12
Ogwu osat Awaji îsan̄a Pita isibi me uwu mkpọn
1 Me mgbọ inu chi geelek okije inyi isi, ogwu ubọọn̄ Erọdu obebene ikisisaak owuwa ebi ntitiin̄ Awaji enenen. 2 Înyi ida, esasa oge akọn̄ ifieek Jemis ngwan̄ kè Jọn ebek. 3 Mgbọ Erọdu omun̄be ibe ke inu ya ọmọ orọbe îbele ejit ebi ibot ebi Ju, ijeje inyi isi, mè initet Pita si. Inu ya ìrọ me mgbọ ijọk Fituru Kpunu Olat. 4 Mgbọ Erọdu otetbe Pita, isasa isi itap me uwu mkpọn, mè ikana ọmọ itap me ubọk ugbọ ebi akọn̄ ini, ene ini me ugbọ ge, ibe ekebem. Erọdu ìben me ejit isasan̄a Pita isibi mgbọ ijọk Iraraka môrakabe, mè esibi ọmọ oyerebet me ibot me isi otutuuk ene.
5 Mije keya ke etet Pita ikaan̄ me mkpọn. Ire, ebi ntitiin̄ Awaji etetet lek inye me uriaak, ikibeek Awaji mbeek me ibot kan̄.
6 Me eririeen̄ òbowele usen Erọdu obosan̄a Pita isibi inyi esibi oyerebet me ibot, Pita ìlaak me etete ebi akọn̄ iba. Mîsa mkpọn iba igon ọmọ ikam me lek ebi akọn̄ iba cha, ofifi ebi akọn̄ ìkibem ere ekekeke me otunchit uwu mkpọn ya ikibem. 7 Me ekakpọge chieen̄, ogwu osat Okumugwem ge okakana isibi me isi kè Pita. Utoon̄ ototoon̄ me otutuuk emen agwut uwu mkpọn ere Pita okupbe ya. Ogwu osat ya ochachak ubọk me agba nkan̄ kè Pita, mè isisik ọmọ, mè itumu inyi ọmọ ibe, “Gwat lek bolo chieen̄!” Mgbọ yaage mkpọn etapbe Pita me ebek ubọk agan̄ iba osọsọp igwook me ijọn̄. 8 Ogwu osat ya otutumu inyi Pita ibe, “Mọnọ fanti tobo ofọnti kwun̄ nye, mè tap ikpukot kwun̄!” Pita ototobo fanti, mè itap ikpukot. Ikpọkpọk itumu inyi ibe, “Mọnọ ofọnti inyọn̄ kwun̄ tap, mè gọọk emi!” 9 Pita ogọgọọk ogwu osat ya ije isibi me uwu mkpọn ya. Ire, ìkariọọn̄ ibe ke inu ya ogwu osat ya okirọ melek kan̄ ìre inu òkirọrọ. Ìkup me lek kan̄ kubọk ọmọ ìkimumun̄ ilaak. 10 Ema enenije iraka adasi otunchit mè ebi akọn̄ ìkibem ere keya, mè iraka si otunchit òso iba mè ebi akọn̄ ìkibem eyi keya. Òta kan̄, ema ejeje inire lek otunchit esabe okwukwut irọ, eyi ekije itibi isibi iraka inin̄ emen ama. Otunchit ya ochichili me lek kan̄ gaalek inyi ema. Ema ejeje itibi iraka inin̄ emen ama. Mgbọ ema ejebe ujọn̄ọ oniin̄ ge isan̄a, ogwu osat ya otetele Pita, mè ininiin̄ ichep.
11 Mgbọ ya ke Pita oninọ lek, mè ibe, “Jei, mgbọ keyi, îbolo emi chieen̄ me atikọ ibe ke Okaan̄-ene îria ogwu osat kan̄ inu, inyi ininyan̄a emi isibi me emen ubọk kè Erọdu, mè emen otutuuk ijo inu geelek ebi ibot ebi Ju etọtbe irọrọ emi. Ìkare ilaak ke nkimumun̄.”
