Ikpa Etip Pọọlu Ogebe Ijet
Ebi Rom
1
1 Emi Pọọlu ogwu usun̄ kè Karais Jisọs, ogwu Jisọs ogwenbe ibe inire ogwu otuchieen̄ kan̄, mè isan̄a isun̄ esese ibe ikilook ata etip eyi Awaji, îre emi nge ikpa etip yi ijet enyi. 2 Ata etip yi ke Awaji ochieek me use inan̄a me otu ebi nriran kan̄ karake ukot ikaan̄, kubọk egebe me emen Ikpa Mbuban. 3 Ata etip yi ìre etip òfo me lek Gwun̄ kan̄, òrere Okaan̄ kiji Jisọs Karais. Me akpalek ebilene, ọmọ ìre gwun̄ owot iman kè Debit. 4 Awaji îjeen̄ ibe ke ọmọ ore Gwun̄ Awaji, sa me unye eyi Ekwukwu Mbuban, mè ijojomo me mkpa eyi ọmọ ojomobe. 5 Sa me lek kan̄ ke Awaji onyi eji atata nnwọn, mè igwen eji ibe eji enere ebi otuchieen̄, mè esa ata etip esi elook ebi ekarege ebi Ju, mije erieen̄ kan̄, inyi ema enechieek me lek kan̄, mè esiki ibot enyi ọmọ. 6 Enyi ebi Rom si me otu ifuk ebi Awaji ogwenbe ibe enekana ebi eyi Jisọs Karais.
7 Emi ǹkige ikpa etip yi ijet enyi otutuuk ebi ìkup me Rom, enyi ebi Awaji omabe, mè igwen ibe enere ebi kan̄. Atata nnwọn mè esuuk eyi ònan̄a me ubọk Awaji ogwu òrere Nte kiji, mè eyi ònan̄a me ubọk Okaan̄-ene Jisọs Karais ikup inyi enyi.
Îlọk Pọọlu isisi Rom
8 Me adasi irek, ntọn̄ Awaji n̄a me ibot kinyi, sa me erieen̄ kè Jisọs Karais, mije, ukpatu ofolek ichechieek kinyi òkitaan̄ ikana ere me linyọn̄. 9 Awaji ogwu nkisa otutuuk ejit n̄a isi ikwaan̄ inyi, ikwaan̄ eyi ilolook ata etip eyi ogwu Gwun̄, Awaji ya ore ogwu ata-ikọ inyi emi. 10 Awaji îriọọn̄ ibe ke nkikeek enyi me uriaak n̄a mgbọ geelek. Ǹkiriaak si uriaak mgbọ keyi ibe, ire ineme Awaji, mè isan̄a irek isibi inyi emi, mè ǹnu ǹnemkpọ enyi.
11 Ǹkiweek inunu inimun̄ enyi, inyi eji egbaan̄ ekaan̄ usini uche eyi Ekwukwu Mbuban, mè enyi esa me ikeya ekeke enye. 12 Eyi ìsibi ibe, ire nnu, ke ichechieek kinyi môtap emi efuuk me emen, eyi n̄a si môtatap enyi efuuk me emen. 13 Bọn Nte n̄a, ǹkiweek ibe enyi eriọọn̄ ibe ke nkitọt owuwa mgbọ inunu inikpọ enyi, inyi ǹkọt ǹrọ mè owuwa ene me etete kinyi egwu ekom echieek me lek kè Jisọs Karais, kubọk nrọbe me esese ofifi ido ebi kpere ebi Ju. Ire, mege inire mgbọ keyi, ìkire nsitọt, inu ge îra ikput emi, mè irọ inyi nkanu.
14 Emi nkaan̄ otutuuk ene urieek itutumu ikọ Awaji inyi ema, mè ìre ebi Giris, mè ìre ebi kpere ebi Giris, mè ìre ebi ìriọọn̄ inu, mè ìre ebi kperiọọn̄ inu. 15 Îre mije keyi ke îkup emi me uyọt enenen isasa ata etip ya inilook enyi ebi ìkup me Rom.
