Lúkɩ 13

Ɖíɖééri ɖɩ́kpɛ́nɖɩ́ kókoó múkú

Ɖá sáatɩ nɩ́ binyii bɩbá ka ɖáa tam Yeésu ɖéé Piláatɩ káá ku Galiléetɩɩbɩ sáatɩ waa báa ɖéé yáá Mwáátáá saráa yɛ. 2 Yeésu ŋ́ka kɩ́ɩ́ bɩ naa: «Nɩ maatɩɩ́ náá Galiléetɩɩbɩ má la sá ɩ́kpɩ́ɩ́ ɩ́takpéráámɩ ɖa po Galilée tɩɩbɩ ba ké yɛ, yɩ́ɩ́ bó nɩ́ ba yá bɩ ɖée? 3 Aayɩ́, ń soo nɩ. Amá ná kpɛ́nɩ́ náá níɖééri, nɩ bɩ́ɩ́ kpó nɩ́ kɔ́kɔ́ ɖée bɩ́ɩ́ yɛ. 4 Nɩ ayi pwí nɩ anyii baa bo silowée wáá bísa káa lú kɩ ku yɛ, nɩ maatɩɩ́ náá bɩ tɩ́nɩɩ la yá ɩ́kpɩ́ɩ́ kɩ pó Yerúsalɛ́ɛmɩ wáá binyii ba ké yɛ? 5 Aayɩ́, ń soo nɩ. Amá ná kpɛ́nɩ́ náá níɖééri nɩ bɩ́ɩ́ kpó nɩ kɔ́kɔ́ ɖéé bɩ́ɩ́ yɛ.

Bʊ́káŋká wá na maa yɛ wáá ɖɩkɛɛsɛɛ

6 Nɩ́ wá kɛɛsɛɛ ɖɩkɛɛsɛɛrɩ nɛńɖɛ mɛ́tɛ́: «Unyii ʊbá la fúú bʊ́káŋká ʊ́wáá fiínyɩ wáá kʊ́saa pooni. Nɩ wa ɖáa co naa ʊ bɔɔ́ bʊ́wáá ábí, amá waá ká ŋɩ. 7 Nɩ wá soó wa kpɛɛ́ fíínyi wáá kʊ́saa yɛ náá: "kpaá náá! Ábé ata sɔ, máa ɖaa naa ńbɔɔ ábí bʊ́káŋká nɛɛ́wʊ bo, nɩ ma ná ka. Cutí bʊ. Batɩɩ bo nɩ́ ba bɩ́ɩ́ fɔɔ ɖɩtɛntɛɛrɩ káa fɔ́ɔ́sɩɩ?" 8 Wa kpɛɛ́ fíínyi saakʊ yɛ ŋ́ka kɩ́ɩ́ wʊ naa: "Mɩ́ɖáá, kpéé canɩ́ bʊ ɖíbé nɛńɖɛ; ń bɩ́ɩ sɔ bʊ pɔɔ́ kɩ logópwá ka kɩ́ tɔ́ tíɖaábabé. 9 Ɖaá bɛ́ɛ́ náá ńnyimíŋ bó, bʊ bɩ́ɩ́ maa ábí; ká sá náá ɖée ɩ́ canɩ́ bɩ cutí bʊ".»

