2
Mga unga nakon sa pagtuo, ginasueat ko kinyo ro mga bagay ngara agod indi kamo magkasaea. Pero kon may una gid man kinyo nga magkasaea hay may magabulig katon nga magapangabay sa Dyos nga Ama nga patawaron kita ag ruyon hay si Jesu-Kristo, nga imaw ro matarong. 2 Ag paagi sa kamatayon ni Jesu-Kristo hay ginpatawad eon kita sa atong mga saea. Namatay imaw bukon eang it dahil sa atong mga saea kundi dahil man sa saea it tanan nga mga tawo.Ro Pagkamatinumanon ag ro Pagkamahigugmaon hay Kinaiya it mga Tumueuo
3 Dapat nga tumanon naton ro mga sugo it Dyos dahil daya ro pamatuod nga maeapit gid kita kana. 4 Ngani ro bisan sin-o nga nagahambae nga maeapit gid imaw sa Dyos pero owa man nagatuman sa anang mga kasuguan hay purilon ag ro makaruyon nga tawo, owa gid nakatanom sa anang paino-ino ro kamatuoran nga ginpahayag it Dyos. 5 Pero ro bisan sin-o nga nagatuman sa kasuguan it Dyos, imaw ra ro may hantop gid nga paghigugma sa Dyos. Paagi sa atong pagtuman hay masiguro naton nga may atong maeueot nga kaangtanan sa Dyos. 6 Ro bisan sin-o nga nagahambae nga imaw hay nagapadayon sa anang maeueot nga kaangtanan sa Dyos hay dapat nga magpangabuhi it matarong pareho kay Jesu-Kristo.
7 Akon nga mga pinalangga, bukon it bag-o nga sugo ro akon nga ginasueat ngara kinyo. Umpisa pa ku inyong pagtuo kay Jesu-Kristo hay habatian eon ninyo ro sugo ngara sa mensahi it Dyos nga dapat hay maghigugmaanan kita. 8 Pero matsa bag-o man ro sugo ngara sa mga tawo tungod sa kabuhi ag kamatayon ni Jesu-Kristo naton primero nga hakita kon ano ro matuod nga gugma ag hakita man ron namon sa inyong kabuhi makaron. Nahambae ko ron tungod owa eon kamo naduemi pareho anay kato tag nagakabuhi pa kamo sa saea pero makaron hay nahayagan eon kamo paagi sa matuod nga kahayag nga halin sa Dyos.
9 Ro nagahambae nga nahayagan eon imaw pero ginakaugtan nana ro anang igmanghod sa pagtuo hay nagakabuhi pa gihapon sa kadueom. 10 Ro nagahigugma sa anang igmanghod hay nagakabuhi sa kahayag ngani owa eon it makatueod kana nga magpakasaea. 11 Pero ro nagakaugot sa anang igmanghod hay nagakabuhi gihapon sa kadueom. Owa imaw kasayod kon ano ro tama ag mayad pareho it tawo nga owa kasayod kon siin gapaadto ay indi imaw kakita tungod nadueman imaw.
Kaugti ro Tanan nga Kaeainan Iya sa Kalibutan
12 Mga unga nakon sa pagtuo, nagasueat ako kinyo ay ginpatawad eon kamo sainyong mga saea tungod namatay si Kristo por dahil kinyo. a 13 Nagasueat man ako kinyo, mga magueang, tungod maeapit gid kamo kana nga una eon bago pa gintuga ro bisan ano. Nagasueat man ako kinyo nga mga pamatan-on, tungod hapirdi ninyo si Satanas. Mga palangga nakon nga mga unga sa pagtuo, nagasueat ako kinyo tungod maeapit gid kamo sa Dyos nga atong Ama. 14 Akon nga umanon ro akong ginhambae. Mga magueang, nagasueat ako kinyo ay maeapit gid kamo kana nga una eon bago pa gintuga ro bisan ano. Mga pamatan-on, nagasueat man ako kinyo tungod mga malig-on kamo sa inyong pagtuo ag ro mensahi it Dyos hay nakatanom gid sa inyong paino-ino ag hapirdi ninyo si Satanas.
