Tsiq eeq 22
Nioil nail daoq khi mail tsiq eeq nail gul daoq
1 Ngaq nail Miqyail-ol
ngaq nail Miqyail-ol
khul khi mail khaonq ha lavq nail-aiq.
Tsao jao-ai lee lavq yaoq dai
gul heil leevq khi ngaol-aoq
khul khi mail eqyal bhai jaol lavq nail-aiq.
2 "Ngaq nail Miqyail-ol" dai, gul-u phao
n-gaol phao khul khi ngaol-aoq
eq-el maq kha lavq
nqkiv phao khul khi ngaol-aoq
neema sal duq maq jiav ail.
3 Thail hai ngaol-aoq, naol neq
meeq nail haol nail uv thaiq nail gaq pevq khi
Ilsaqleiqlav tsaol-aq nail
tsiq eeq duq pevq nail ngaol.
4 Nv juq nail aqphiq aqbhal juq
naoq bhai neema thaq tsaol khi
naoq-i mail bhi jel ail-a nail ngaol.
5 Aqyu juq naoq bhai gul gaiq khi
ya jel ail-a nail ngaol.
Naoq bhai neema thaq tsaol nail ngel-i mail
haq sil nail phaq nee ya jel ail-a nail ngaol.
6 Thail hai ngaol-aoq, ngal neq
tsaol-aq maq ngel nail khe-ai
bhoiq juq teevq maol khe-ai dul ail nial.
Yu-i mail khal ge movq ail ge lavq khi
tsaol-aq yaq juq-i mail hel daiq theq lavq nail ngaol.
7 Khal moel lee nail juq meel naq lal khi
moevqlal tsaoq dov lavq nail nee ovqtavq
uqhuq jiivq jiivq ail, tsao lavq-a nail ngaol.
8 Aqyu juq neq
"Naol neq, Heeqphaq Miqyail bhai
neema thaq tsaol nail ngaol.
Miqyail neq naoq bhai khul khi mail
maq hevq kovq lavq nail-aiq.
Aivq naoq bhai neekhaol sil haq neq
naoq bhai khul khi mail
maq bhi jel-ail lavq nail-aiq" dai
khal ge movq ail ge nail ngaol.
9 Thail hai ngaol-aoq
naoq-i mail ngaq bhai bhi doevq lee khi
aqtsil cuvq yaq pevq-u nee mail
hel daiq phail lavq-a nail ngaol.
10 Ngal iqmoeq ilmoeq doeq dov lee-u nee mail
naoq nail gaq bhai juq-a nail ngaol.
Aq ma nail ovqmav lavqkhoel bhai aol-u nee mail
naol ngaq nail Miqyail pevq nail ngaol.
11 Ngaq-ai nee eqyal bha thaq jaol lavq.
Haq nail aoq nail phaq
aqjail jail lee thail thaiq khi
tsao jao-ai lavq nail teevq gaq iqsanl maq jaol ail.
12 Ngaq bhai neejiav jiav nail juq neq
Bhaqsanq aqduq nee mail
gaq kav nail niaoqnel niaoq khal juq khe-ai
ngaq bhai jaol jaoq gil-ai thaq nail ngaol.
13 Haqjoil moevqlal bhiq khi geeq nail
haqeiv nail al laq jaq sil khe-ai
moeqthaoq gaol nga-ai thaq khi lovq nail ngaol.
14 Ulcuvq thaoq ha gil nail khe-ai
ngaq nail gaq il ha gil-aoq nial.
Haq eeq haq lao tsaoq gaoq ail gil khi
neema iqsanl delgil aqtseel khe-ai
phaq lai gil-aoq nial.
15 Khoeq ma khaqlail khe-ai, aqgee gee khi
moevqlal iqsanl bhaq jil bha niaoq lai-aoq nial.
Khaq lail nail lavqkhoel bhai
bhi sil nail dai khi
naol ngaq bhai khaonq ha lavq thaq nail niil.
16 Kheeq ga jaoq lee-a nail khe-ai
haqeiv nail tsaol-aq teevq jaoq lee khi
ngaq nail aqkhil aqlavq iqsanl bhai
he pav he sav gil-aoq nial.
