24
Jisọs îjomo me mkpa
(Mat 28:1-10; Mak 16:1-8; Jọn 20:1-10)
1 Usen Mbuban ya onunu, mè iraka. Me ata ewelegwe ewelegwe ofit iwele kan̄, eyi òrere usen ògọọk Usen Mbuban, ebibaan̄ cha enenisa ugwun̄ mè aran̄ cha ema erọbe ikaan̄ me ubọk inan̄a ije isi udọn̄ ere efuun̄be Jisọs. 2 Mgbọ ema erebe ere ya, ema emumun̄ ibe ke mîkpukpọt ikpele ewuuk esabe ichit otu udọn̄ ya isan̄a. 3 Ema eninin̄ emen udọn̄ ya, mè ikpọ, kpemun̄ nkwukwu kè Okaan̄-ene Jisọs. 4 Ukpook otetet ema. Ema ekpọkpọ ikeke me ere ya, kpeyaka iriọọn̄ inu eberọ. Mgbọ ema ekekebe me ere ya, ebi osat Awaji iba, ìtatap ofọnti òtatana kubọk ura, ekpọkpọ ikana isibi, mè ikeke me agba lek kiban̄. 5 Ebibaan̄ cha egegele ibot isiki, mè ikana isi ichit me ijọn̄, mije, ukpook îtet ema enenen. Ire, ebi osat Awaji iba cha enenido ema ibe, “Ìre keke orọ enyi ekiweek ogwu òkup me ugwem me etete ebi ìkwakwaan̄? 6 Jisọs ìkakup me ere keyi! Îjomo me mkpa! Ìkeek ikọ îtumube inyi enyi me Galili mgbọ îkupbe me ugwem melek kinyi ibe, 7 ke mêtet ọmọ Gwun̄ Ebilene ikana itap me ubọk ebi ekariọọn̄ge Awaji, inyi egon ekpan̄. Òso egwe ita, ke ọmọ môyaka ijomo me mkpa.” 8 Ema enenisi ikeek ikọ cha Jisọs otumube inyi ema.
9 Ema enanan̄a me udọn̄-ufuun̄ ya igwu ikom ika, mè inikpa otutuuk inu chi inyi akọp mè ene ge ebi otuchieen̄ kan̄, melek otutuuk ebi melek kiban̄. 10 Ebibaan̄ ebi ìsisi imun̄ inu yi, mè isa inikpa inyi ebi otuchieen̄ kè Jisọs cha ìre Meri ogwu Magidala, mè Juwana, mè Meri nga kè Jemis mè ofifi ebibaan̄ ebi melek kiban̄. 11 Ire, ubọk ukpatu ya okupbe uyeke uyeke kubọk ukpatu ama urọk, ebi otuchieen̄ cha kpechieek ikọ ebibaan̄ cha ekpabe inyi ema. 12 Ire, Pita onanan̄a ikeke jîp, mè isa ekot ekot ilibi isi otu udọn̄-ufuun̄ ya. Mgbọ îrebe, ikwukwuun̄ isi ikpọ emen udọn̄ ya, mè imun̄ ekwut-ufuun̄ cha gaalek olaakbe ikeya me ere ya. Inu ya òrọrọ okwukwu Pita lek enenen. Igwugwu ikom ifo, mè ikikeek ubọk inu ya osabe ikup ikeya.
Jisọs îsibi me isi ebi udun̄ kan̄ ene iba me oniin̄ Emayọs
13 Ebi udun̄ kè Jisọs ene iba eneninan̄a me Jeruselem ikije isi gwun̄ ama ge ekigwen Emayọs. Nan̄a me Jeruselem si re Emayọs îjọn̄ọ ere iso ewuuk ije jaaba. 14 Me oniin̄ ije kiban̄, ema ekekikpa ukpatu ofolek inu cha òrọrọ me Jeruselem. 15 Mgbọ ema ekije, mè ikikpa ukpatu ya, Jisọs me lek kan̄ onanan̄a me agan̄ udun̄ kiban̄ ije inu, mè inigọọk ema ikigbaan̄ ije. 16 Ema mîmun̄ ọmọ, ire, kpekọt iriọọn̄ ogwu ọmọ orebe.
17 Jisọs onenido ema ibe, “Ìre kpasi ukpatu ke enyi ekikpa ije me oniin̄ ikeyi?”
Ema eyayaka ikeke. Ufieejit òkup ema me ejit îsibi me isi kiban̄. 18 Ene ge me etete kiban̄ ogwu ekigwen Kilopas onenido Jisọs ibe, “Ìre owu gaalek ore ogwu ichen òkup me Jeruselem eyi owu okariọọn̄ge inu òrọrọ me usen inen mè inen kechi?”
