Tsiq eeq 18
Heeqphaq-i mail gaq lai-a nail daoqsel
1 Heeqphaq Miqyail-ol
ngal naoq bhai gaiq-a nail ngaol.
Naol neq, ngaq nail gaq pevq nail ngaol.
2 Heeqphaq Miqyail-ol, naol neq
ngaq nail lovphail, ivq dee dee nail tavq
ngaq bhai hevq kovq lavq-a nail gaq pevq nail ngaol.
Ngaq nail Miqyail
ngaq-i mail juq nail lovphail iqsanl pevq nail ngaol.
Ngaq nail doeq daq duq
ngaq bhai hevq kovq lavq nail
bhaqaoq eeq nail gaq pevq nail ngaol.
3 Tsiq eeq geel-nvq nail
Heeqphaq Miqyail bhai
ngal khul-u phao
neejiav jiav nail juq nail aqlavq lavqkhoel nee
aivq ngaq bhai hevq kovq lavq-a nail ngaol.
4 Sil nail neeqtsaq ngaq bhai he leel lavq khi
luq ail seil ail nail eel jeq
ngaq bhai tsiq thaoq tsiq tuv lal-u phao,
ya gee sil nail ngaol.
5 Sil nail milkhaoq lavqkhoel khe
neeqtsaq leel jaoq-ai thaq khi
sil nail gaq nail lavq phee iqsanl
ngaq bhai bhi phee lai nail galduq
khail-ai thaq nail ngaol.
6 Ngal al hai neema haq aoq nl
dee dee nail ngel-i mail
Heeqphaq Miqyail bhai khul-a nail ngaol.
Ngaq bhai bhi tsao jao-ai lee nail haqbhoil
ngaq nail Miqyail bhai gul-a nail ngaol.
Aivq neq, aivq nail uqhuq thaoq nail
ilkhaol il ma lavqkhoel bhai
ngaq nail aqthel-ai gaiq khi
ngaq-i mail gul-a nail daoq juq
aivq nail naq khaol bhai aol lai-a nail ngaol.
7 Aq-u phao
aivq neema phail lal-a nail ngel-i mail
miltsaq nq luv mil luv luv luv ail dao lal khi
gaoqjaoq daoqthaoq nee
bhi bov lal-a nail ngaol.
8 Aivq nail nal bhaoq bhai
miq khoiq dov khi
miqjaq miqlail
aivq nail moeqthaoq nee mail
dov lee-a nail nee ovqtavq
miqjaq miqjiiv aivq nail aqmaol nee dov nail ngaol.
9 Aivq nqtavq bhai phao khi
yavq kha lee-u phao
aivq nail aqkhil phaq yal kov-uvq bhai
nqdil aqnav jiav nail ngaol.
10 Kheiqlulbhinqa teevq maol bhai jeeq khi
lilmoel nee teevq gaq khe-ai
bhail leevq-a nail ngaol.
11 Aivq bhai aqnav-i mail
teevq jaoq bhi leel jaoq-ai thaq khi
ulcuvq teevq bhee deq nail nqdil aqthul
aivq nail kovtavq teevq jaoq jiav nail ngaol.
12 Aivq nail sivtavq bhai
aqbhaq bhaq da nee
nqdil nee mail ollov khi mail miqjiiv
ga dov lee-a nail ngaol.
13 Heeqphaq Miqyail-i mail nqjaiq bhi jaiq khi
eeq jaiq heel jaiq nail gaq nail aqthel
kev lee-a nail ngaol.
14 Aivq heeqnav bev-ai leevq khi
neejiav jiav nail juq
bhi tsaoq pav bhi tsaoq sav gil-a nail ngaol.
Aivq nqjaiq khi covq
bhi deeq lee-a nail ngel-i mail
aqyu juq bhi tsaoq dov gil-a nail ngaol.
15 Heeqphaq Miqyail-ol
naol aqyu juq bhai khaq khi
nal bhaoq nee aqhaq
jiiv dov-ai leevq-u phao
iqyaq iqma nail daoqthaoq
moel gil lal khi
miltsaq nail daoqthaoq iqsanl
moel gil lal nail ngaol.
16 Daq moe bha jaol nail Heeqphaq Miqyail
aivq nail aqlavq-i mail
ngaq bhai ulcuvq navq nail nee
he dov lavq-a nail ngaol.
