18
Pọọlu îsi Kọrint
1 Mgbọ eya orakabe, Pọọlu onanan̄a me Atens ije isi Kọrint. 2 Me ama ya ke îchichini ogwu Ju ge ekigwen Akwila, ogwu ama Pọntọs. Ìkafiin̄ mgbọ Akwila mè Pirisila ogwu nwa enan̄abe me Rom me ido Itali inu me Kọrint, mije Kọlọdiọs ogwu Sisa otapbe ikan ibe otutuuk ebi Ju esibi me Rom. Pọọlu onenisi ikpọ ife chi. 3 Akwila mè ogwu nwa ìre ebi ìkichim uwu ọfọ kubọk Pọọlu orebe si. Eya orọ, mgbọ Pọọlu onube inikpọ ema, mè imun̄ ukot mbọm kiban̄, igọgọọk ema iluk ikirọ ikwaan̄ ya. 4 Usen Mbuban geelek, Pọọlu îra ikisi uwu ntitiin̄ ebi Ju òkup me ama ya isi itumu ikọ Awaji inyi ebi Ju mè ebi Giris, ikisa iweek irọrọ inyi ema echieek me lek kè Jisọs.
5 Mgbọ Sailas mè Timọti enan̄abe me Mesidonia inu me Kọrint, Pọọlu osasa otutuuk mgbọ kan̄ inyi ilolook ata etip ya, mè ikisa inu ata-ikọ me emen Ikpa Mbuban ikijeen̄ ebi Ju ibe ke Jisọs ore ogwu Awaji otọkọbe aran̄ me ibot ya. 6 Ire, mgbọ ebi Ju ekitumu ikeme Pọọlu, mè ikitiik ọmọ, Pọọlu onanaan̄ ejit, mè igen̄ mfuun̄ isan̄a me lek ofọnti kan̄ isasa irọ inu ata-ikọ ikeme ema, mè itumu inyi ema ibe, “Kè eje kinyi ibia me ibot kinyi! Ikwaan̄ ògbegbe ibe emi ǹsi ǹnyi enyi, nsi isan̄a. Awọ keya înan̄a emi me ibot. Bene me mgbọ keyi fo isi, mâkana isi lek ebi ekarege ebi Ju.”
7 Pọọlu onanan̄a me uwu ntitiin̄ ya isibi, mè ikana isi inin̄ uwu ogwu enerieen̄ ge ekigwen Titiọs Jọsitọs me agba lek uwu ntitiin̄ ebi Ju ya. Titiọs ya ìre ogwu ofifi ido òkitọbọ ebum inyi Awaji. 8 Kirisipọs ogwu ibot uwu ntitiin̄ ebi Ju ya mè otutuuk ebi uwu kan̄ echechieek me lek Okaan̄-ene. Owuwa ebi Kọrint ìnọnọ ikọ cha Pọọlu otumube echechieek si. Pọọlu ogwogwook ema mun̄.
9 Me eririeen̄ usen ge, Okaan̄-ene onenitumu inyi Pọọlu me ilaak ọkpọchieen̄ ibe, “Katet ukpook! Kpọkpọ kitumu ikọ Awaji fo isi! Kachit otu! 10 Mije, emi òwa melek kwun̄. Kpunu ene geege òbotim owu etim, kpunu si ene geege òbosak owu unan me lek. Mije, nkaan̄ owuwa ene me emen ama yi.” 11 Mije keya, Pọọlu okukup me ama ya acha ge mè okpọkọ ikijeen̄ ebi ene ikọ Awaji.
12 Me mgbọ Galio orebe ogwu ibot mkpulu me agan̄ Akaya, ebi Ju egbagbaan̄ itọt, mè itet Pọọlu isa isi uwu oyerebet ibe Galio ifieek oyerebet inyi, 13 mè itumu ibe, “Ene yi ìkiweek irọrọ inyi ebi ene eketọbọ ebum enyi Awaji me oniin̄ eyi ikatatge me lek Ikan kè Mosis.”
