15
Ebi ntitiin̄ Awaji mîtitiin̄ me Jeruselem
1 Mgbọ Pọọlu mè Banabas ekupbe me Antiọk ya, usini ebirieen̄ enanan̄a me agan̄ Judia inu me Antiọk, mè ikijeen̄ bọn Nte ìkup me ama ya ibe, “Îtata mè efefieek enyi afi igọọk me Ikan kè Mosis, Awaji ìkponyan̄a enyi.” 2 Pọọlu mè Banabas egọgọọk ife cha iwut ifan̄a, mè igugọlọ enenen mije ijejeen̄ yi. Bọn Nte ìkup me Antiọk enenisan̄a Pọọlu mè Banabas mè ebi ofifi ife si igbaalek iria ibe esi Jeruselem esi emun̄ ebi otuchieen̄ mè ebi ugane ntitiin̄ Awaji chieen̄, mije ijejeen̄ yi. 3 Ebi ntitiin̄ Awaji me Antiọk eneniria ebi egobobe cha isibi. Mgbọ ema ejebe inire ido Fonisia mè agan̄ Sameria, ema ekekikpa inyi ebi ama cha ubọk ebi ekarege ebi Ju esabe igwu ikom inu me lek Awaji. Bọn Nte ìkup me ere cha ebebele ejit enenen, mije etip ya. 4 Mgbọ ema enube inire Jeruselem, ebi otuchieen̄ mè ebi ugane ntitiin̄ mè otutuuk ebi ntitiin̄ Awaji ebọbọkọ ema itap me ata ubọk. Pọọlu mè Banabas enenikpa otutuuk ikwaan̄ Awaji osabe ema isi inyi ebi ntitiin̄ Awaji cha.
5 Ire, mgbọ ema egban̄be ikọ ya isan̄a, usini ebi ìchechieek, ebi ìrarak ire ebi Farisi, enanan̄a ikeke, mè itumu ibe, “Me atikọ, îgbe ibe otutuuk ebi ekarege ebi Ju, ebi ìbọbọkọ ata etip itap efieek afi, mè esun̄ otutuuk Ikan kè Mosis.”
6 Ebi otuchieen̄ mè ebi ugane ntitiin̄ enenisi inin̄ oru ofolek ikọ ya. 7 Mgbọ ema ewutbe ifan̄a ijọn̄ọ mgbọ me emen oru ya, Pita oneninan̄a ikeke me etete kiban̄, mè itumu inyi ema ibe, “Bọn Nte n̄a, enyi mîriọọn̄ ibe, me sọnja mgbọ òraraka, ke Awaji îgobo emi me etete kinyi iria ibe emi ǹsa ata etip ǹsi ǹlook ebi ekarege ebi Ju, inyi ema enọ, mè echieek. 8 Awaji ogwu òrọriọọn̄ ejit ebilene oneninyi ebi ife cha Ekwukwu Mbuban ubọk înyibe eji si, isasa ijeen̄ ibe ke ọmọ îbọkọ ife cha itap. 9 Awaji ìkamọnọ ebi ife cha kubọk esese ife me lek kiji, mije, ìsa me ichechieek ife cha ekaan̄be igwọk ejit ife cha itana, kubọk îrọbe inyi eji. 10 Me mgbọ keyi, ìre keke orọ enyi ekiweek ibeben ulobo akpan, eyi eji mè ebi nte nte kiji ekakọtge ìbeme, itoon̄ ife chi me oguga? Ìre enyi kperiọọn̄ ibe ke eyi ìre itọtọ Awaji ikpọ? 11 In̄-in̄, ìkatat ikeya. Eji mîchieek ibe ke Awaji ìnyan̄a ife chi sa me atata nnwọn eyi Okaan̄ kiji Jisọs Karais, kubọk Awaji onyan̄abe eji si.”
12 Otutuuk ebi ntitiin̄ ekpọkpọ iriaan̄ otu ikigban̄ mgbọ Banabas mè Pọọlu ekikpa ubọk Awaji osabe ema isi ikwaan̄ ukechieen̄, mè irọ si uyeke inu me etete ebi ekarege ebi Ju. 13 Mgbọ ema ekpabe isan̄a, Jemis onenitumu ibe, “Bọn Nte n̄a, ìgban̄ utọn̄! 14 Saimọn îra ikpa ubọk Awaji okaan̄be ulọk me lek ebi ekarege ebi Ju me adasi mgbọ, mè igobo ebi ene me etete kiban̄ isa irọ ebi kan̄. 15 Ikọ ebi nriran egebe ìkpọkpọ ilibi itat me lek ikọ eji ekinọ mgbọ keyi. Ebi nriran ege ibe ke Awaji ìbe,
16 “ ‘Mgbọ keyi isiraka,
emi mâgwu ikom inu ininama
uwu kè Debit eyi ògbugbugbọ irọn̄.
Mâkpọk inama uwu ya ònanan̄a
irọn̄, mè irọ inyi iyaka inwọn.
17 Sa me ikeya, otutuuk ebilene ebi ìsisik,
mè otutuuk ebi ido geelek
ebi ngwenbe inyi lek n̄a,
mêniweek Okumugwem,
ogwu òrọrọ inu chi geelek,a
18 eyi ebi ene eriọọn̄be karake ukot ikaan̄.’