17 Ngaq nail haqeeq iqsanl mail
moel gil lal khi, aqyu juq neq
ngaq bhai hel daiq nail lavqkhoel nee
gaq ya lal bhiq khi hel sil nail ngaol.
18 Ngaq nail aqgaq aqdoi bhai
aqyu juq bhoil pav khi
ngaq nail phailkhaoq bhai
khul gaq khul keiv ya dai
eel laoq bheq khi oil-a nail ngaol.
19 Heeqphaq Miqyail-ol
ngaq-ai nee eqyal bha thaq jaol lavq.
Ngaq nail gaq eeq duq pevq nail gaq-ol
lavqtsail mail lee khi hevq kovq lee lavq yaoq.
20 Thao ma nee maq ya sil dai hevq kovq lavq yaoq.
Kheeq-i mail maq bhi keivq heivq lavq dai
ngaq nail yeel bhai bhi jel-ail lavq yaoq.
21 Allaqjaqsil nail moeqthaoq nee maqkhaiq
neivq niaoq nail uqkheel nee maqkhaiq
maq bhi sil lavq dai, hevq kovq lavq yaoq.
22 Ngal ngaq nail aqivq jaqbheq bhai
naoq nail aqmil ge bhiq naol.
Aqyu juq jil lai khi jaol nail gaoltsi bhai
ngal naoq bhai daoqsel gul khi tsiq eeq naol.
23 Heeqphaq Miqyail bhai gee sil khi
ev nail juq iqsanl mail
aivq bhai tsiq eeq bhel.
Yaqkov nee mail yavq kha lee thaq nail yaq juq-ol
aivq bhai tsiq eeq tsiq heel bhiq yaoq.
Ilsaqleiqlav nail tsaol-aq juq-ol
aivq bhai uqhuq thaoq bhel.
24 Khul khi mail dai ngal-aq, aivq neq
haq yaq aoq yaq juq bhai maq khaonq ha ail.
Al ovqtavq, aivq nail maivphaoq tsiq phaol khi
aqyu juq bhai maq nioil peivq ail.
"Tsao jao-ai lee lavq yaoq" dai
gul nail aqthel bhai iqsanl
nal daiq bhiq nail ngaol.
25 Naoq-i mail nl-a nail ganl bhaq da nee
aqivq jaqbheq teevq bhee jil lai-a nail bhai
ngal naoq bhai tsiq eeq nail ngaol.
Ngaq-i mail saljial jaq-a nail khe-ai
naoq bhai ev nail juq nail sivtavq bhai
ngal laol bhiq nail phaq nl naol.
26 Haq yaq aoq yaq juq ya jaq bov khi
Heeqphaq Miqyail bhai hal pov nail juq
aivq bhai ya tsiq eeq nail ngaol.
Nq maq maq luv hal yeel gil dai
aqyu juq yeel bhao yeel ya dei-eiq.
27 Mil ma liq phao liq khoel khe
jeq-e jaq-a juq iqsanl mail
Heeqphaq Miqyail bhai noeq lal khi
aivq jaol nail bha kovq lal nail ngaol.
Al ovqtavq, miltsaq yaq juq iqsanl mail
aivq bhai uqhuq thaoq nail ngaol.
28 Khul khi mail dai ngal-aq, Miqyail neq
bhaqaoq eeq nail Heeqphaq pevq khi
jeq-e jaq-a iqsanl nail kovtavq bhai
uv thaiq nail ngaol.
29 Neema eeq nail hulmeeq hul bhao juq
aivq bhai uqhuq ya thaoq nail ngaol.
Al ovqtavq, sil nia nail tsaol-aq yaq juq
aivq nail sivtavq bhai gaol beiv khi
uqhuq ya thaoq nail ngaol.
30 Yaq hao teevq yeel nee teevq yeel
Heeqphaq Miqyail nail ganl nl nail ngaol.
Aivq nail ganl yaqhao khe aqjievq lilheel juq bhai
ge daiq bhiq nail ngaol.
31 Heeqphaq Miqyail-i mail
hevq kovq bhiq-a nail ganl
yaqhao doevq lee nail juq bhai iqsanl
ge daiq bhiq nail ngaol.
Miqyail al hai nl-a nail ngaol dai
aqyu juq ya gaiq nail ngaol.