19 Jisọs ododo ema ibe mè ìre keke orọ ye?
Ema efọfọọk ibe, “Îre ukpatu ofolek kè Jisọs ogwu Najeret ke eji ekikpa. Jisọs ya ìre ikpele ogwu nriran Awaji, ogwu ikọ kan̄ mè inu îkirọ okaan̄be unye me isi Awaji mè isi ebilene. 20 Ebi ibot ngwugwa mè ebi ibot ebi Ju etetet ọmọ isa inyi Pailet ogwu ibot mkpulu ebi Rom, inyi itip ọmọ oyerebet mkpa. Etetet ọmọ igon ikpan̄ me inyọn̄ uti nkwurieen̄. 21 Ire, eji mîkpọ chieen̄ ibe ke îre ọmọ obonisan̄a ebi Ijeren isibi me irak ubọk usun̄. Ògak ge, chereyi ore òso egwe ita karake egonbe ọmọ ikpan̄. 22 Usini ebibaan̄ kiji mîrọ eji inu ukpook. Mgbọ ebibaan̄ chi esibe udọn̄ ere efuun̄be ọmọ me ata otu ewelegwe chereyi, kpemun̄ nkwukwu kan̄. 23 Kpan̄asi ikeya, eyaka igwu ikom ika initumu ibe ke ema mîmun̄ ebi osat ebi ìtutumu inyi ema ibe ke Jisọs òwa me ugwem. 24 Isasa irọ ikọ ya inye, usini ebi melek kiji mîsi udọn̄ ere efuun̄be ọmọ, mè isi imun̄ inu geelek kubọk ebibaan̄ cha etumube. Ire, kpemun̄ nkwukwu kan̄ me ere ya.”
25 Jisọs onenitumu inyi ife cha ibe, “Enyi mîbubut enenen! Enyi kpekigwat lek igobo inu itet! Ìkpọ-nu ubọk îyọtbe enyi me lek igwagwat lek ichieek otutuuk ikọ ebi nriran etumube. 26 Ìre ìkafat ìre unen ibe ke Karais ya mômun̄ ufialek sabum ònonin̄ emen itọn̄ eyi mkpulu kan̄?” 27 Jisọs onenibene me lek inu Mosis ogebe me Ikan, mè echi ebi Nriran egebe, ikijeen̄ ema otutuuk inu egebe me emen Ikpa Mbuban ofolek kan̄.
28 Mgbọ ema ejebe igbet ugwaka oniin̄ Emayọs ere ema ebesi, Jisọs orọrọ kubọk ìbojeje iraka ama ya. 29 Ema erariaak ọmọ ibe, “Soso na gọọk eji gba uwu laak wele egwe, ke egwe mônifit, egwe cherekeyi môniraka.” Jisọs ochechieek, mè igọọk ema ije igwaka ama ya.
30 Mgbọ ema ekupbe me lek ikasi ikirie inorie, Jisọs omọmọnọ fituru, mè iriaak uriaak me lek, mè igwaka iche inyi ema. 31 Mgbọ yaage, chieen̄ kiban̄ obobolo kubọk ebi ìnanan̄a ikeke me ilaak. Ema eneniriọọn̄ ibe ke ogwu enerieen̄ ya ìre Jisọs me lek kan̄. Mgbọ yaage Jisọs onininiin̄ ichep me chieen̄ kiban̄. 32 Ema ekekibubeek, mè ikitumu ibe, “Chei, eji mîkpọ si ubọk ikọ îkitumu me oniin̄ ya okpọkpọ ikiyok eji ukan̄ me ejit otutuuk mgbọ îkikpa inu egebe me Ikpa Mbuban iwele inyi eji.”
33 Mgbọ yaage, ema enanan̄a ikeke, mè igwu ikom ije ifo Jeruselem. Mgbọ ema erebe uwu ema ekititiin̄, ema esisi imun̄ akọp mè ebi otuchieen̄ ge kè Jisọs, mè ebi ofifi ife etitiin̄be. 34 Ebi otuchieen̄ cha enenitumu inyi ema ene iba cha ibe, me atikọ, ke Okaan̄-ene îjomo me mkpa, mè isibi ichichini melek Saimọn. 35 Ebirieen̄ iba cha enenikpa inu òrọrọ me oniin̄ ije kiban̄, mè ubọk ema esabe ikọt iniriọọn̄ Okaan̄-ene Jisọs mgbọ îgwakabe fituru itap ema me ubọk.
