Tsiq eeq 6
Haq nail aoq nail phaq kev lee-u phao, hal nail geeqlaoq hal daoq
1 Heeqphaq Miqyail-ol
neema phail khi ngaol-aoq
ngaq bhai thaq khaq lavq.
Neema dav khi ngaol-aoq
ngaq bhai thaq khoeq thaq jiovq lavq.
2 Heeqphaq Miqyail-ol
ngal gaq bhaq thail thaiq ail nial.
Ngaq bhai gaoq haq gaiq-a lavq yaoq.
Ngaq nail haqeeq haq lao
teevq peivq ail gaq maq aol-il.
Ngaq bhai gaq bivq lavq yaoq.
3 Ngaq bhai gee sil ail nial.
Heeqphaq Miqyail-ol
naol ngaq bhai maq tsao jao-ai lee dai
khaq mao kev dai, ya daonq-ai haq nail-aiq.
4 Heeqphaq Miqyail-ol, hevq kovq lee yaoq.
Naoq-i mail
gaoq haq goil gaiq-a nail phaq bhaq da nee
bhi jel-ail lavq yaoq.
5 Khul khi mail dai ngal-aq
sil thaq nail tsaol-aq
naoq bhai maq noeq kev tsaol ail.
Sil nail milkhaoq lavqkhoel-ai
naoq bhai tsiq eeq nail juq maq jaol ail.
6 Noeq haq khi gaq bhaq dee dee ail nial.
Yaoq kivq yaoq-ao nee
iq goiq bhai maivbhil aqjail jail khi
iqjial bhai iqsanl, maivbhil eel jeq jeq ail nial.
7 Noeq haq nail bhaq da nee
ngaq nail maivneev bhaonq lal khi
ngaq bhai neejiav jiav nail juq bhaq da nee
maivneev maq moel haol lal-aoq nial.
8 Haq eiv nail phaq nl nail tsaol-aq juq-ol
ngal jaol nail nee dov ail gil yaoq.
Ngaq-i mail nioil nail aqthel bhai
Heeqphaq Miqyail gaiq gaq-ao nail ngaol.
9 Ngaq nail hal daoq bhai gaiq khi
ngaq nail geeqlaoq hal daoq bhai
nal daiq lavq-a nail ngaol.
10 Ngaq bhai neejiav khal jiav nail juq iqsanl
ya haq sil khi ya deel-nvq dee dee ail nail ngaol.
Maiv neev maiv tav teevq tav nail lavqkhoel nee
tsaoq kol-aivq khi ya haq sil nail ngaol.