Tsiq eeq 139
Miqyail neq, iqsanl mail heeq nia khi hel daiq phail nail gaq pevq nail ngaol
1 Heeqphaq Miqyail-ol
naol ngaq bhai tsao tsel duq khi
ngaq nail ganl iqsanl bhai heeq nia nail ngaol.
2 Ngal jaol deel nail thul phaol nail iqsanl
heeq nia nail ngaol.
Eq yal nee mail ngaq-i mail
khal noeq nail phaq iqsanl
heeq gil nia nail ngaol.
3 Ngal gailkhaol tsao-u phao maqkhaiq
gaq naq naq-u phao maqkhaiq
naol ngaq bhai moel thail thaiq nail ngaol.
Ngal khal nl khal hal nail yaoq phaq yaoq-ao nee
naol heeq nia nail ngaol.
4 Heeqphaq Miqyail-ol
ngaq nail moeqthaoq maq phao-u nee mail
ngal khul ge nail dai, naol heeq gil nia nail ngaol.
5 Naol neq, ngaq nail sivtavq
haoqnaol teevq jaoq jaol khi
naoq nail aqlavq ngaq nail kovtavq bhai
bavq dav-ai thaq nail ngaol.
6 Naol ngaq nail ganl bhai
al hai heeq gil nia nail ngel-i mail
ngal al jaiq-ail noeq-u maq dov dai pevq khi
naoq nail neenoeq neekha neq
ngal maq gov heeq kivq dai
navq dee dee ail nial.
7 Naoq-ai nee eq ail dai
ngal khaq bha tsaoq kivq heeq.
Naoq bhai maq bhi moel dai
ngal khaq bha tsaoq uvq kivq heeq.
8 Nqtavq kovtavq bhai
ngal tsaoq dal laivq khi ngaol-aoq
naol a bhai jaol nail ngaol.
Sil nail milkhaoq bhai iq thaiq ail khi ngaol-aoq
naol a bhai jaol nail ngaol.
9 Nl ma dov khoeq phao
bhail peil-aivq khi ngaol-aoq
nlma ga khoeq phao jaol ail khi ngaol-aoq
10 naoq nail aqlavq ngaq bhai
gailkhaol hevq daiq lavq khi
naoq nail bhaqaoq iqsanl
a bhai ngaq-ai hel daiq phail lavq nail ngaol.
11 "Nav tsee deel ngaq bhai uv thaiq lee khi
ngaq nail teevq jaoq bhaq nail aqbhaq bhai
nqkiv khe-ai maq bhaq dai bhi pevq ail yaoq" dai
ngal ge khi ngaol-aoq
12 naoq nail haqbhoil nav tsee deel maq bhao ail.
Nqkiv iqsanl n-gaol khe-ai bhaq nail ngaol.
Naoq nail sivtavq bhai aqbhaq
khi mail aqnav teevq gaq kheel ngaol.
13 Ngaq nail aqmaol khe al sail juq iqsanl mail
naoq-i mail teivq-ai thaq khi
ngaq nail aqma nail ovq ma lavqkhoel bhai
oil covq lavq-a nail ngaol.
14 Naol ngaq bhai noeq-u maq dov heeq phaq-ail
teivq lavq-a nail ngel-i mail
ngal naoq bhai tsiq eeq nail ngaol.
Naoq-i mail nl-a nail ganl juq neq
noeq-u maq dov nail ganl juq pevq nail bhai
ngal aqmeeq-ai heeq kivq duq-a nail ngaol.
15 Ngaq nail haqeeq haq lao bhao lal khi
aqma nail ovqmav lavqkhoel bhai
ngaq nail aqmaol aqmeeq-ai
covq cavq lai-a nail nee ovqtavq
hee tsul dai
eeq lal gaol lal thail thaiq-u nee mail
naol ngaq bhai heeq nia nail ngaol.
16 Ngal maq doevq dov lee-u nee mail
naoq nail maivneev ngaq bhai moel nail ngaol.
Ngal aqdoevq kha dai n ya doevq nail dai iqsanl
maq doevq lee-u nee mail
naoq nail haoqgavq lavqkhoel bhai
gevq bhoel-ai thaq nail ngaol.
17 Miqyail-ol, naoq nail neenoeq neekha neq
ngaq nail haqbhoil haq dee dee khi
navq dee dee nail ngaol.
Al ovqtavq, maq ge gil tsaol dai mao dee dee ail nial.
18 Naoq nail neenoeq neekha bhai
ngal ge daiq-u phao
tsalhail nee maq tsil mao ail nial.
Ngal iq noeq noeq lal-u phao iqsanl
naoq-ai nee mail jaol nail ngaol.
19 Miqyail-ol, haqeiv nail tsaol-aq juq bhai
bhi luq bhi seil-ail movq ail nial.
Tsaol-aq bhai heivq movq nail juq bhai iqsanl
ngal jaol nail nee bhi dov ail yaoq.
20 Aqyu juq naoq nail ganl
maq meeq nail phao ge khi
naoq nail aqmil bhai
khal ge movq ail ge nail ngaol.
21 Heeqphaq Miqyail-ol
naoq bhai bhe nail tsaol-aq juq bhai ngal bhe khi
naoq bhai lav tsoiq nail tsaol-aq juq bhai
ngal neejiav jiav dee dee lal ail nial.
22 Ngal aqyu juq bhai
neema lavqkhoel nee bhe nail ngaol.
Aqyu juq neq
ngaq bhai neejiav jiav nail juq dai
saol-nvq-ai thaq nail ngaol.
23 Miqyail-ol, ngaq bhai tsao tsel duq khi
ngaq nail neema bhai heeq kivq duq lavq yaoq.
Aqmeeq -ai laonq daiq khi
ngaq nail nee noeq bhai iqsanl
heeq kivq duq lavq yaoq.
24 Haq eiv nail gailkhaol bhai
ngal tsao maq tsao dai hel daiq khi
nqmaq maqluv halyeel ivq nail gailkhaol bhai
hevq daiq lavq yaoq.