22
Judas îchieek ileleke Jisọs
(Mat 26:1-5; Mak 14:1-2; Jọn 11:45-53)
1 Mgbọ ijọk Fituru Kpunu Olat, eyi ekigwen si ijọk Iraraka, okigbet, 2 ebi ibot ngwugwa, mè ebi ìjeen̄ Ikan enenikitọt ike ema ebesa ikọt itet Jisọs ikpan̄, mè ebi ene ekatap okput, mije, ema ekifieek owot me lek ebi ene. 3 Yọk oneninin̄ emen kè Judas ogwu ekigwen Isikariọt, ene ge me lek akọp mè ebi otuchieen̄ iba kè Jisọs. 4 Judas onenije isi lek ebi ibot ngwugwa cha, mè ebi ibot ebi ìkibem Uwu Mbuban, mè isi itọt melek kiban̄ ibe ke ọmọ môkọt ileke Jisọs inyi ebibi. 5 Ife cha ebebele ejit, mè ichieek ibe, ire ikọt ileke Jisọs inyi ema, ke ema mêkpe ogwugwu ikpoko. 6 Judas ochechieek, mè ibene ikiweek mgbọ ere mônọọn̄be, inyi ọmọ ileke Jisọs inyi ife cha, mè ebi ene ekariọọn̄.
Jisọs mè ebi udun̄ kan̄ mîrie inorie ijọk Iraraka
(Mat 26:17-30; Mak 14:22-26)
7 Inenire usen ekirie ijọk Fituru Kpunu Olat me lek, òrere usen ekikpan̄ arọọn̄ ebesa irie ijọk Iraraka. 8 Jisọs oraria Pita mè Jọn ibe esi enen̄e ere esun̄, mè ema enerie ijọk Iraraka eyi kiban̄.
9 Ema enenido Jisọs ibe mè ìre ere owa ke îweek ibe ema esi erọ inorie ya?
10 Jisọs onenitumu inyi ema ibe, “Enyi isikije inin̄ emen ama, ogwu enerieen̄ ge òben ugọn̄ mudim môchichini enyi me oniin̄. Ìgọọk ogwu enerieen̄ ya ìsi uwu geelek ìbonin̄, 11 mè ìtumu ìnyi ogwukaan̄ uwu ya ibe ke ogwu Ijejeen̄ ìbe mè ìre mọmọ uwu ebi ichen, ere ọmọ mè ebi udun̄ kan̄ ebenikup irie inorie ijọk Iraraka? 12 Mgbọ yaage, ogwukaan̄ uwu ya môsa enyi inene ifo agan̄ inyọn̄ isi ijeen̄ agwut ge ebalabe ijaan̄ me lek uwu ya. Ìrọ inorie ya me ere ya.”
13 Ema enanan̄a ije, mè isi imun̄ otutuuk inu cha geelek kubọk Jisọs otumube inyi ema. Me ere ya ke ema erọ inorie ijọk Iraraka ya isun̄.
14 Jisọs mè ebi otuchieen̄ kan̄ enenire uwu ya, mè ikweek ikana me lek ikasi inorie ya mgbọ mgbọ ya okembe. 15 Jisọs otutumu inyi ebi udun̄ kan̄ ibe, “Îlọk emi enenen irerie inorie ijọk Iraraka keyi melek kinyi sabum mbanin̄ emen ufialek. 16 Mije, me atikọ, emi m̀kpayaka irie inorie yi mege ire mgbọ mêrọbe ijọk yi ijot me mkpulu eyi Awaji.”
17 Jisọs onenibene ekpen̄ miin̄ ijọk ya, mè inyi Awaji itọn̄, mè ibe ema, “Ìbọkọ miin̄ yi ìche ìnyi lek kinyi. 18 Me atikọ, emi m̀kpayaka inwọ miin̄ ònan̄a me lek gerep ofifi mege ire mgbọ mkpulu eyi Awaji mônube.”
19 Inenimọnọ si fituru, mè inyi Awaji itọn̄, mè igwaka, mè isa inyi ema, mè itumu inyi ema ibe, “Eyi ìre akpalek n̄a eyi esabe igwa ngwugwa mije kinyi. Ìkirọ ikeyi ìsa ìkikeek emi.”