14 Mgbọ Pọọlu obonifọọk ikọ ya, Galio otutumu inyi ebi Ju cha ibe, “Ìkpọ, mebe enyi ebi Ju enitumu ikọ ofolek ten̄eten̄e ijo ugwem, mè ìyaka ire ene irọrọn̄ ikpele ikan ido, kè òtat ibe emi m̀gban̄ utọn̄ me lek ikọ kinyi. 15 Ire, mije îrebe inu ofolek ikọ otu, mè ikọ erieen̄, mè inu ògbaan̄ me lek Ikan kinyi, enyi me lek kinyi ìsi ìsibi oyerebet keya me etete kinyi. Emi m̀kpasibi oyerebet me ibot ojelek inu òkup ikeya.” 16 Galio itutumu ikeya isan̄a, ilalap ebi Ju cha isibi me uwu oyerebet ya. 17 Otutuuk kiban̄ esasa unaan̄-ejit igwook inin̄ lek kè Sọsitenis ogwu ibot uwu ntitiin̄ kiban̄, mè itet isut me isi uwu oyerebet ya. Ire, Galio omumun̄, mè idaan̄ chieen̄ isan̄a me lek, kubọk ìkamun̄.
Pọọlu îgwu ikom isi Antiọk
18 Pọọlu onenigọọk bọn Nte ikup me Kọrint owuwa usen, mè initele ema, mè isa Akwila mè Pirisila igbaalek ije me uji mun̄ ifo ido Siria. Sabum îninan̄a, îgba ama Kenkiriye ikup ikwọkọ ijeek isan̄a mè ibot kan̄, mije inyan̄a-ibot ge înyan̄abe. 19 Mgbọ ema erebe Efesọs, Pọọlu otetele Akwila mè Pirisila, mè ije eyi kan̄ isi uwu ntitiin̄ ebi Ju òkup me ama ya isi ikitumu ikọ Awaji melek ebi Ju. 20 Mgbọ ebi Ju cha ebeekbe Pọọlu ibe igọọk ema ikup sọnja mgbọ igbaalek, Pọọlu ojijit. 21 Ire, sabum înan̄abe itele ema, îchieek ema use ibe, ire ineme Awaji, ke ọmọ môyaka igwu ikom inu. Ineninin̄ uji ikọp inan̄a me Efesọs. 22 Mgbọ ema ekọpbe itoon̄ me Sisaria, Pọọlu ojeje isi Jeruselem isi itọp ebi ntitiin̄ Awaji amọn, mè inije ifo Antiọk.
23 Pọọlu okukup sọnja mgbọ me Antiọk, mè ibene ikijijen̄e me ama me ama ikana otutuuk agan̄ Galesia mè Firijia ikitap efuuk me emen ebi ìchechieek me lek kè Jisọs me ama cha.
Apọlọs îsi Efesọs mè Kọrint
24 Me ike mgbọ ya, ogwu Ju ge ekigwen Apọlọs ogwu ama Alikisendira, onanan̄a inu me Efesọs. Ogwu enerieen̄ yi îriọọn̄ ikpa, mè ire ogwu usọ me otu itumu-ikọ, mè iriọọn̄ si inu egebe me Ikpa Mbuban enenen. 25 Mîwuuk lek ijeen̄ ọmọ inu ofolek Oniin̄ eyi Okaan̄-ene, ọmọ okekinye otu itumu ikọ, mè iriọọn̄ ikijeen̄ inu ofolek kè Jisọs itat. Ire, otutuuk igwook-mun̄ eyi ọmọ oriọọn̄be ìre igwook-mun̄ kè Jọn. 26 Apọlọs obebene ikitumu ikọ me uwu ntitiin̄ ebi Ju, ìkatet ukpook geege. Mgbọ Akwila mè Pirisila enọbe inu îkijeen̄, ema egwegwen ọmọ isa ifo uwu kiban̄, mè inisiki lek ijeen̄ ọmọ Oniin̄ eyi Awaji ijaan̄ igak ike ọmọ oriọọn̄be. 27 Mgbọ Apọlọs oboninan̄a isi Akaya, bọn Nte erọrọ ọmọ inye, mè ige ikpa inyi bọn Nte ìkup me Akaya ibe ebọkọ ọmọ etap. Mgbọ îrebe agan̄ ya, inenire nga ntap-ubọk ile inyi ebi ìchechieek me lek kè Jisọs me agan̄ ya inan̄a me atata nnwọn eyi Awaji. 28 Mije, îsa me unye otu ifan̄a kan̄ itumu ikọ ichit otu ebi Ju me eden̄ ama, mè isa inu egebe me emen Ikpa Mbuban ijeen̄ ikpọk mbum ibe ke Jisọs ore Karais ya.