Jisọs îsibi me isi ebi udun̄ kan̄
36 Mgbọ ene iba cha ekikpa ukpatu ya me otu, Jisọs me lek kan̄ okakana isibi mgbọ yaage, mè ikeke me etete otutuuk kiban̄, mè ibe ema, “Esuuk ikup inyi enyi!” 37 Ema eririki. Ukpook otetet si ema, mije, ema ekikeek ibe ke îre ekwukwu. 38 Jisọs onenido ema ibe, “Keke orọ ukpook itet enyi? Ìre keke orọ ejit kinyi ikup iba iba ikeyi? 39 Ìkpọ ubọk iba n̄a, mè ìkpọ ukot iba n̄a, mè ìriọọn̄ ibe ke îre emi me atikọ! Ìna ìnichak emi ubọk me lek, mè ìriọọn̄ ibe ke emi ǹkare ekwukwu, mije, emi nkaan̄ akpalek. Ire, ekwukwu ìkakikaan̄ akpalek mè ukwuuk kubọk enyi emun̄be emi nkaan̄be.”
40 Mgbọ ìkitumu ikọ ya inyi ema, ikakana akajit ubọk iba kan̄ ijeen̄ ema, mè ijeen̄ si ema ukot iba kan̄. 41 Ire, ema kpekọt ichieek si ibe ke îre ọmọ, mije, imumun̄ ọmọ ema emun̄be îke ema chieen̄ enenen, mè irọ si mè unwọọn̄ ijot ema ejit. Ubọk ema ekakọtge ìchieek, Jisọs ododo ema ibe, “Ìre enyi mîkaan̄ inorie me ere yi?” 42 Ema efọfọọk ibe, “Iin̄,” mè isi isa okpọkọ irin̄ ewọwọp ijet ọmọ. 43 Ibọbọkọ irin̄ ya, mè itaka me isi otutuuk kiban̄.
44 Mgbọ îtakabe isan̄a, inenitumu inyi ema ibe, “Ìkpọ, inu cha ntumube inyi enyi mgbọ nkupbe melek kinyi ire echi òkinirọ iso. Me mgbọ ya, ntumu inyi enyi ibe ke otutuuk inu egebe ofolek n̄a me emen Ikpa Ikan kè Mosis, mè emen ikpa ebi nriran, mè emen ikpa Okwa Itọn̄ ìkpolọlọ irọrọ iso.”
45 Jisọs onenichili ema ejit, inyi ema ekọt etet ibot me lek inu egebe me emen Ikpa Mbuban. 46 Inenitumu inyi ema ibe, “Ege me Ikpa Mbuban ibe ke Karais ya, (òrere ogwu Awaji otọkọbe aran̄ me ibot ya) mômun̄ owuwa ufialek, mè ikwu, mè ijomo me mkpa me òso egwe ita. 47 Mîge si me Ikpa Mbuban ibe ke mêkisa me erieen̄ kan̄ ilook ata etip, ibene me Jeruselem isi ire otutuuk ido geelek me linyọn̄, ibe mè ebi ene egwu ekom, inyi Awaji itele ijo kiban̄ inyi ema. 48 Mije enyi emun̄be otutuuk inu chi orọbe iso, enyi ìre ebi ata-ikọ. 49 Mgbọ yi, emi me lek n̄a mâria uche eyi Nte n̄a ochieekbe me use ijet enyi. Eya orọ, ìkup me Jeruselem mege ire mgbọ Awaji môriabe unye ya inan̄a me emen inyọn̄ ijet enyi.”
Jisọs înene ifo emen inyọn̄
(Mak 16:19-20; Ikwaan̄ 1:9-11)
50 Jisọs onenisa ebi udun̄ kan̄ cha ije isibi me Jeruselem ifo agan̄ ama Betani, mè ibene ubọk iba kan̄ ifo inyọn̄, mè ikigbana ema. 51 Òkigbana ema me ubọk, inanan̄a itele ema, mè inene ifo emen inyọn̄. 52 Ema etọtọbọ ebum inyi ọmọ me ere ya, mè isa me ikpele unwọọn̄ igwu ikom ika inu Jeruselem. 53 Bene me mgbọ ya fo isi, ema ekpọkpọ ikisi ikup me Uwu Mbuban ikitọn̄ Awaji.