6
Mîgobo ebi ikwaan̄ jaaba
1 Ike mgbọ okije, otu ifuk ebi ìchechieek me lek kè Jisọs okekiwa. Me etete kiban̄, ebi Ju ìnan̄a me okwaan̄ okwaan̄, mè ikitumu usem Giris enenigugọlọ melek ebi Ju ìluk me ido Ijeren, mè ikitumu usem Aram. Ebi Ju okwaan̄ okwaan̄ ekibe ke ekicheche inorie ilọ ebi nwakpa kiban̄ usen geelek. 2 Mije keya, akọp mè ebi otuchieen̄ iba cha enenigwen otutuuk ebi ìchechieek cha ititiin̄, mè itumu inyi ema ibe, “Ìkatat ibe eji ebi otuchieen̄ etele ikwaan̄ itutumu ikọ Awaji, mè eyaka enekekpọ chieen̄ me lek inorie. 3 Eya orọ, bọn Nte kiji, ìgobo ebirieen̄ jaaba me etete kinyi, ebi enyi eriọọn̄be ibe ke mîkaan̄ Ekwukwu Mbuban mè iriọọn̄-inu òjot òjot me emen, inyi eji ekana ikwaan̄ ikpọkpọ chieen̄ me lek inorie etap ife cha me ubọk, 4 mè eji ekọt esa otutuuk mgbọ kiji etap me irariaak uriaak mè itutumu ikọ Awaji.”
5 Ifuk-ibot yi onenibele otutuuk ebi ìchechieek cha ejit. Ema egogobo Sitibin, enerieen̄ ogwu ichechieek mè Ekwukwu Mbuban ojotbe emen, mè Filip, mè Porokọrọs, mè Nikanọ, mè Timọn, mè Pamenas, mè Nikolas ogwu Antiọk, ogwu òtetele ubọk iriaak Awaji ebi Ju, mè inichieek me lek kè Jisọs. 6 Enenisa ife chi inu me isi ebi otuchieen̄. Ebi otuchieen̄ etotoon̄ ema ubọk me ibot, mè iriaak uriaak me ibot kiban̄.
7 Sa me ikeyi, ikọ Awaji okpọkpọk ikana ere. Otu ifuk ebi ìchechieek okekimumana enenen me Jeruselem. Owuwa ebi ngwugwa si egọgọọk ichieek me lek kè Jisọs.
Ebi Ju mîtet Sitibin
8 Sitibin, ogwu enerieen̄ ya ogwu Ekwukwu Mbuban mè iriọọn̄-inu ojotbe emen onenikirọ owuwa inu ukechieen̄ mè uyeke uyeke ikwaan̄ me etete ebi ene. 9 Ikafiin̄ mgbọ, usini ebi Ju ebi ekigwen ebi “Ntitiin̄ ebi Ìkaan̄ Lek” enenibene ufialek melek kè Sitibin. Ebi ntitiin̄ chi enan̄a me ama Sairini mè Alikisendira mè ido Silisia, mè Esia. Ife chi ebebene ikigọọk Sitibin iwut ifan̄a. 10 Ire, ema kpekọt ikeke ida Sitibin, mije uga iriọọn̄-inu, mè unye eyi Ekwukwu Mbuban eyi îsabe ikitumu ikọ.
11 Ife chi enwenween̄ lek isi ilep ebi ene ibe enu enetoon̄ Sitibin uraamọn ibe ke ema mînọ Sitibin okitumu ijo ikọ ikeme Mosis, mè itumu si ikeme Awaji. 12 Sa me ikeyi, ife chi etatap wọlọwọlọ me ejit ebi Ju, mè ebi ugane ama, mè ebi ìjeen̄ Ikan. Ema etetet Sitibin isa isi me isi Oru ebi Ju. 13 Ema egwegwen si ebi ata-ikọ ataak. Ife chi esisibi inu me isi ebi Oru, mè initumu ibe ke Sitibin ìkakitele itutumu ikọ ikeme Uwu Mbuban mè Ikan kè Mosis. 14 Mije, ke ema mînọ Sitibin okitumu ibe ke Jisọs ogwu Najeret ya môgbugbọ Uwu Mbuban yi, mè inwene si otutuuk orọmijọn̄ geelek Mosis onyibe eji. 15 Otutuuk ebi ìkup me uwu Oru ya egwugwuun̄ chieen̄ ikikpọ Sitibin, mè imun̄ ibe ke isi kan̄ ìkitoon̄ kubọk isi ogwu osat Awaji.