8
Jisọs îgwa ogwu orukan̄ inyakpa
1 Mgbọ Jisọs onan̄abe me inyọn̄ ogoon̄ ya isibi, owuwa ebi ene egbugbuku ikigọọk ọmọ me udun̄. 2 Ogwu orukan̄ inyakpa ge ojeje inu, mè initọbọ ekpe me isi kan̄, mè ibe ọmọ, “Okaan̄-ene, ire ineme owu, owu môkọt igwa emi, inyi emi ǹtana.”
3 Jisọs onyanyana ubọk kan̄ ichak ogwu orukan̄ ya me lek, mè itumu inyi ibe, “Îneme emi, lek kwun̄ inye!” Mgbọ yaage, orukan̄ inyakpa ya otata isan̄a kpai, ọmọ otatana. 4 Jisọs otutumu inyi ọmọ ibe, “Kakpa inu yi òrọrọ ìnyi ene geege. Ire, sa lek kwun̄ si jeen̄ ogwu ngwugwa, mè gwa ngwugwa ike Mosis onyibe me Ikan ibe ene geelek egwabe inyakpa isan̄a me lek igwa,a inyi ebi ene esa eriọọn̄ ibe ke owu otana.”
Ichechieek ogwu ibot
5 Jisọs oneninan̄a ije isi ama Kapanọm. Mgbọ înin̄be emen ama ya, ogwu ibot akọn̄ ge onunu me lek kan̄ iniweek ntap-ubọk, 6 mè ibe ọmọ, “Soso Okaan̄-ene, îkaan̄ gwun̄ uwu n̄a ge òkifiak orukan̄ ngọm. Ọmọ me uwu olaakbe, ìkakọt ibene lek, mije, orukan̄ ya îfiak ọmọ enenen.” 7 Jisọs onenichieek ogwu ene ya use ibe ke ọmọ mônu inigwa ogwu gwun̄ uwu ya.
8 Ogwu ibot akọn̄ ya otutumu inyi Jisọs ibe, “Okaan̄-ene, emi ǹkagbe ogwu owu obonin̄ uwu kan̄. Keke me ere keyi tumu ikọ, ke lek gwun̄ uwu n̄a ya mônye. 9 Mije, emi ìre ogwu akọn̄ òkup me irak ofifi ebi akọn̄ ebi ìbebene igak emi. Îkaan̄ si ebi ìkukup emi me irak. Ire nnyi ida ibe ene ge me lek ebi ìkup me irak n̄a, ‘Je,’ ene ya ìkaan̄ ijeje. Nsiyaka inyi ida ibe ofifi ene, ‘Na,’ ogwa ìkaan̄ inunu. Nsibe gwun̄ uwu n̄a, ‘Rọ ikeyi,’ ìborọrọ.”
10 Ikọ ogwu ibot akọn̄ ya otumube okeke Jisọs chieen̄ enenen. Jisọs otutumu inyi ebi ìkigbuku igọọk ọmọ me udun̄ cha ibe, “Me atikọ, ǹkitumu inyi enyi ibe ke ǹkararak ìmun̄ ene geege òkakaan̄ ojelek ikpele ichechieek òkup ikeyi me Ijeren. 11 Eya orọ, ǹkitumu inyi enyi ibe ke owuwa ebi ekarege ebi Ijeren mênan̄a me agan̄ mbum-ura, mè agan̄ ichep-ura inu inigọọk Ebereyam mè Ajiki mè Jekọp isiki ikweek ikirie ijọk me mkpulu emen inyọn̄. 12 Ire, ebi ekikpọ chieen̄ ibe ke ema ebekup me mkpulu emen inyọn̄, ebiba ke ebelap isibi igwook me emen udun. Me ere ya ke ema ebekup ikitaan̄ ukpo ito ito, mè ikitaka ejeek.”
13 Jisọs onenitumu inyi ogwu ibot akọn̄ ya ibe, “Je fo, ke mêrọ inyi owu ike owu ochieekbe.”
Me ike mgbọ yaage si, lek gwun̄ uwu ogwu ibot akọn̄ ya onyenye.
Jisọs îgwa owuwa ebi orukan̄
14 Jisọs oneninan̄a me ere ya ije isi uwu kè Pita, mè imun̄ nga nwa kè Pita olaakbe me inyọn̄ mkpilaak. Ukan̄ îbak me lek. 15 Jisọs ochachak ọmọ ubọk me lek, ukan̄ ya otetele ọmọ. Inanan̄a ikeke, mè isi irọ inorie inyi ema.