12 Mgbọ Pita otetbe ibot me lek inu ya òrọrọ, inanan̄a ije isi uwu kè Meri nga kè Jọn ogwu ekigwen si Mak, ere owuwa ebi ene etitiin̄be ikiriaak uriaak. 13 Mgbọ Pita orebe uwu ya, mè ikitọbọ ubọk me isotu, gwun̄ enenwaan̄ ge ekigwen Roda, òkisi ikwaan̄ me uwu ya onunu ibonigwuku isotu. 14 Mgbọ înọbe ida ogwu òkitọbọ ubọk me isotu ya, mè iriọọn̄ ibe ke îre ida kè Pita, unwọọn̄ ìkachieek ibe ichili isotu inyi Pita. Kpan̄asi ikeya, igwugwu ikom ilibi inin̄ uwu isi ikpa ibe, “Îre Pita okeke me otu isotu!”
15 Ebi ìkup me uwu ya ebebe ọmọ, “Ibot kwun̄ îwuwọlọ!” Ire, Roda okpọkpọ itet otu inye ikitumu ibe ke îre Pita ke îre. Ebi ife cha ebebe, ire ikeya, ke môre ogwu osat òkibem Pita okitọbọ ubọk me isotu ya.
16 Ire, Pita okpọkpọ itet lek inye ikitọbọ ubọk me isotu. Mgbọ ema enisi igwuku isotu ikpọ, mè imun̄ ibe ke îre Pita, mbiribọ ogwogwook ema me lek enenen. 17 Ire, Pita owuwuwum ubọk inyi ema ibe eriaan̄ otu, mè inikpa inyi ema ubọk Awaji osabe isan̄a ọmọ isibi me uwu mkpọn. Mgbọ îkpabe isan̄a, inenibe ema esa ukpatu ya esi ekpa enyi Jemis mè otutuuk bọn Nte, mè inan̄a me ere ya ije ifo ofifi ere.
18 Mgbọ egwe owelebe, ikpele wọlọwọlọ oninin̄ me etete ebi akọn̄ ìkibem ere ya. Ema ekekidido lek kiban̄ ibe mè ìre kpasi inu onirọ Pita ye? 19 Erọdu onyinyi ida ibe eweek Pita ugwat ugwat esa ejet ọmọ. Ebi akọn̄ eweweek Pita igak, ire, kpekọt iweek imun̄. Erọdu ogwegwen ebi akọn̄ cha ìbebem Pita ido ikọ, mè inyi ida ibe ekpan̄ ema.
Mkpa kè Erọdu
Mgbọ inu yi orọbe iraka, Erọdu oneninan̄a me agan̄ Judia ifo ama Sisaria isi ikup sọnja mgbọ. 20 Me ujọn̄ọ mgbọ òraraka, Erọdu îbene ikinaan̄ ejit enenen me lek ebi ama Taya mè ebi ama Sidọn. Eya orọ, mgbọ îkupbe me Sisaria ya, ebi ama iba chi enenigbaan̄ isan̄a ene iria ibe esi etumu ikọ eta melek kan̄, inyi esuuk ikup me etete kiban̄ melek kan̄. Ebi esan̄abe cha edadasi isi igọọk ogwu enerieen̄ ge ekigwen Balasitọs, ogwu òkup me otuchieen̄ ikwaan̄ me uwu ogwu ubọọn̄ Erọdu ya itet unene. Sa me lek ene ya, ema ekọkọt itumu ikọ melek kè Erọdu, mè iriaak ibe mè esuuk ikup, mije, otutuuk inorie ebi ama iba cha ekirie ìkinan̄a me ido ogwu ubọọn̄ Erọdu okikpulu.
21 Mgbọ usen etumube ifieek okembe, ogwu ubọọn̄ Erọdu otatap ofọnti ubọọn̄ kan̄, mè isi isiki ikweek irek me inyọn̄ ogboon̄ ubọọn̄, mè ikitumu ikọ inyi ogbogbo ebi ene ìtititiin̄ me oyet ile. 22 Ebi ife cha ekekitaan̄ ukpo ibe, “Ida keyi ìre ida awaji, ìkare ida ebilene!” 23 Mije Erọdu ikanyige Awaji itọn̄, ogwu osat Okumugwem osusulu ọmọ ito me ijọn̄ mgbọ yaage. Mkput oninin̄ ijot ọmọ emen, mè irie ọmọ ikpan̄. Ikwukwu.
24 Ikọ Awaji okpọkpọ ikije inyi isi, mè ikikpọk iche ikana ere geelek.
25 Mgbọ Banabas mè Sọọlu esibe ikwaan̄ kiban̄ isan̄a, ema egwugwu ikom ika inu Jeruselem, mè isa Jọn ogwu ekigwen si Mak igbaalek ika.