Tsiq eeq 115
Aivq teevq gaq taivq-ail maldil Miqyail pevq nail ngaol
1 Heeqphaq Miqyail-ol
seiqleiq khaoqsail
nv juq jaol nail bha maq bhi jiav ail.
Naoq nail aqmil bhai taivq-ail bhi jiav naol.
Khul khi mail dai ngal-aq
naol neq gaoq haq goil gaiq-a nail phaq khi mail
saljial ivq nail phaq bhee nail ngaol.
2 "Nul juq nail Miqyail neq
khaq bha jaol nail-aiq" dai
jeq-e jaq-a juq neq, khul khi mail
nv juq bhai nal daiq lal nail-aiq.
3 Nv juq nail Miqyail neq
nqtavq kovtavq bha jaol khi
aivq neema khal tsaq nail khe-ai
nl nail ngaol.
4 Thail hai ngaol-aoq
aqyu juq nail miqyail juq neq, phul heel pevq khi
tsaol-aq yaq nail aqlavq-i mail
lav sav dov-ai thaq nail
maolkhoel pevq nail teevq-eel ngaol.
5 Al juq neq
moeqthaoq covq khi ngaol-aoq
daoq maq ge nia.
Maiv neev covq khi ngaol-aoq
maq moel nia ail.
6 Naqkhaol covq khi ngaol-aoq
maq gaiq nia.
Nal bhaoq covq khi ngaol-aoq
maq huq niil nia ail.
7 Aqlavqcovq khi ngaol-aoq
maq thoiq tsi nia.
Aq khil covq khi ngaol-aoq
gailkhaol maq tsao nia ail.
Aqyu juq neq
aqthel teevq thel iqsanl maq dov lal nia ail.
8 Maol khoel al juq bhai
teivq-a nail juq khi mail juq nail juq neq
yovqgavq-i mail lav sav dov-ai thaq nail
ganl maq tsoiq nail maolkhoel juq khe-ai
pevq ail nail ngaol.
9 Ilsaqleiqlav nail jeq-e jaq-a juq-ol
Heeqphaq Miqyail bhai neema thaq tsaol yaoq.
Aivq neq
nul juq bhai tsao jao-ai lavq nail gaq pevq khi
doeq daq duq iqsanl pevq nail ngaol.
10 Aqlonq nail aqjievq liqdee juq-ol
Heeqphaq Miqyail bhai neema thaq tsaol yaoq.
Aivq neq
nul juq bhai tsao jao-ai lavq nail gaq pevq khi
doeq daq duq iqsanl pevq nail ngaol.
11 Heeqphaq Miqyail bhai
gee sil khi ev nail juq-ol
aivq bhai neema thaq tsaol yaoq.
Aivq neq
nul juq bhai tsao jao-ai lavq nail gaq pevq khi
doeq daq duq iqsanl pevq nail ngaol.
12 Heeqphaq Miqyail neq
ngadao bhai noeq kev khi
geeqlaoq bivq lavq nail ngaol.
Aivq neq,
Ilsaqleiqlav nail jeq-e jaq-a juq bhai maqkhaiq
Aqlonq nail aqjievq liqdee juq bhai maqkhaiq
geeqlaoq bivq nail ngaol.
13 Heeqphaq Miqyail neq
aivq bhai gee sil khi ev nail juq iqsanl bhai
eeq yaq nil yaq maq tsel pav dai
geeqlaoq bivq nail ngaol.
14 Aivq neq
nul juq khi mail nul juq nail yaq juq bhai
bhi bhao bhi ya lee dei-eiq.
15 Nqtavq khi mail miltsaq bhai teivq-a nail
Heeqphaq Miqyail neq
nul juq bhai geeqlaoq bivq dei-eiq.
16 Nqtavq kovtavq bha
Heeqphaq Miqyail teevq gaq
uv thaiq ail teevq-eel ngaol.
Miltsaq neq, tsaol-aq juq bhai bivq-a nail ngaol.
17 Sil jel-a nail juq
Heeqphaq Miqyail bhai maq tsiq eeq ail.
Aqyu juq hee tsul dai
sil nail milkhaoq lavqkhoel bhai jaol nail ngaol.
18 Thail hai ngaol-aoq
aqdoevq doevq nail ngadao juq neq
yanqgaol nee nqmaq maqluv halyeel
tsiq eeq nail ngaol.
Haq leiq lul yaq.