Ro Nagaperdi sa Kaeainan sa Kalibutan
5
Ro mga nagatuo nga si Jesus hay ro Maneueuwas nga ginpromisa it Dyos hay mga unga it Dyos. Ro mga nagahigugma sa Ama hay nagahigugma man sa rato nga anang ginakabig nga mga unga. 2 Masayran naton nga ginahigugma naton ro mga unga it Dyos kon aton nga ginahigugma ro Dyos ag kon ginatuman naton ro anang kasuguan. 3 Ro aton abi nga paghigugma sa Dyos hay makita paagi sa aton nga pagtuman sa anang kasuguan. Ro anang kasuguan hay bukon eon it pareho ku mabug-at nga daeaehon nga haeos indi naton madaea 4 dahil ro tanan nga gintaw-an ku Dyos it bag-ong kabuhi hay makasukoe sa mga tentasyon iya sa kalibutan. Ag ro makatao katon it kadaeag-an hay ro atong pagtuo kay Jesu-Kristo. 5 Sin-o eang abi ro makasukoe sa mga tentasyon iya sa kalibutan? Owa it iba kundi ro nagatuo nga si Jesus hay Unga it Dyos.Ro Pagpamatuod Parti kay Jesu-Kristo
6 Ro Unga ngara it Dyos hay ro Maneueuwas nga ginpili it Dyos nga maghari. Nag-adto imaw iya sa kalibutan, ginbawtismuhan sa tubi ag nag-uea ku anang dugo tag gineansang imaw sa krus. Owa eang imaw ginbawtismuhi kundi nag-uea man imaw ku ana nga dugo.a Ro Espirito Santo mismo ro nagapamatuod kara ag ro Espirito hay nagasugid pirmi it matuod. 7 Ngani, may tatlo nga nagapamatuod para kay Jesus, 8 ro Espirito, ro tubi, ag ro dugo ag ro tatlo ngara hay nagakasinanto. 9 Hay kon aton ngani nga ginapatihan ro pamatuod it mga tawo, mas pat-a nga dapat naton patihan ro pamatuod it Dyos parti sa anang Unga tungod masaligan sa tanan ro ginahambae it Dyos. 10 Ro nagapati nga si Jesu-Kristo hay Unga it Dyos hay makasiguro sa ana mismong kaugalingon nga ro anang ginapatihan hay matuod. Pero ro owa nagapati sa pamatuod nga ginahambae it Dyos nga Ama parti sa anang Unga hay ginaobra nana nga purilon ro Dyos. 11 Ro pamatuod it Dyos hay raya: gintaw-an nana kita it kabuhi nga owa it katapusan ag mabaton ron naton paagi sa pagtuo sa anang unga. 12 Ngani ro may maeueot nga kaangtanan sa Unga it Dyos hay may kabuhi nga owa it katapusan pero ro owa it maeueot nga kaangtanan sa Unga hay owa ku kabuhi ngara.
Ro Kabuhi nga Owa it Katapusan
13 Ginasueatan ko kamo kara nga nagatuo it hantop gid sa Unga it Dyos, ro dungganon nga Maneueuwas agod makasiguro kamo nga may inyo nga kabuhi nga owa it katapusan 14 ag maisog man ro atong buot nga magpangayo kana ay sayod naton nga nagapamati imaw ag ginatao nana ro atong ginapangayo kon ruyon hay suno sa anang kabubut-on. 15 Tungod nga sayod kita nga ginapamatian nana ro tanan natong ginapangayo ngani sigurado man kita nga mabaton gid naton ro atong ginapangayo kana.
16 Kon hikita mo ro imong igmanghod sa pagtuo nga nagahinimo it saea nga indi kana makapahamueag sa Dyos hasta sa owa it katapusanb hay pangamuyoi imaw. Ipapanumbalik dayon imaw it Dyos sa anang dating kabuhi nga may malig-on nga pagtuo. May una abi nga sangka saea nga makapahamueag katon sa Dyos hasta sa owa it katapusan pero owa ako gahambae nga ipangamuyo ro nagakasaea karon. 17 Tanan nga maeain nga buhat hay saea pero puydi pa nga patawaron mageuwas ku saea ngato nga makapahamueag sa tawo sa Dyos hasta sa owa it katapusan.
18 Sayod naton nga ro tanan nga gintaw-an it Dyos it bag-o nga kabuhi hay owa eon nagapadayon sa pagpakasaea tungod ginabantayan imaw ku Unga it Dyos nga si Jesus ag indi imaw hihalitan ni Satanas. 19 Sayod man naton nga kita hay mga unga it Dyos pero ro tanan nga owa nagatuo kay Kristo hay una sa gahom ni Satanas. 20 Hasayran man naton nga nag-abot riya ro Unga it Dyos ag ginbuligan kita mga makaeubot agod makilaea naton ro matuod nga Dyos. May aton nga maeueot nga kaangtanan sa matuod nga Dyos tungod maeueot man kita sa anang Unga nga si Jesu-Kristo. Imaw ro matuod nga Dyos ag imaw man ro nagatao it kabuhi nga owa it katapusan. 21 Akon nga mga unga sa pagtuo, ayaw kamo magsimba sa mga diyos-diyos.c