20 Mgbọ ema eriebe inorie ya isan̄a, Jisọs okpọkpọk iben ekpen̄ miin̄ ya inyi ema, mè ibe, “Miin̄ keyi ìre ayaya inyan̄a-ibot eyi esabe eje n̄a, eyi ebegwook me ijọn̄ mije kinyi, isa irọ. 21 Ire, ìkpọ, ogwu òboleke emi inyi ekpan̄ òwa me lek ikasi yi ogọọkbe emi igbaan̄ ikweek ikirie inorie. 22 Me atikọ, Gwun̄ Ebilene môkwu mkpa kubọk Awaji odọmọbe isun̄. Ire, môfieek inyi ogwu keya òboleke ọmọ inyi ekpan̄.”
23 Ema ebebene ikidido lek kiban̄ ibe mè ìre ekene me etete kiban̄ obokat ejit ikitọt ojelek inu òkup ikeyi?
Ifan̄a ofolek ogwu òmimin ichit
24 Ebi udun̄ kè Jisọs ebebene ikiwut ifan̄a me lek kiban̄ iweek irọriọọn̄ ogwu ebi ene ekimọnọ kubọk ogwu òmimin ichit me etete kiban̄. 25 Jisọs onenitumu inyi ema ibe, “Ebi ubọọn̄ ìkikpulu ido ebi ekarege ebi Ju ekisa unye ubọk ikpulu ebi ìkup me irak kiban̄. Ebi ema ekikpulu cha mîra ikisiki ibot inyi ema, mè ike ema erieen̄ ikigwen ema ‘Ebi ìrọ nnwọn.’ 26 Ire, ìkpokup ikeyi me etete kinyi. Kpan̄asi ikeya, ogwu òmimin ichit me etete kinyi ìbokup kubọk ogwu òsisip ichit. Ogwu geelek òrere ogwu ibot si môkup kubọk gwun̄ uwu. 27 Ǹdo enyi nu, ogwu òkwekweek me lek ikasi mè ekebeben inorie eneyik enyi irie, mè ogwu òkibeben inorie ijet ene ya me lek ikasi, ìre ekene omin igak ekene? Me atikọ, îre ogwu òkwekweek me lek ikasi mè ekebeben inorie eneyik enyi omin igak ogwu òkibeben inorie iniyik me inyọn̄ ikasi. Ire, emi ǹkup me etete kinyi kubọk ogwu òkibeben inorie iniyik me inyọn̄ ikasi. 28 Mgbọ nkupbe me emen ufialek, enyi ere ebi ìkekeke melek n̄a. 29 Mgbọ keyi, nkana ibot mkpulu itap enyi me ubọk kubọk Nte n̄a okanabe ibot mkpulu itap emi me ubọk si. 30 Sa me ikeyi, enyi mêkọt igọọk emi isiki ikweek me lek ikasi ijọk ikirie mè ikinwọ me emen mkpulu n̄a, mè isiki ikweek irek si me inyọn̄ ogboon̄ ubọọn̄ ikikpulu akọp mè otoko iba ebi Ijeren.”
31 Ikọ ya itata Jisọs me otu, itutumu inyi Saimọn Pita ibe, “Saimọn! Saimọn! Kpọ, Yọk îbọkọ unye inenigen̄ enyi kubọk ekigen̄ mfufe isan̄a me lek akpa. 32 Ire, nriaak uriaak me ibot kwun̄, inyi ichechieek kwun̄ ikatele owu. Ikaan̄ mgbọ osiyaka igwu ikom ika igọọk emi, tap efuuk me owot bọn Nte kwun̄, inyi ema ekeke enye me ichechieek kiban̄.”
33 Pita ofọfọọk Jisọs ibe, “Okaan̄-ene, ubọk geelek ìbore, emi mbem lek igọgọọk owu ije isi ire okputut. Ìsibi mkpọn, mâgọọk owu isi. Ìrere mkpa, mâgọọk owu ikwu.”
34 Jisọs ofọfọọk ọmọ ibe, “Pita, ǹkitumu inyi owu ibe, sabum unọn obokpọk me eririeen̄ chereyi, owu môjit emi mgbọ ita, mè ibe ke owu òkariọọn̄ ogwu emi nrebe.”
35 Jisọs onenido ebi udun̄ kan̄ ibe, “Mgbọ nriabe enyi isibi ibe enyi esi elook ata etip, mè ibe enyi ekamọnọ akpa ikpoko, ekamọnọ akpa ubọk, ekamọnọ si ikpukot geege ìkaan̄ me ubọk, ìre îkaan̄ inu ònanan enyi me oniin̄ ije ya?”
Ema efọfọọk ibe in̄-in̄, ke kpunu inu geege ònanan ema mgbọ ya.
