Tsiq eeq 4
"Tsao jao-ai lavq yaoq" dai, hal nail nqkiv phao khe geeqlaoq hal daoq
1 Ngaq bhai
bhi tsaq bhi daol lal lavq-a nail Miqyail-ol
ngal gul-u phao, nal daiq lavq yaoq.
Haq nail aoq nail phaq
ngaq bhai tsiq thaiq lee-u phao
bhi jel-ail lavq yaoq.
Niil aq-il ngaq bhai gaoq haq gaiq-a khi
ngaq nail geeqlaoq hal daoq bhai
nal daiq lavq yaoq.
2 Tsaol-aq yaq juq-ol, khaq mao kev dai
ngaq bhai ge doil nail-aiq.
Ganl maq tsoiq lai nail phaq bhai nul juq gaiq-a khi
goiqbhaoq bhaoq nail haoqnao
khaq mao kev dai, tsao the nail-aiq.
3 Saljial ivq nail tsaol-aq juq bhai
Heeqphaq Miqyail tsel dov khi
ngaq-i mail khul nail aqthel bhai
aivq nal daiq nail ngaol dai
nul juq heeq kivq yaoq.
4 Gee sil khi aqjuq juq nail lavqkhoel nee
oeqbal thaq nl.
Iq jial kovtavq bhai
yovqgavq nail neema lavqkhoel-ai
aqmeeq-ai saol-nvq khi
hee tsul dai, jaol yaoq.
5 Tsaq nail daol nail laol bhiq nail phaq
Heeqphaq Miqyail bhai laol bhiq khi
aivq bhai taivq-ail neema thaq tsaol yaoq.
6 "Aqmeeq phaq nv juq bhai
khaq sil gaq bhi moel lavq nail-aiq" dai
nal daiq nail tsaol-aq mao dai jaol nail ngaol.
Heeqphaq Miqyail-ol
naoq nail maivphaoq nail aqbhaq
nv juq bhai bhi moel lavq yaoq.
7 Gov khi aqheeq tsilju nail ullul
ya dee dee lee-a nail bhaq da nee
aqyu juq lavqkhiq tsail nail al neq
naoq-i mail ngaq bhai bivq lavq-a nail
lavqkhiq tsail nail phaq ee dai maq thaoq ail.
8 Ngal iq thaiq lai-u phao
nee sal ovq nail lavqkhoel
iq thaiq kov-a nail ngaol.
Ngaq bhai hel daiq phail lavq nail gaq neq
Heeqphaq Miqyail-ol, naol teevq-eel ngaol.