Lúkɩ i

Yeésu Kírísito wáá Laabáárʊ Ʊjɔjɔɔ waa

Lúuki

káa waa yɛ

Ńwɛ́ɛ́ ḿpɩɩtɩ́gá

Lɔ́kɩ́ta Lúuki, nɩ́ Mwáátáá ŋ́ka kpamɩ ʊ waa Laabáárʊ Ʊjɔjɔɔ ʊ́táárɩ́ɩ́. Útóóɖi sá mɩnyɔnlé: Laabáárʊ Ʊjɔjɔɔ nɩ́ Bítóó wáá Átóó. Ʊ míni ɖɩ́bɛ́ɛ́rɩ́ kɩ tam ka kɩ míní náá Mwáátáá gbanɩ Yeésu Nazarɛ́ɛtɩ yɔwʊ kɩ lɛɛ ʊ́wáá ɖɩpɛnɖɩ kɩ́ míni ɖúúlinya.

Lúuki búrí ʊ́wáá tákárɩɖá nɩ ńwɛ́ɛ́ ḿpɩ́ɩ́tɩ́gá fʊ́naa wáa lɛɛ yaa bo wáa waa yɛ kɩ míni. Ɖa bɔ́ɔ́nɩ́, ɖígé ɖíbúrígáá, míni Yʊwáanɩ nɩ Yeésu wáá tíbíyáátɩ́. Kɩ́nɛ́ɛ́ ɖacɩrɩ-cɩrɩ yɛkɛ gbanɩ Malááyɩ́kamɩ nɩ binyii kɩ canɩ tɩ́ bɛ́ɛ́ náá Yeésu sá Mwáátáá Japwa, Mesííya, Ʊpɛnlɩ, Tɩ́ɖáá. Ɖígé ɖílééríí, Yʊwáanɩ úlíísiili wáá ɖímínɖí pooni ʊ lɛɛ Yeésu wáá átóó kɩ́ míní. Útóóɖí búrínɩ Nazaarɛ́ɛtɩ wáá ɖícíŋííríɖííkuni, nɩ́ ɖígé ɖɩ́táárɩ́ɩ́ pooni nɩ́ ʊ́wáá báanɩ ɩ́lá ŋ́ká jɔ́nɩ́. Ʊ́wáá binyii ɖɩ́cɛ́ɛ́tɛ́rɩ́ pooni Yeésu ŋ́ka fii ɩ́nɛ́ɛ́mʊ́ mʊ́kpɩ́ŋkpɩ́ɩ́mʊ́ bó, kɩ canɩ ɩ́kpɩ́ɩ́ráá, ba lógópwa wʊ yɛ, ká ɖɩpɛnɖɛ. Yʊwáanɩ úlíísiili, ʊ́bwáyáá Heróoɖɩ Antipáásɩ, nɩ bipinlii barɩɩ́ bɩ́bá waa wáa sá yɛ. Ɖígé ɖɩ́náárɩ́ɩ́ pooni, Yeésu gba Yerúsalɛ́ɛmɩ sɛŋ, wáa pá yɛ, bɩ́wáá báa pwámɩ́ tá pooni nɩ́ ílemí ɖɩkɛɛsɛɛrɩwámɩ pooni, ʊ jɛɛ ɩ́jápárɩ́ ɖéérí, ɖéé báa bɩ́ɩ́ yá kɩ́ sáá bipinlii yɛ, ɖéé báa bɩ́ɩ́ kɔ́ Mwáátáá Bwɛ́jéríní yɛ. Ɖígé ɖɩ́ŋmɔ́rɩ́ɩ́, yɩ́ɩ́ nɛɛ́yɩ yáá Yerúsalɛ́ɛmɩ pooni, wáa fóóní ɖéé ʊ́bwáyáá yɛ bɔ́ɔ́nɩ́, Yeésu ŋ́ka fɔɔ Mwáátááɖííku kɩ mii kʊ pooni. Kʊ́bááráámɩ́ ɖabata bɔɔ bɩ́ bé wʊ kʊ́táláá. Ɖígé ɖílóbéríí nɩ ɖíkóŋgáá. Tɩ kpaá náá ʊ́wáá ɖícúgúrí, ílemí ɖɩkpɔrɩ, nɩ múkú, ɖá sá báa bɩ́ɩ́ cíni unyii wa tógó yɛ kɩ kpɔ yɛ. Mɩ́takpɩ́ɩ́ráá waa báa fáá ugbeni yɛ lɛɛ kɩ míni naa wáa sá ɩ́kpɩ́ɩ́ráá! Ʊ́wáá múkú nɩ́ ɖísírí nɩ́ ʊ́wáá ɖifeníɖí nɩ bɩ́pɩ́ɩ wáá akúmbó wáá ɖígbóórí, nɩ ʊ́wáá bipinlii bo ɖileteńɖí nɩ́ ʊ́wáá kʊ́tápáá ɖɩ́jɔ́rɩ́ mii ʊ́wáá ɩ́kpɩ́lɩ́ɩ́.

Lúuki sa gɩrɛ́ɛkɩnyiiwu wa yáá Yahúúɖúmɩ wáá aɖííni yɛ. Úlólóó nɩ ba ná sá Yawúúɖumɩ yɛ baa wáa laá bɩ́ ŋmɔ́ bítóó wáá ɩ́waa wáá ɖɩ́fɔ́ɔ́sɩ́ɩ́rɩ. Ɖéé bɩtanlɩɩ bɩjɔjɔɔbɩ káa yáá yɛ, wɩ́ɩ́ mɛ́tɛ́ bɔɔ kɩ ká, ʊ taŋ ílemí yaa sériyaraamɩ káa kɩ́ɩ́ íbó yɛ, nɩ́ ʊ yánɩ yaa báa péŋ́ la wɛ́ɛ́ yɛ ɖítóó, ka Máarɩkɩ nɩ tákárɩɖámɩwaalɩɩ bɩbá mɛ́tɛ́ káa waa yɛ. Yaa wáa jibɔɔ́ yɛ ńsá náá Téwoofíilɩ wáá ɩ́jápárɩ́ ńwɛ́, yɩ́ɩ́ bó nɩ́ wa waa kɩ ɖe Mwáátáá wáá ńwɛ́ɛ́. Lúuki sá utóóyalɩ wa mɔ naa ya ɖé ɖɩbwambwá yɛ ńmatɩ́.