36 Jisọs otutumu inyi ema ibe, “Mgbọ keyi, ogwu ikaan̄ akpa ikpoko, imọnọ ikaan̄ me ubọk, mè imọnọ si akpa ubọk. Ikaan̄ ogwu ikakaan̄ge oge akọn̄, inyam ofọnti inyọn̄ kan̄, mè isa ikpoko ya isi ilep oge akọn̄. 37 Mije, ege me Ikpa Mbuban ibe, ‘Mîfuk ọmọ itap me otu ifuk ebi ijo.’a Me atikọ, inu yi ìborọrọ iso me ugwem n̄a. Iin̄, otutuuk inu geelek egebe ibak emi me Ikpa Mbuban môrọ iso ubọk egebe.”
38 Ebi udun̄ kan̄ enenitumu inyi ọmọ ibe, “Okaan̄-ene, kpọ, oge akọn̄ iba ire echi.”
Jisọs ofọfọọk ibe, “Ikup ikeya!”
Jisọs îriaak uriaak me inyọn̄ ogoon̄ Olifu
(Mat 26:36-46; Mak 14:32-42)
39 Jisọs oneninan̄a isibi me Jeruselem, mè ije ifo inyọn̄ ogoon̄ Olifu, ubọk îkiwuuk lek irọ, ọmọ mè ebi udun̄ kan̄. 40 Mgbọ îrebe ere ya, itutumu inyi ebi udun̄ kan̄ ibe, “Ìriaak uriaak, inyi enyi ekarọn̄ ìnin̄ emen ntọ-mkpọ.” 41 Mgbọ îtumube ikọ ya isan̄a, ijeje ida ibọkọ me lek kiban̄, mè itọbọ ekpe me ijọn̄, mè ikiriaak uriaak ibe, 42 “Nte n̄a, ire ineme owu, ben ekpen̄ ufialek yi san̄a emi me lek. Ire, ìkare me nkeek eyi n̄a. Nkeek eyi kwun̄ irọ iso.” 43 Ogwu osat Awaji ge onanan̄a me emen inyọn̄ inu initap ọmọ efuuk me owot me ere ya. 44 Mije ikpele ufieek-owot eyi ufialek cha okemebe ọmọ, ikekiriaak uriaak unye unye. Uyok òkisibi ọmọ me lek okekirọn̄ọ igwook me ijọn̄ kubọk eje.
45 Mgbọ Jisọs onan̄abe ikeke me uriaak ya, mè ije isi lek ebi udun̄ kan̄, isisi imun̄ ema ewọbe, mè ilaak inwọnọ, mije ufieejit. 46 Idodo ema ibe, “Ìre keke orọ enyi ekilaak ikeyi? Ìnan̄a ìkeke, mè ìriaak uriaak, inyi enyi ekarọn̄ ìnin̄ emen ntọ-mkpọ.”
Mîtet Jisọs
(Mat 26:47-56; Mak 14:43-50; Jọn 18:3-11)
47 Jisọs òkitutumu ikọ ya me otu, urum ebi ene enunu me ere ya. Ene ge me etete ebi udun̄ kan̄ ogwu ekigwen Judas oje me isi ife cha, mè ikisa ema inu. Judas onenije inin̄ lek kè Jisọs ibosi ikat ọmọ. 48 Jisọs ododo ọmọ ibe, “Judas, ìre òbonisa ikakat ene ileke Gwun̄ Ebilene inyi ekpan̄?”
49 Mgbọ ebi udun̄ kè Jisọs emun̄be inu òborọ ogwu nte uwu kiban̄ me ere ya, ema edodo Jisọs ibe, “Okaan̄-ene, ìre eji ewọọk oge akọn̄ kiji esa ekep ife chi?” 50 Mgbọ yaage, ene ge me lek kiban̄ otataba oge akọn̄ kan̄ isibi, mè isa ikep ogwu usun̄ ogwu òban Awaji, mè ifieek utọn̄ kan̄ agan̄ ulom isan̄a. 51 Ire, Jisọs ogagana inyi ema ibe, “Ikup ikeya!” Itutumu ikeya, itotoon̄ ubọk me agba isi ene ya, utọn̄ kan̄ oyayaka ikup ubọk îkupbe me adasi mgbọ.
52 Jisọs onenido ebi ibot ngwugwa, mè ebi ibot ebi ìkibem Uwu Mbuban mè ebi ugane ama cha ebi ìnunu ibenitet ọmọ ibe, “Ìre emi ǹkitap wọlọwọlọ me ama, eyi enyi ekaan̄be oge akọn̄ mè m̀gbele me ubọk isa inu ikeyi ibenitet emi? 53 Ke emi melek kinyi ekititiin̄ me Uwu Mbuban usen geelek, enyi kpetet emi. Ire, mgbọ kinyi ire eyi, mgbọ Yọk ogwu ibot udun okikpulu.”
