Ro Pangaywang Sueat ni
Juan
1
Para kimo, haeangdon nga bayi nga pinili it Dyos ag sa imo man nga mga unga.a Ro nagasueat ngara kinyo hay tag ginakilaea nga Ro Magueangb Isaea ako sa mga magueang nga nagadumaea sa mga tumueuo.Hantop gid sa tagipusuon ro akong paghigugma kinyo ag bukon eang it ako ro nagahigugma kinyo kundi pati man ro tanan nga nakasayod ku matuod nga mensahi. 2 Ginahigugma namon kamo bangod ku matuod nga mensahi it Dyos nga nakatanom gid sa atong paino-ino ag magapabilin ron hasta sa owa it katapusan.
3 Kon ginatuman naton ro matuod nga mensahi ag ginahigugma naton ro atong isigkapareho hay pakamaayuhon kita, kaeuy-an ag taw-an it kalinong sa atong tagipusuon ku Dyos nga Ama ag ni Jesu-Kristo nga ana nga Unga.
4 Nalipay gid ako it duro pagkasayod ko parti sa imong mga unga c nga nagatuman sa kamatuoran suno sa sugo katon it aton nga Dyos nga Ama. 5 Pero makaron hay may akon kunta nga ginasugo kimo, haeangdon nga bayi nga maghigugmaanan kita. Bukon it bag-o nga sugo ro akon ngara nga ginasueat kimo tungod hasayran eon naton ra umpisa pa ku pagtuo naton kay Jesus. 6 Ro nagapakita nga ginahigugma matuod naton ro Dyos hay ro aton nga pagtuman sa anang mga sugo. Daya ro pinakapunto ku anang mga sugo: nga maghigugmaanan kita. Umpisa pa ku inyong pagtuo hay habatian eon ninyo nga dapat ninyo ra nga tumanon.
7 Abo eon nga mga manogpataeang nga nagaeapnaag sa bisan siin nga parti it kalibutan nga nagaturo nga si Jesu-Kristo hay owa nangin matuod nga tawo sa anang pag-adto iya sa kalibutan. Ro mga nagaturo it makaruyon hay may paino-ino pareho ku Manogpataeangd ag Kaaway ni Kristo. 8 Ngani mag-andam gid kamo nga indi hipataeang ag mawad-an it pueos ro inyong mga ginkinabudlayan kundi mabaton ninyo ro tanan-tanan nga ipremyo kinyo it Dyos.e 9 Ro tanan nga owa nagapadayon sa pagsunod sa ginaturo ni Kristo kundi nagaturo it sobra pa karon hay owa nagabaton sa Dyos. Pero ro nagapadayon sa pagsunod sa ginaturo ni Kristo hay nagabaton sa Dyos nga Ama ag sa ana nga Unga. 10 Ngani kon may mag-adto kinyo nga eain ro ginaturo kaysa sa ginaturo ni Kristo hay ayaw pagpasayluha sa inyong baeay ag ayaw pag-abi-abiha 11 tungod kon makaruyon ro inyong obrahon hay hidaeahig kamo sa anang maeain nga ginaobra.
12 Abo pat-a kunta ro akong gustong ihambae kinyo ugaling hay indi ko eon lang igpaagi sa sueat. Ngani kabay pa nga makaadto ako inha agod magkilita kita ag magkaistorya it personal agod mangin tueos gid ro aton nga kalipay. 13 Ginakamusta ka man ku mga unga ku imong igmanghod nga bayif nga pinili man it Dyos.