete ebi otuchieen̄. Ema edasi n̄a ikana ebi eyi Karais.
8 Ìtọp Ampilietọs amọn ìnyi emi. Ọmọ ìre ogwu mmabe enenen me emen Okaan̄-ene.
9 Ìtọp Ọbanọs amọn ìnyi emi. Ọmọ melek kiji ekigbaan̄ isi ikwaan̄ inyi Karais.
Ìtọp si ata une n̄a Sitakis amọn ìnyi emi.
10 Ìtọp Apelis amọn ìnyi emi. Ọmọ ìre ogwu eroon̄be ikpọ, mè imun̄ ibe ke îsiki ibot inyi Karais.
Ìtọp ebi ototun̄ ukan̄ kè Arisitobulọs amọn ìnyi emi.
11 Ìtọp Erọdiọn, ogwu ama n̄a, amọn ìnyi emi. Ìtọp ebi ototun̄ ukan̄ kè Nasisọs ebi ìkup me emen Okaan̄-ene amọn ìnyi emi.
12 Ìtọp Tarafina melek Tarafosa amọn ìnyi emi. Ebibaan̄ chi mîkwukwulu enenen me irọrọ ikwaan̄ Okaan̄-ene.
Ìtọp ata une n̄a Pesis amọn ìnyi emi. Ọmọ si ìre ofifi enenwaan̄ òtatap lek isi ikwaan̄ Okaan̄-ene enenen.
13 Ìtọp Rufọs amọn ìnyi emi. Ọmọ ìre ogwu ikwaan̄ ogwu Okaan̄-ene ogobobe inyi lek kan̄. Ìtọp si ogwu uga amọn ìnyi emi. Ọmọ îre si uga inyi emi.
14 Ìtọp Asinkiritọs, mè Felegọn, mè Emes, mè Patorobas, mè Emas, mè bọn Nte ebi melek kiban̄ amọn ìnyi emi.
15 Ìtọp Filologọs, mè Julia, mè Neriọs, mè ogwu ngwan̄ enenwaan̄, mè Olimpas, mè otutuuk bọn Awaji ìkup melek kiban̄ amọn ìnyi emi.
16 Ìkat lek kinyi, mè ìtọp lek kinyi amọn me oniin̄ òkup mbuban ìnyi emi. Otutuuk ntitiin̄ kè Karais mîtọp enyi amọn isan̄a.
Òta nteme
17 Ǹkiriaak enyi, bọn Nte n̄a ibe, soso ìgbala chieen̄ me lek ebi ìkitap icheche lek, mè ikiwuwọlọ ichechieek ebi ene, mè ikije ikeme ijejeen̄ ya enyi ebọkọbe. Ìsan̄a lek kinyi me lek kiban̄. 18 Mije, ìkare Karais Okaan̄ kiji ke ema ekitọbọ ebum inyi. Îre ulọk kiban̄ ke ema ekitọbọ ebum inyi. Ema ekisa unin̄i otu, mè ikọ ofiaan̄ ikileke ekiket ebi kperiọọn̄ ofiaan̄ kiban̄. 19 Etip kinyi òkitaan̄ ikana ere geelek ibe ke enyi mîsiki ibot inyi ata etip enenen. Eya orọ, ejit îbele emi enenen mije kinyi. Ire, ìgbala chieen̄. Ǹkiweek ibe enyi ekerọ ata inu kubọk ebi ìriọọn̄ inu. Ǹkaweek ibe enyi eriọọn̄ inu geege ofolek ijo inu.
20 Ìkpofiin̄ mgbọ Awaji ogwu òkinyi ene esuuk môkpukpukube Setan me irak ukot kinyi. Atata nnwọn Okaan̄ kiji Jisọs ikup melek kinyi!
21 Timọti, ogwu melek n̄a ekigbaan̄ isi ikwaan̄, îtọp enyi amọn. Lusiọs, mè Jasin, mè Sosipata, ebi ama n̄a, mîtọp enyi amọn si.
22 Emi Tetiọs ogwu ògege ikpa yi inyi Pọọlu, ntọp enyi amọn si. 23 Gayọs, ogwu òsa me ata ejit inyi emi melek ebi ntitiin̄ Awaji irek me uwu kan̄, îtọp enyi amọn si. Irasitọs ogwu òkisun̄ ikpoko ikwaan̄ ama, mè Kwọtọs gwun̄ Nte kiji enerieen̄ mîtọp enyi amọn si.
24 [Atata nnwọn Okaan̄ kiji Jisọs Karais ikup melek kinyi otutuuk ene. Ikup ikeya!]
Uriaak eyi itọn̄
25 Mgbọ keyi, eji etọn̄ Awaji ogwu òbokọt irọ inyi enyi ekeke enye me ichechieek sa me ata etip kè Jisọs Karais eyi nkilook igọọk me lek nlelet inu echilibe ijeen̄ emi. Awaji ìlelet udọk udọk inu yi karake ukot ikaan̄. 26 Ire, me mgbọ keyi, mîchili nlelet udọk udọk inu yi ikpọk mbum. Sa me lek inu ebi nriran egebe, mîchili inu yi ijeen̄ otutuuk ido geelek igọọk me ida Awaji ogwu mgbọ ikakaan̄ge itata onyibe, inyi otutuuk ebi ido geelek me linyọn̄ esa me ikeya echieek, mè esiki ibot enyi Awaji. 27 Itọn̄ ikup inyi Awaji ogwu ọmọ gaalek oriọọn̄be inu ichit, sa me lek kè Jisọs Karais! Ikup ikeya!