Yeésu cɛ́ɛ́tɛ úpé ʊwɛntɛ ʊbá ɖiwonɖi wɩɩŋʊ

10 Yeésu la ɖéé mii ɖícíŋííríɖííku kʊbá pooni, ɖiwonɖi wɩɩŋʊ. 11 Ɖa ké náá úpé ʊbá la ɖé líbó, waa kɩ́nɛ́ɛ́ kɩ́kpɩ́ŋkpɩ́ɩ́kɩ káá kɔ́ kɩ kpɛ́nɩ wʊ ʊwɛntɛ ábé pwí nɩ anyii (18) sɔ ; ʊ la tɩ́nɩɩ pɔ́rɛ ká tɩ́ barɩ́ fété ʊ́ tóŋóó ʊ́bá 12 Sáatɩ waa Yeésu káa ká úpé má yɛ, nɩ́ wa yíí wʊ nɩ kɩ́ wɛ́ɛ́ wʊ naa: úpé sɩ́wáá ɩ́wɛɛ cɛ́ɛ́tɛ. 13 Nɩ́ wá páá úbó ʊ́ŋálɩ́ŋ, líbó-líbó nɩ́ wá tóŋoo ʊ́bá nɩ́ kɩ́ ɖé nyɔ́ḿ Mwáátáá. 14 Amá ɖa cáárɩɩ ɖícíŋííríɖííku wáá úkpé ɖoómi Yeésu yá ɖɩ́cɛ́ɛ́tɛ́rɩ nɛńɖɛ ńwɩɩ ńwóŋgá ɖáárɩ, nɩ́ kɩ soó zamáa naa: ɩ́wɩɩ iloobe ɖé ŋaa pooni táa bɩ́ɩ́ yá ɖítóó yɛ; ɖáŋgɩɩ maá ɖáwáá ɩ́wɩɩ má bɩ cɛ́ɛ́tɛ́ nɩ́, ɖa tá sáá ɖiwonɖi wɩɩŋʊ! 15 Tɩ́ɖáá ŋ́ka kɩ́ɩ́ wʊ naa: «Mʊnááfikimɩ nɩ́ na sá, ɖiwonɖi wɩɩŋʊ, nɩ́ cíígá báa nɩ́ ʊ́lá sáátɩ́ɩ́ ʊ́wáá ʊ́ná kókoó ʊ́wáá aŋɔɔ́ ʊ́wáá ɖɩ́ŋmɔ́rɩ fém kɩ kpam wʊ ʊ́ tɩ nyɔ, náá lɛɛ? 16 Nɩ́ úpé nɛɛ́wʊ, wa sá Ibiraahím wáá ḿmaanɩ ka siitáánɩ sá, kɩ́ bá hálɩ ábé pwí nɩ anyii, ɖaá bɛ́nɩ naa bɩ́ sáátɩ wʊ ɖɩ́sárɩ́ nɛńɖɛ pooni ɖiwonɖi wɩɩŋʊ?» 17 Sáa waa wá ɖé kɩ lólóó ɖée yɛ, nɩ ɩ́fɛ́ ŋ́ka mɔ́ ʊ́wáá kʊ́bááráámɩ́, nɩ zamáa kɔ́kɔ́ ŋ́ka ɖé ḿmwáánɩ́ ɖoómi yaa kɔ́kɔ́ tɩ́nɩɩ ya nɩ́ wa yáá.

Tíkpé wáá ɖícíbíri ɖɩ́wááɖɩ wáá ɖɩkɛɛsɛɛrɩ

18 Yeésu ŋ́ka kpée wɛ́ɛ́ náá: «Batɩɩ nɩ́ Mwáátáá Bwɛ́ntɛ́ŋkɛ ŋ́ka nyɛ́? Batɩɩ nɩ́ ma bɩ́ɩ́ kɛɛsɛɛ nɩ? 19 Bɩ bɩ́ɩ́ kɛɛsɛɛ kɩ nɩ tíkpé wáá ɖícíbírí ɖɩ́wááɖɩ́ ɖáa unyii káa bɩ́ɩ́ gbá kɩ bwɛ́ ʊ́wáá káráánɩ, ɖɩ pɛ́, kɩ kpɛ́nɩ buci nɩ ínyímúúmu ŋ́ka yá bɩ́wáá ájé bʊ́wáá apa paa.

Kpɔ́nɔ́ nyɔ́ɔ́ŋʊ wáá ɖɩkɛɛsɛɛrɩ

20 Yeésu kpée wɛ́ɛ́ náá: batɩɩ nɩ́ má bɩ́ɩ́ kɛ́ɛ́sɛɛnɩ Mwáátáá Bwɛ́ɛ́tɛ́ŋkɛ? 21 Ʊ nyɛ́ kpɔ́nɔ́ nyɔ́ɔ́ŋʊ waa úpé ʊbá káa gba kɩ yoosii nɩ kpɔ́nɔ́ yoomɩ tɩ́maatɩɩŋgaa^a tɩta ka ɖa júú bʊ́saa má kɔ́kɔ́ yɛ.

Ḿbɔmbɔ ŋwa ná wa yɛ

22 Yeésu la gɛ́tɛ́ɛ́ íɖó nɩ íɖóbúúmú, nɩ́ kɩ mii nɩ ńsɛ́ kɩ pá Yerúsalɛ́ɛmɩ bó bó. 23 Ʊbá ŋ́ka barɩɩ wʊ naa: «Tɩ́ɖáá, ɖée ayaa pɔmɩ́ ń kɩ́ɩ́ bɩ́ɩ́ ká ɖɩpɛnɖɩ?» Nɩ́ wa kɩ́ɩ́ bɩ naa: 24 Tɔ́rɛ́ maá nɩ́bá kɩ kɔ́nɩ ḿbɔmbɔ ŋwa na wa yɛ. Ɖoómi ɖabata bɩ́ɩ́ bɔɔ náá bɩ́ kɔ́ káá fété.

