Tsiq eeq 16
Miqyail bhai juq nail geeqlaoq hal daoq
1 Miqyail-ol
ngaq bhai hel daiq phail lavq yaoq.
Ngal naoq bhai juq nail ngaol.
2 “Naol neq, ngaq nail Heeqphaq ngaol.
Naoq-ai nee jel-ail haq neq
ngaq nail haqbhoil aqmeeq
khul teevq phaq ail maq jiav ail” dai
ngal Heeqphaq Miqyail bhai
ge nail ngaol.
3 Milkhaoq lavqkhoel bhai jaol nail
Miqyail nail tsaol-aq juq neq
khul ge duq maq jiav dai, meeq nail ngaol.
Ngal aqyu juq bhai neekhaol sil dee dee nail ngaol.
4 Thail hai ngaol-aoq
miqyail yaoq juq yaoq bhai tsel nail juq neq
haq dee aoq dee dee nail phaq ya daq nail ngaol.
Aqyu juq aqsivq laol bhiq nail bhai ngal maq aol.
Aqyu juq nail miqyail juq nail aqmil bhai
ngal teevq peivq ail maq ge.
5 Heeqphaq Miqyail-ol, naol neq
ngaq nail jaiq bhoil khi mail
ngaq-i mail
khal loq nail phaq bhai naol bivq lavq khi
ngaq nail aqn aqyanq iqsanl mail
naoq nail aqlavq lavqkhoel bhai jiav nail ngaol.
6 Ngaq-i mail ya-ai thaq nail miltsaq neq
hel daiq meeq dee dee nail
jaol duq pevq khi
meeq nail jaiq bhoil bhai
ngal ya-a nail ngaol.
7 Ngaq bhai hevq daiq lavq-a nail ngel-i mail
Heeqphaq Miqyail bhai tsiq eeq nail ngaol.
Ngaq nail heeq kivq nail neema
nqkiv phao iqsanl ngaq bhai ge noeq lavq nail ngaol.
8 Ngal Heeqphaq Miqyail nail aqjail bhai
khaq mao iqsanl jaol nail ngaol.
Aivq ngaq nail lavqmal lavq phao
jaol nail ngel-i mail
teevq gaq ail maq thoiq tsi lal nia ail.
9 Al heel ngel-i mail
ngaq nail neema lavqkhiq tsail khi
ngaq nail aqhaqlal nee sal ya nail nee ovqtavq
ngaq nail aqmaol iqsanl
gee sil duq maq jiav dai, jaol nail ngaol.
10 Khul khi mail dai ngal-aq neq
sil nail milkhaoq lavqkhoel-ai
naol ngaq bhai
maq khaonq ha lavq-a nail nee ovqtavq
naoq nail saljial ivq nail gaq bhai
mao ail navq nail khaq duq
maq bhi moel lavq-al.
11 Aq doevq bhi doevq nail gailkhaol
naol ngaq bhai cavq naq lavq nail ngaol.
Naoq nail sivtavq bhai
lavqkhiq tsail nail phaq bhee khi
khaq mao iqsanl
neekhaol sil nail phaq
naoq nail lavqmal lavq bhai jiav nail ngaol.