16 Esip geege ìkatet emi ilolook ata etip yi, mije, ọmọ ore unye eyi Awaji okisa inyan̄a ebi geelek ìchechieek. Edasi ilook ebi Ju ata etip yi, sabum enilook si ebi ekarege ebi Ju. 17 Mije, ata etip yi okijeen̄ ubọk ene obosa ire ogwu ata irọrọ inan̄a me ubọk Awaji. Ata irọrọ keyi ìkinan̄a me lek ichechieek, bene me ibebene kan̄ re itata kan̄. Ikeya si ke ege me emen Ikpa Mbuban ibe,
“Ogwu ata irọrọ ìboluk ugwem inan̄a me ichechieek kan̄.”a
Awaji înaan̄ ejit me lek ebilene
18 Awaji òkinaan̄ ejit me emen inyọn̄ ikeme ebilene, mije ema ekirọ ijo inu, kpekimin Awaji, melek si, mije ema ekisa ijo inu kiban̄ ikana ichit atikọ eyi Awaji. 19 Awaji ìkinaan̄ ejit inyi ema, mije, otutuuk inu ògbegbe ibe eriọọn̄ ofolek Awaji îsibi utoon̄ me isi kiban̄. Awaji me lek kan̄ osan̄a inu chi isibi ijeen̄ ema. 20 Karake Awaji orombe linyọn̄, inu òfo me lek Awaji, echi chieen̄ ene ìkpokọt imun̄, îsibi utoon̄ me chieen̄ ebilene. Inu chi ìre unye Awaji eyi òkukup ire mgbọ ikakaan̄ge itata, mè ubọk Awaji okupbe. Ebilene esa me lek inu Awaji orombe igobo inu chi itet. Mije inu chi ema eriọọn̄be, ema kpekaan̄ inu geege ebetumu isa inyan̄a lek kiban̄, me lek ema ekariọọn̄ge Awaji.
21 Mije, ema mîriọọn̄ ogwu Awaji orebe isan̄a, mè ijit imimin ọmọ kubọk Awaji, mè ijit si ibebe ọmọ: “Owu onirọ.” Kpan̄asi ikeya, ifuk-ibot kiban̄ ìkpọkpọ iwuwọlọ isan̄a kpai, ejit burubut kiban̄ okpọkpọ idun. 22 Ema ekimọnọ lek kiban̄ kubọk ebi ìriọọn̄ inu, ire, ema mîkana ndide. 23 Kpan̄asi ema ebekitọbọ ebum inyi Awaji ogwu òkakaan̄ umin, ogwu ìkakikwu, ema eyaka ikisi itọbọ ebum inyi mkpọmfaka erombe me mbet ebilene òkikwukwu, mè echi òbet lek ofut, mè anam, mè inu òkinyinyọnọ me ijọn̄.
24 Mije keyi, Awaji ojijit ema itele, inyi ema ekeluk ugwem egọọk ijo ulọk geelek òkup ema me ejit, mè ekenyam lek kiban̄ enyi ten̄ten̄ ugwem barabat me etete kiban̄, mè ekesa lek kiban̄ erọ inu ochak. 25 Ema mîjit atikọ eyi Awaji, mè iyaka inikichieek ikọ ataak. Ema ekitọbọ ebum, mè ikisi ikwaan̄ inyi inu erorom, kpan̄asi ebekitọbọ ebum mè ikisi ikwaan̄ inyi ogwu òrorom inu chi geelek, ogwu itọn̄ okupbe inyi ire mgbọ ikakaan̄ge itata. Ikup ikeya!
26 Mije keyi ke Awaji ojit ema itele me emen ijo ulọk kiban̄. Ulọk ilaak îtap ebibaan̄ kiban̄ iraak. Ema mîtele igọgọọk ebirieen̄ ilaak, ubọk Awaji osun̄be, mè iyaka ikisi igọọk ebibaan̄ ogbo kiban̄ ilaak. 27 Ikeya si ke ebirieen̄ kiban̄ etele igọgọọk ebibaan̄ ilaak, ubọk Awaji osun̄be, mè iyaka ikibumu ejit inin̄ lek ebirieen̄ ogbo kiban̄ ikigọọk ilaak, mije ijo ulọk kiban̄. Inu esip! Mije ten̄ten̄ ugwem barabat chi ema ekiluk melek ebirieen̄ ogbo kiban̄, ema mîbọkọ si mkpukpe ògbegbe nlilọ ugwem kiban̄.
28 Ofifi si, ubọk ebilene emọnọbe ibe ke irọriọọn̄ Awaji ìkakup me uyọt, Awaji îjit ema itele me emen njijọ wọlọwọlọ ekiket, inyi ema ekerọ inu ikagbege ibe erọ. 29 Inu ikpak, mè ijo inu geelek, mè chieen̄ ile, mè wọlọwọlọ ugwem geelek, mè njijọ ejit, mè ikpakpan̄ ene, mè ibaak, mè ataak, mè ejit mba ìjojot emen kiban̄. Ema ìre ebi ìkikpa ene, 30 mè ebi ìkifiat ene, mè ebi ìchacha Awaji, mè ebi unyechieen̄, mè ebi ugumulek, mè ebi otu ile. Ema ekisan̄a owuwa aya oniin̄ ekisa irọ ijo inu isibi, kpekilibi nte kiban̄ mè nga kiban̄. 31 Ema kpekaan̄ ifuk-ibot geege, kpekisun̄ ikọ otu kiban̄ geege, ife unye-ejit, kpekito ene nsan kubọk ge. 32 Ubọk geelek ema eriọọn̄be unen Ikan Awaji otapbe ibe ke ebi geelek ìkirọ inu chi ebekwukwu, ema ekpọkpọ ikirọ si inu chi ifo isi, mè ikirọ ebi geelek ìkirọ ijo inu chi inye.