15 Ngani kaugti ninyo ro tanan nga kaeainan iya sa kalibutan. Ro nagapahaega sa kaeainan iya kalibutan hay owa nagahigugma sa Ama. 16 Tungod ro tanan maeain nga pagginawi iya sa kalibutan hay owa maghalin sa Dyos nga Ama kundi sa kinalibutanon nga pagbinatasan. Ro halimbawa kara hay ro mga maeain nga handom nga halin sa makasasaea nga kinaiya it tawo, ro paghangad ku mga bagay nga hakikita ag ro pagpabugae it tawo ku anang manggad. 17 Ro kalibutan ag ro tanan nga ginakaigban it tawo iya sa kalibutan hay magataliwan pero ro nagatuman sa kabubut-on it Dyos hay magakabuhi hasta sa owa it katapusan.
Ro Nagakuntra kay Kristo
18 Mga unga nakon sa pagtuo, makaron eon ro ulihing mga inadlaw. Ginsugid eon kinyo nga maabot anay ro Magakuntra kay Kristo ag hara eon, nagainabo eon makaron ro nagakuntra kana mawron nga sayod eon naton nga nag-abot eon ro ulihing mga inadlaw. 19 Ro mga nagakuntra ngaron kay Kristo hay mga kaibahan anay naton kato ugaling hay nagbueag sanda katon. Ro andang pagbueag hay gapakilaea nga owa gid kanda it matuod nga kaibahan naton ay kon matuod nga kaibahan naton sanda hay owa kunta sanda maghalin.
20 Pero kamo hay bukon it pareho kanda. Kasayod kamo tanan ku kamatuoran parti kay Kristo ay gintao nana kinyo ro anang Espirito Santo. 21 Ngani nagasueat ako kinyo, bukon it dahil nga owa kamo nakasayod ku matuod nga mensahi kundi dahil nga hasayran ron ninyo ag tungod sayod man kamo nga owa it kapurilan nga mabuoe halin sa matuod nga mensahi.
22 Hay sin-o ro pinakapurilon sa tanan? Ro pinakapurilon hay ro nagahambae nga si Jesus hay bukon it ro Maneueuwas nga ginpromisa it Dyos. Ro tawo nga makaraya ro anang ginahambae hay nagakuntra kay Kristo ag owa nagabaton sa Dyos nga Ama ag sa anang Unga. 23 Tungod ro bisan sin-o nga owa nagabaton sa Unga it Dyos hay owa man it maeueot nga kaangtan sa anang Ama pero ro nagabaton sa Unga hay may maeueot man nga kaangtanan sa Dyos nga Ama. 24 Itanom gid ninyo sa inyong paino-ino ro tanan nga inyong habatian parti kay Kristo umpisa pa ku inyong pagtuo kana. Kon makaruyon ro inyong ginaobra hay magapadayon kamo sa inyong maeueot nga kaangtanan sa Dyos nga Ama ag sa anang Unga nga si Jesus. 25 Ag taw-an nana kita it kabuhi nga owa it katapusan ay ruyon gid mat-a ro ana nga ginpromisa katon.
26 Ginasueatan ko kamo kara agod paandaman kamo parti sa mga tawo nga nagatinguha nga pataeangon kamo sa andang saea nga ginaturo. 27 Pero kamo hay gintaw-an eon ni Jesus it Espirito Santo ag imaw hay nagakabuhi kaibahan ninyo. Ro Espirito Santo ro nagaturo kinyo ku tanan nga kinahangean ninyo nga masayran ngani owa eon it kinahangean nga may iba pa nga magturo kinyo it dugang nga mga pagturo nga eain sa anang ginaturo. Matuod gid ro tanan nanang ginaturo ag suno sa anang ginaturo ngaron, padayuna ninyo ro inyong maeueot nga kaangtanan kay Kristo.
28 Ngani mga unga nakon sa pagtuo, dapat padayunon naton ro atong maeueot nga kaangtanan kay Kristo agod may atong kaisog it buot ag makaatubang kita kana nga owa nahuya sa anang pagbalik. 29 Hasayran naton nga matarong si Kristo ngani makasiguro man kita nga ro tawo nga nagahimo it matarong hay nakabaton it kabuhi nga halin sa Dyos.