16 Me otu ikakwun̄ usen ya, ebi ene ekpukpulu owuwa ebi ijo erumun̄ okupbe me emen ijet Jisọs. Jisọs otutumu otu ikọ ge, otutuuk ijo erumun̄ cha esisibi isan̄a me emen ebi ife cha. Igwagwa si otutuuk ebi orukan̄ geelek ìnunu me lek kan̄. 17 Inu chi Jisọs orọbe îrọ iso ikọ Awaji otumube inan̄a me otu kè Asaya ogwu nriran ibe,
“Ọmọ gaalek obeme ufiak kiji,
mè ibeme otutuuk orukan̄ kiji inyi eji.”b
Inu igọgọọk Jisọs okibọkọ
18 Mgbọ Jisọs omun̄be ogbogbo ebi ene cha ìkekeke ikana ọmọ, itutumu inyi ebi udun̄ kan̄ ibe, “Eji enesaba okwaan̄ yi esi agan̄ keyilọ.”
19 Ogwu òjeen̄ Ikan ge ojeje inu me lek kan̄, mè ibe ọmọ, “Ogwu Ijejeen̄, emi mâgọọk owu ijijen̄e isi ere geelek obosi.”
20 Jisọs ofọfọọk ọmọ ibe, “Ekpuuruk îkaan̄ udọn̄ ere îkiluk, unọn òwulu me inyọn̄ îkaan̄ si uwu ere îkiluk. Ire, emi Gwun̄ Ebilene ǹkakaan̄ ere nkiyaka ibot imaan̄.”
21 Ene ge me lek ebi ìkigbọọk igọọk ọmọ me udun̄ onenibe ọmọ, “Okaan̄-ene, emi mâgọọk owu ije. Ire, tele mè ǹdasi ǹsi m̀fuun̄ nte n̄a sabum, ǹnengọọk owu.”
22 Jisọs obebe ọmọ, “Na, na gọọk emi, mè tele mè ebi kpekaan̄ ugwem ikakaan̄ge itata efuun̄ ebi kiban̄ ìkwukwu.”
Jisọs îrọ inyi egwijo iwọ
23 Jisọs oneninin̄ emen uji, ọmọ mè ebi udun̄ kan̄, ema ebebene ikikọp isaba okwaan̄ oyô ya. 24 Ema mêkikọp me inyọn̄ isi mun̄ ya, egwijo okpọkpọ ibene me ekakpọge chieen̄. Egwijo ya îwut inye enenen me isi mun̄ ya, ekoon̄ obebene ikitap mun̄ me uji kiban̄ ya. Ire, ike mgbọ ya, Jisọs ìkilalaak. 25 Ebi udun̄ kan̄ esisi itimi ọmọ, mè ibe ọmọ, “Okaan̄-ene, nyan̄a eji! Eji mênichieen̄ ita me okwaan̄.”
26 Jisọs obebe ema, “Ìre keke orọ ukpook okitet enyi ikeyi? Enyi ebi sọntiik ichechieek kechi!” Ineninan̄a ikeke, mè igana ere inyi unye efet egwijo ya melek ekoon̄ cha, ema ewọwọ, isi mun̄ olọlọkọ.
27 Inu ya okeke ebi udun̄ kan̄ chieen̄ enenen. Ema ebebene ikidido lek kiban̄ ibe, “Ìre kpasi ene ire ogwu, ogwu efet mè okwaan̄ okigban̄ utọn̄ inyi?”
Jisọs îlap ijo erumun̄ isibi me emen ene iba
28 Jisọs mè ebi udun̄ kan̄ enenisaba okwaan̄ ya itoon̄ me agan̄ ebi Gadara elukbe. Mgbọ ema erebe ere ya, ene iba ijo erumun̄ okisisaak enanan̄a me oron ekwukwu isibi inichichini ọmọ. Mije ebi ife chi ekirọ inu afa afa, ebi ene kpeyaka ikọt ikije iraka me ere ya. 29 Ema imumun̄ Jisọs, ema ebebene ikitaan̄ ukpo ibe, “Owu Gwun̄ Awaji, ìre keke ke okiweek me lek kiji? Ìre òbonu inisisaak eji mgbọ keyi me mgbọ mgbọ ikakemge-nu?”
30 Îkaan̄ ikpele urum okodi òkukup igbet ere ya ikirie urie. 31 Ijo erumun̄ cha eneniriaak Jisọs ibe, “Ire obolap eji isibi me emen ife chi, lap eji tap me emen urum okodi chilọ.”
32 Jisọs ogagana inyi ema ibe, “Ìnan̄a ìsibi!” Ema enanan̄a me emen ife cha isibi, mè ikana isi inin̄ emen okodi cha. Otutuuk urum okodi ya olilibi ikwala isibi agba ogoon̄ ya, mè igbuku igwook me okwaan̄, mè ikwaan̄ ita. 33 Ebi ìkikpukpo okodi cha elilibi inin̄ emen ama, mè isi ilook ebi ene inu òrọrọ me lek okodi kiban̄, mè inu òrọrọ me lek ebirieen̄ iba cha ijo erumun̄ okupbe me emen. 34 Ebi ama ya egbugbuku isibi inu inichichini Jisọs me ere ya. Mgbọ ema emun̄be ọmọ, ema ebebene ikiriaak Jisọs ibe inan̄a isibi me inyọn̄ ijọn̄ kiban̄.