19 “Eya orọ, me nkeek n̄a ìkagbe ibe eji etap uyọrọlek me lek ebi ìgwugwu ikom igọọk Awaji me etete ebi ekarege ebi Ju. 20 Kpan̄asi ikeya, eji ege ikpa ejet ife cha ibe ekarie inorie geege ikatanage me isi Awaji mije esabe igwa ngwugwa inyi mkpọmfaka, mè etele ugwem barabat, mè ekataka anam geelek kpegwugwu isibi eje, mè eje si ikanin̄ ema otu. 21 Mije, bene me karake ukot ikaan̄ ke ekifuk Ikan kè Mosis me ama geelek. Mege inire mgbọ keyi, mêkifuk si me otutuuk uwu ntitiin̄ ebi Ju me Usen Mbuban geelek.”
Ebi ibot ntitiin̄ Awaji mîge ikpa ijet bọn Nte ebi ekarege ebi Ju
22 Ebi otuchieen̄ mè ebi ugane ntitiin̄ mè otutuuk ebi ntitiin̄ Awaji ìkup me Jeruselem enenitumu ifieek ibe ke mêgobo ene igbaalek kè Pọọlu mè Banabas iria isi Antiọk. Ema enenigobo Judas ogwu ekigwen Basabas, mè Sailas. Ebirieen̄ iba chi ìre ebi ibot me etete bọn Nte me Jeruselem. 23 Enenige ikpa etip keyi isa inyi ema ibe esa egbaalek esi:
“Eji bọn Nte kinyi ebi otuchieen̄, mè ebi ugane ntitiin̄ Awaji ege ikpa etip keyi ijet enyi, bọn Nte ebi ekarege ebi Ju me Antiọk, mè Siria, mè Silisia.
“Eji mîtọp enyi amọn!
24 “Eji mînọ ibe ke îkaan̄ ebi ìnan̄a me etete kiji inu me lek kinyi me eji ekanyige unye, mè inisisaak enyi, mè itumu ikọ òwuwuwọlọ enyi ejit. 25 Mije keya, ke eji otutuuk ene etumu ifieek ibe egobo ene me etete kiji, inyi egọọk enu me lek kinyi, ema mè atata ebi unene kiji, Banabas mè Pọọlu, 26 ebi ìsasa me mkpa mè ugwem isi ikwaan̄ mije erieen̄ Okaan̄ kiji Jisọs Karais. 27 Eya orọ, eji eria Judas mè Sailas ibe egọọk enu enesa otu kiban̄ ekpa otutuuk inu yaage eji egebe me emen ikpa etip yi enyi enyi isi mè isi. 28 Înwọn me lek Ekwukwu Mbuban, mè inwọn si me lek kiji ibe ke ìkagbe ibe eji eyaka ebene ofifi ulobo akpan eyi Ikan kè Mosis geege etoon̄ enyi me oguga ilọ me lek nteme kechi: 29 Ikarie inorie geege esabe igwa ngwugwa inyi mkpọmfaka. Ikalaka eje. Ikataka anam geege ekpan̄be eyi kpegwugwu isibi eje. Ìtele ugwem barabat. Ire enyi isan̄a lek kinyi me lek otutuuk inu chi, mônwọn enenen.
“Ìriọọn̄ ubọk ìkup.”
30 Ebi ntitiin̄ Awaji me Jeruselem eneniria ebi ikwaan̄ cha isibi. Mgbọ ema erebe Antiọk, ema etititiin̄ otutuuk ebi ntitiin̄ Awaji ìkup me ama ya, mè inisa ikpa ya inyi ema. 31 Ife cha ebọbọkọ ikpa ya, mè ifuk. Mgbọ efukbe, mè inọ ikọ ukarajit òkup me emen, ejit obebele ema enenen. 32 Judas mè Sailas me lek kiban̄ ìre ebi nriran. Ema enenitumu owuwa ikọ ukarajit isa itap bọn Nte cha efuuk me emen, inyi ekọt ekeke enye efo isi me emen ichechieek kiban̄. 33 Mgbọ ema egọọkbe ikup me Antiọk ijọn̄ọ mgbọ sọnja, bọn Nte cha enenitutuun̄ ema itap me oniin̄. Ema efofon Jeruselem me esuuk, igọọk ebi ìraria ema inu. 34 Ire, Sailas obebe ke ọmọ môbia me Antiọk. 35 Pọọlu mè Banabas ekukup me Antiọk. Ema mè owuwa ofifi bọn Nte ekukup me ere ya ikijeen̄ inu, mè ikilook ata etip eyi Okaan̄-ene.
Pọọlu mè Banabas mîche lek
36 Mgbọ mgbọ orakabe itoon̄ me lek, Pọọlu onenitọt inyi Banabas ibe mè ema enegwu ekom esi ama geelek ere ema elookbe ata etip eyi Okaan̄-ene, esi ekpọ-nu ubọk ebi ìchechieek me ere cha ekirọ. 37 Banabas oneniweek ibe Jọn ogwu ekigwen si Mak igọọk ema isi ije ya. 38 Ire, Pọọlu obebe ke ìkagbe ibe Jọn igọọk ema isi, mije ke îtele ema me Pamfilia me adasi ije kiban̄, mè igwu ikom, ìkagọọk ema ìsi ikwaan̄ ya ìre òta. 39 Ifan̄a ya otatap ikpele ibaak me etete kiban̄, ema echeche lek. Banabas omọmọnọ Jọn Mak isa igbaalek inin̄ uji awala ikọp isi achọ Saipọrọs. 40 Pọọlu omọmọnọ Sailas. Ebi ntitiin̄ Awaji erariaak uriaak inyi ema, mè iyaka ema itap me ubọk atata nnwọn eyi Okaan̄-ene. Ema enanan̄a. 41 Pọọlu osasa Sailas igbaalek ije ikana agan̄ Siria mè Silisia ikitap efuuk me emen ebi ntitiin̄ Awaji ìkup me agan̄ cha.