25 Sáa waa Aɖííráá káa bɩ́ɩ́ fii nɩ kɩ pɩɩ ḿbɔmbɔ nɩ́ ɖa ké nɩ́ ɖíjípárɩ́ yɛ, nɩ́ bɩ́ɩ́ búri kɩ gaá abatálá nɩ kɩ gi naa: "Tɩ́ɖáá pɩɩtɩ́ tɩ́", ʊ bɩ́ɩ́ kɩ́ɩ́ nɩ́ náá: "Nɩmɩ, má nyí baa náa sá yɛ" 26 Líbó nɩ́ na bɩ́ɩ́ búri kɩ soó wʊ naa: "Tɩ nɩ sɩ ńjí kɩ nyu nɩ́ ɩ́ míni tɩ́wáá abembe átákpé bó. 27 Ʊ bɩ́ɩ́ kpéé wɛ́ɛ́ nɩ naa: "Nɩmɩ, má nyí baa naa sá yɛ; ɖatɩ́ maá nɩ mɩ nɩmɩ baa kɔ́kɔ́ yáá ɩ́kpɩ́ɩ́ yɛ". 28 Líbó nɩ́ na bɩ́ɩ́ wíi, kɩ ló anyii, sáa waa náa bɩ́ɩ́ ká Ibiraahím, Ɩsaáka, Yaakúbu nɩ anɖébimɩ kɔ́kɔ́ Mwáátáá bwɛ́ɛ́ntɛ́ŋkɛ pooni nɩ ɖáké bɩ́ jɛ nɩ ɖíjípárɩ́. 29 Binyii bɩ́ɩ́ ɖá nɩ ńwɩɩ nyɛ́nɖɛ nɩ ńwɩɩ lítíri bó, ńga nɩ ńjɩ́ɩ́ bó kɩ ɖáa karɩ tébéru nyɛ́ɛ́nɩ́ kɩ́ jé ɖíína Mwáátáá Bwɛ́tɛ́ŋkɛ pooni. 30 Nɩ́ ɖée nɩ́, ɖa kpɛ́ wáánɩmɩ binyii ba kóni kɩ bɩ́ɩ́ ɖáa sáá ba líí ńsɛ yɛ, nɩ́ kɩ kpɛ́ wáánɩmɩ binyii ba líí ńsɛ yɛ kɩ bɩ́ɩ́ ɖáa sáá ba kóni yɛ.

Yeésu nɩ́ Yerúsalɛ́ɛmɩ

31 Ɖá sáatɩ má, Farizíitɩɩbɩ bɩbá ŋ́ka ɖáa soó wʊ naa: fii ɩ́lɛ, có kɩ́ póótí fʊ́mbá ɖoómi Hérooɖɩ laá ʊ kpɔ sɩ. 32 Yeésu ŋ́ka kɩ́ɩ́ bɩ naa: «Co maá soó unyii wá pɩbɩ ɩ́mwamwaa ɖéé kɔlɔ-kɔlɔ naa: "N ji ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ nɩ kɩ yáa ɖɩ́cɛ́ɛ́tɛ́rɩ́ ɖílemi nɩ felemí nɩ́ ńwɩɩ ńtáárɩ́ɩ́ ɖáárɩ ń bɩ́ɩ́ tó ńtóóri». 33 Amá ɖa barɩɩ́ ńsɔ́ŋɔ́ɔ́ nɩ ńsɛm ɖílemi, félemí nɩ ńwɩɩ ŋwa bɩ́ɩ́ páá yɛ; ɖoómi ɖaá bɛ́nɩ naa anɖébi ʊbá ŋ́kpó fʊ́mba ɖabaḿ nɩ Yerúsalɛ́ɛmɩ.

34 Yerúsalɛ́ɛmɩ tɩɩbɩ, Yerúsalɛ́ɛmɩ tɩɩbɩ, nɩmɩ ba kuu anɖébimɩ yɛ nɩ́ kɩ́ tɔ́ɔ́ átá kɩ kuu báa Mwáátáá káa tóni nɩ́ yɛ! Mɩnyɔn ŋa nɩ má laá naa ńcíŋíí nɩ́ ɖée ʊ́kɔ́lɔ́ káa cigi ʊ́wáá ɩ́kɔ́búúmú ʊ́fɛmɩ pɔɔ́ yɛ! Amá ná laá. 35 Kpaá náá, Mwáátáá bɩ́ɩ́ canɩ́ nɩ nɩ níɖóŋu. Ń soo nɩ, náá tɩ́ ká mɩ́ hálɩ ɖá ɖáá sa nɩ sáa waa náa bɩ́ɩ́ wɛ́ɛ́ náá: «Ɖɩ́nyɔ́nɖɩ kɩ teé wá bɩ́ɩ́ ɖá nɩ Tɩ́ɖáá yííɖi bo yɛ!»