Pita îjit Jisọs
54 Ife cha etetet Jisọs, mè isa ije isi uwu ogwu òban Awaji. Pita okekije me ujọn̄ọ ere ikigọọk ema me udun̄. 55 Mîsọk ukan̄ me eden̄ oyet egep ya. Mgbọ Pita orebe oyet egep ya, igọgọọk isi ikup me ere ya ikigwele ukan̄ ya. 56 Ogwu usun̄ enenwaan̄ ge omumun̄ Pita okupbe me ere ya ikigọọk igwele ukan̄, mè igwuun̄ chieen̄ ikpọ Pita, mè iriọọn̄ ọmọ isi, mè itumu me ere ya ibe, “Ogwu enerieen̄ yi òwa me lek ebi ìkigọọk Jisọs ije.”
57 Ire, Pita okakan̄, mè itumu inyi gwun̄ enenwaan̄ ya ibe, “Ogwu enenwaan̄, ǹkariọọn̄ ogwu enerieen̄ ya!”
58 Sọnja mgbọ iraraka, ofifi ene omumun̄ Pita, mè itumu inyi ibe, “Owu si ìre ene ge me lek ebi ife cha!”
Pita obebe ene ya, “Ogwu enerieen̄, ìkare emi!”
59 Inu òbet lek mbubak mgbọ ge iraraka, ofifi ene omumun̄ Pita, mè itumu ibe, “Me atikọ, ene yi ìkpolọlọ irere ene ge me lek ebi ìkigọọk Jisọs, mije, ene yi ìre ogwu Galili.”
60 Pita ofọfọọk ibe, “Ogwu enerieen̄, ǹkariọọn̄ inu owu okitumu ikọ ibak.” Ikọ ya ìkatata Pita me otu, unọn okpọkpọk. 61 Mgbọ yaage, Okaan̄-ene okakana chieen̄, mè ikpọ Pita siì. Pita onenisi ikeek ikọ Okaan̄-ene otumube inyi ọmọ ibe, sabum unọn obosan̄a amọn me eririeen̄ cherekeyi, ke owu môjit ọmọ mgbọ ita. 62 Mgbọ yaage, Pita onanan̄a me oyet egep ya ije isibi, mè ibene ito ujat ito.
Ebi akọn̄ mîrọ Jisọs inu esip
(Mat 26:67-68; Mak 14:65)
63 Ebirieen̄ ebi ìkibem Jisọs ebebene ikirọ ọmọ inu ochak, mè ikisut ọmọ, 64 mè ibọp ọmọ chieen̄ ichit, mè ikibe ọmọ, “Ben nriran, mè bak-nu mè ìre ekene osulu owu!” 65 Ife cha mîtumu si owuwa ikọ unyechieen̄ inyi Jisọs.
Mîsa Jisọs isi isi ebi Oru
(Mat 26:59-66; Mak 14:55-64; Jọn 18:19-24)
66 Me ewelegwe kan̄, Oru ebi Ju oninin̄. Otutuuk ebi ibot ngwugwa, mè ebi ìjeen̄ Ikan, mè ebi ugane ama enenititiin̄. Enenisa Jisọs inu me isi kiban̄. 67 Ebi Oru cha enenitumu inyi Jisọs ibe, “Ire owu ore ogwu Awaji otọkọbe aran̄ me ibot ya, tumu nyi eji!”
Jisọs ofọfọọk ema ibe, “Ire ntumu inyi enyi, enyi kpebechieek. 68 Ire nyaka idodo enyi ikọ, enyi kpebechieek ifọfọọk. 69 Ire, bene me mgbọ keyi, Gwun̄ Ebilene môkweek irek me agan̄ ubọk ulom Awaji Ogwu Òkaan̄ Unye Geelek.”
70 Otutuuk ebi ife cha edodo ọmọ ibe, “Ire ikeya, ìre owu ore Gwun̄ Awaji ya?”
Jisọs ofọfọọk ema ibe, “Iin̄, enyi mîtumu itat ibe ke emi nre Gwun̄ Awaji ya.”
71 Ife cha ebebe, “Ire ikeya, ìre kpasi ofifi ata-ikọ ke eji eyaka ikiweek? Eji mîsa utọn̄ kiji inọ ikọ ònan̄a me otu kan̄ gaalek!”