17 Gaq kav nail neejiav jiav nail juq khi mail
ngaq bhai bhe nail juq nail aqlavq nee
aivq ngaq bhai hevq kovq lavq-a nail ngaol.
Aqyu juq gaq kav dee dee khi
ngal khul teevq phaq iqsanl maq nl kivq ail.
18 Ngal haq dee aoq dee dee thail thaiq-u phao
aqyu juq ngaq bhai genl dev lee-a nail ngaol.
Thail hai ngaol-aoq
Heeqphaq Miqyail ngaq bhai
gaq bivq lavq-a nail ngaol.
19 Heeqphaq Miqyail neq
ngaq bhai neekhaol sil nail ngel-i mail
gaoq-an nail jaol duq bhai tsiq dav lavq khi
hevq kovq lavq-a nail ngaol.
20 Ngal tsaq nail daol nail phaq nl-a nail ngel-i mail
Heeqphaq Miqyail kovpavq bivq lavq khi
ngaq nail aqlavq aqhaol ngel-i mail
ngaq bhai geeqlaoq bivq lavq-a nail ngaol.
21 Heeqphaq Miqyail nail gailkhaol bhai
ngal tsao thel lavq khi, haqeiv nail phaq nl dai
ngaq nail Miqyail-i mail
bivq-ai thaq nail aoldaoq kovqdaoq nee
maq pav ail daiq haq-al.
22 Aivq-i mail bivq-ai thaq nail aoldaoq kovqdaoq
khaq mao iqsanl
ngaq nail sivtavq bhai jiav khi
aivq nail ya tsao the nail phaq bhai
maq khaonq ha-al.
23 Aivq nail sivtavq bhai
oeqbal thaq duq maq jiav dai
ngal jaol khi
ngaq nail aqmaol oeqbal bhai
yaol phaol khi doevq-a nail ngaol.
24 Al heel ngel-i mail, Heeqphaq Miqyail
ngal tsaq nail daol nail khe-ai
kovpavq bivq lavq khi
ngaq nail aqlavq aqhaol haol nail khe-ai
geeqlaoq bivq lavq-a nail ngaol.
25 Miqyail-ol
naoq bhai saljial ivq nail juq bhai
naoq nail saljial ivq khi
oeqbal thaq duq maq jiav nail juq bhai
naoq nail oeqbal thaq duq maq jiav nail phaq
bhi moel nail ngaol.
26 Neema aqhaol juq bhai
naoq nail neema aqhaol bhi moel khi
neema nee govq juq bhai
naoq nail neema bhi moel nail ngaol.
27 Neema nee nuq nee beiv aol nail juq bhai
naol hevq kovq bhiq khi
neema eeq nail heel nail juq bhai
naol doeq maiq bhiq nail ngaol.
28 Ngaq nail Heeqphaq Miqyail-ol
naol ngaq bhai phalmanq tovq lavq khi
ngaq nail aqnav bhai
aqbhaq bhi bhaq lal-a nail ngaol.
29 Naoq bhai juq nail lavqkhoel
genl dev nail munl munl ma thaoq pal-aivq khi
ngaq nail Miqyail bhai juq nail lavqkhoel
meenq khe khainl daq moe
tsaoq jel kivq nail ngaol.
30 Miqyail-i mail nl nail ganl juq
bhee lovq nail ngaol.
Aivq-i mail jaq-ai thaq nail
daoqma saljial neq
maldil pevq lal nail ngaol.
Aivq bhai juq nail juq nail haqbhoil
doeq daq duq pevq nail ngaol.
31 Heeqphaq Miqyail nee jaiq nail
miqyail yaoq gaq yaoq khaq sil gaq jaol nail-aiq.
ngadao nail Miqyail nee jaiq nail lovphail
yaoq phail yaoq khaq bha jiav nail-aiq.
32 Miqyail neq, gaq bivq lavq nail gaq pevq khi
gailkhaol hevq daiq lavq-a nail gaq iqsanl
pevq nail ngaol.
33 Ngaq nail aqkhil bhai
gaq aol nail ceiv nail aqkhil khe-ai
bhi lav lal lavq khi
daqmoe bha bhi jaol lavq-a nail ngaol.
34 Ngaq nail aqlavq genl dev kivq khi
giqheel nail heeqnav he dav tsaol dai
ngaq bhai saol nia lavq-a nail ngaol.
