Tsiq eeq 20
Genl dev nail gaq lai dai, geeqlaoq bivq-a nail daoq
1 Naoq nail kovtavq bhai
haq nail aoq nail aqn kev lee-u phao
naoq nail hal daoq bhai
Heeqphaq Miqyail nal daiq bhiq dei-eiq.
Yaqkov nail Miqyail nail aqmil
naoq bhai hel daiq phail bhiq dei-eiq.
2 Meeq nail haol nail jaol duq nee mail
tsao jao-ai nail phaq bhi kev lee khi
Yeel ovq gaoqjaoq nee mail
gaq bivq nail phaq bhi kev lee dei-eiq.
3 Naoq-i mail khal danq bhiq nail phaq bhai
aivq maq nioil peivq dai noeq kev khi
naoq-i mail miqjaq kheq poiv khi
khal laol bhiq nail phaq bhai
neekhaol sil khi hav bhoel dei-eiq.
4 Naoq nail neema lavqkhoel bhai
khal oil movq nail phaq ya khi
naoq-i mail khal lainq-ai thaq nail phaq
bhi bhee lal dei-eiq.
5 Naol genl dev nail gaq lai nail bhai
nv juq gul gul ail lavqkhiq tsail khi
ngadao nail Miqyail nail aqmil bhai
gaq lai nail phalaoq phalail kha thul bhiq naol.
Naol khal hal nail yaoq phaq yaoq-ao nee
Heeqphaq Miqyail nl bhee dei-eiq.
6 Heeqphaq Miqyail-i mail
aqtseel hoel dav khi tsel dov-a nail heeqphaq bhai
hevq kovq bhiq nail ngaol dai
niil aq-il ngal heeq kivq lal-a nail ngaol.
Aivq nail meeq nail haol nail
nqtavq kovtavq bha jaol khi
geeqlaoq hal daoq bhai
nal daiq khi ge kovq bhiq nail lavqkhoel nee
aivq nail lavqmal lavq nail
bhaqaoq bhai juq khi
gaq lai nail phaq bivq nail ngaol.
7 Tsaol-aq teevq gaq ga nav neq
moeqphaq lavlaoq bhai neema eeq khi
teevq gaq ga nav neq
moeqphaq bhai neema eeq khi ngaol-aoq
ngadao nail neema eeq duq neq
ngadao nail Heeqphaq Miqyail nail aqmil ngaol.
8 Aqyu juq yaoq gaq yaoq-ao nee
phaq thiq thiq khi gaq tsuq gil ail khi ngaol-aoq
ngadao neq, thul khi ivq dao dai jaol nail ngaol.
9 Heeqphaq Miqyail-ol
nv juq-i mail gul nail bhai nal daiq lavq khi
nv juq nail heeqphaq bhai
hevq kovq lavq yaoq.