35 Naoq nail hevq kovq nail doeq daq duq
naol ngaq bhai bivq lavq-a nail ngaol.
Naoq nail lavqmal lavq-i mail
tsao jao-ai lavq khi
naoq nail aqmeeq phaq-i mail
bhi eeq bhi heel lal lavq-a nail ngaol.
36 Aq khil phaq khao khao nail bhai kev dai
naol lav sav lavq khi
ngaq nail aqkhil maq ya naoq gavq ail.
37 Nee jiav jiav nail juq bhai ngal the kheel khi
teevq loi maq lav cov gil-u kev dai
haoqnaol phao ngal maq kovq lal.
38 Ngal aqyu juq bhai coev tsuq khi
maq bhi thul lal tsaol dai
ngaq nail aqkhil daoqthaoq bhai
bhi ga-a nail ngaol.
39 Genl dev gaq kivq dai
naol ngaq bhai gaq bivq lavq khi
neejiav jiav nail juq bhai ngaq nail kov-uvq bhai
bhi ga tsuq-a nail ngaol.
40 Ngaq bhai neejiav jiav nail juq bhai
naol bhi tsaoq peivq gil khi
ngaq bhai bhe nail tsaol-aq juq bhai
ngal lav luq lav seil bhiq nail ngaol.
41 “Tsao jao-ai lavq yaoq” dai
aqyu juq gul khi ngaol-aoq
hevq kovq bhiq nail gaq maq jaol ail.
Heeqphaq Miqyail bhai gul gaiq khi ngaol-aoq
aivq maq ge kovq lavq ail.
42 Lil moel-i mail
bhi bhoe jal aivq nail khaqlail khe-ai
ngal aqyu juq bhai deeq muv bhiq khi
gailkhaol bhai miltsaq haiq ha nail khe-ai
haiq ha bhiq-a nail ngaol.
43 Tsaol-aq yaq juq-i mail
nl gaq nl dav dav nail lavqkhoel nee mail
naol ngaq bhai hevq kovq lavq khi
jeq-e jaq-a iqsanl nail kovtavq bhai
naol ngaq bhai
bhi uv thaiq lavq-a nail nee ovqtavq
ngal maq gaiq daiq-a nail tsaol-aq juq
ngaq nail kov-uvq bhai bhi jaol khi
ganl bhi nl lavq-a nail ngaol.
44 Yu nail jeq-e jaq-a
ngaq nail ganl ya gaiq-u phao
teevq pov taivq-ail
ngaq nail daoq bhai nal daiq khi
ngaq nail sivtavq bhai
gaol beiv lavq-a nail ngaol.
45 Aqyu juq neema ga kha gil ail khi
tavq lavqkhoel nee
aqjuq juq juq ail dov lee-a nail ngaol.
46 Heeqphaq Miqyail neq
aqdoevq doevq nail ngaol.
Ngaq nail Lovphail bhai tsiq eeq dei-eiq.
Ngaq bhai hevq kovq lavq-a nail Miqyail bhai
tsiq eeq tsiq heel dei-eiq.
47 Aivq ngaq nail haqbhoil nl kovq lavq khi
jeq-e jaq-a juq ngaq nail kov-uvq bhai
bhi jaol lavq-a nail ngaol.
48 Ngaq bhai neejiav jiav nail juq nail
aqlavq lavqkhoel nee
ngaq bhai hevq kovq lavq khi
aqyu juq nail kovtavq bhai
naol ngaq-ai tsiq eeq lavq-a nail ngaol.
Al ovqtavq, haqeiv nail juq nail kov-uvq nee
ngaq bhai bhi jel-ail lavq-a nail ngaol.
49 Al heel ngel-i mail, Heeqphaq Miqyail-ol
milkhaoq jeq-e jaq-a juq nail gaol tsi-ai
ngal naoq bhai tsiq eeq khi
naoq nail aqmil bhai daoqsel gul khi
tsiq eeq nail ngaol.
50 Miqyail aivq-i mail
heeqphaq bhi jiovq-a nail gaq bhai
gaq lai nail bhaqaoq bivq khi
aivq-i mail aqtseel hoel dav khi
tsel dov-a nail gaq pevq nail Daq bhil khi
aivq nee mail yavq kha lee thaq nail yaq juq bhai
nqmaq maqluv halyeel
gaoq haq goil gaiq-a nail ngaol.