Iqmoeq 47
Yaqkov Phaqlaol bhai geeqlaoq bivq-a nail ganl
1 A bhai nee ngal-aq Yaolsai neq, Phaqlaol jaol nail bha lai khi, "Ngaq nail aqbhu dai khi mailnail juq neq, yaol, niaoqnel juq dai khi aqyu juq nail ildaoq maoqgaiq juq iqsanl mail oil khi, Khaqnanq milkhaoq nee mail niai lee kev-aoq nail ngaol. Niil aq-il aqyu juq neq, Gaolsinq bhai jaol thail thaiq nail ngaol" dai, ge bhiq-a nail ngaol.
2 A bhai nee ngal-aq, aivq neq, aivq nail mailnail juq nail lavqkhoel khe, 5 gaq bhai tsel dov-ai thaq nail al, Phaqlaol jaol nail bha hevq bhoel laivq bhiq-a nail ngaol.
3 Phaqlaol neq aivq nail mailnail juq bhai, "Nul juq khul nail ganl nl nail-aiq" dai, nal daiq bhiq-a nail ngaol. Aqyu juq ge nail: "Naoq nail yaqkav pevq nail nv juq neq, nv juq nail aqphiq aqbhal mail nl khal leevq-a nail khe-ai, jaiqyaq tsu nail ganl nl nail ngaol.
4 Khaqnanq milkhaoq bhai moevq nail sivq nail al jaiq-ail thel nail ngel-i mail, jaiqyaq juq nail galduq, gav jaq duq maq jiav-ail. Al heel ngel-i mail, nv juq neq, milkhaoq niil khaoq bhai jaol nail galduq lee-a nail ngaol. Nv juq bhai Gaolsinq nail miltsaq bhai bhi jaol lavq yaoq dai, naoq bhai hal nail ngaol" dai, ge bhiq-a nail ngaol.
5 Phaqlaol, Yaolsai bhai ge bhiq-a nail: "Naoq nail aqbhu dai khi, naoq nail mailnail juq naol jaol nail bha lee kev-aoq nail ngaol.
6 Naol neq, Iljiltuv milkhaoq khaoq laol bhai uv thaq nail bhaqaoq jiav nail ngaol. Al heel ngel-i mail, milkhaoq niil khaoq khe jiav nail khal meeq nail jaolduq, Gaolsinq miltsaq bhai bhi jaol yaoq. Aqyu juq nail lavqkhoel khe aqmeeq-ai nl nia nail tsaol-aq jaol haq neq, ngaq nail jaiqyaq juq bhai iqsanl, hel daiq phail nail aqivq gaq bhi jiovq yaoq" dai, ge bhiq-a nail ngaol.
7 A bhai nee ngal-aq, Yaolsai neq, aivq nail aqbhu bhai, Phaqlaol jaol nail bha hevq bhoel laivq-a nail ngaol. Aq-u phao, Yaqkov neq, Phaqlaol bhai geeqlaoq pevq nail daoq ge bhiq-a nail ngaol.
8 Phaqlaol neq, Yaqkov bhai, "Naoq nail aqkovq kha dai bhee yaoq nail-aiq" dai, nal daiq bhiq-a nail ngaol.
9 Yaqkov ge nail: "Ngal neq miltsaq kovtavq bhai, daq-i jiovq khi jaol-a nail 130 kovq jaol-aoq nail ngaol. Thail hai ngaol-aoq, ngaq nail aqphiq aqbhal juq nail doevqyeel ee dai maq heel-ai haq-al. Ngaq-i mail ya doevq-a nail aqkovq neq, davq nil nil dai khi, haq dee dee nail ngaol" dai, ge bhiq-a nail ngaol.
10 A bhai nee ngal-aq, Yaqkov neq, Phaqlaol bhai geeqlaoq gaoq pevq nail daoq gaoq ge khi mail, dov ail-a nail ngaol.
11 Yaolsai neq Phaqlaol-i mail ge bhiq-a nail khe-ai, aivq nail aqbhu dai khi mailnail juq bhai Iljiltuv milkhaoq khe Laqmeiqsail nail miltsaq aqjail bhai jiav nail khal meeq nail jaolduq bhai, miltsaq bivq ceiv ceiv khi bhi jaol-a nail ngaol.
12 A bhai nee ngal-aq, aivq neq, aivq nail aqbhu dai khi aivq nail phaqyaq ma yaq juq iqsanl nail haqbhoil hel daiq tsaq khi jaq jaq daol daol bivq-a nail ngaol.
Moevq nail sil nail phaq kev lee-u phao, Yaolsai-i mail nl-a nail ganl
13 Moevq nail sivq nail al jaiq-ail jiav nail ngel-i mail, jaq jaq daol daol maq jiav dai, pevq lal-a nail ngaol. Al heel ngel-i mail, Iljiltuv nail milkhaoq dai khi Khaqnanq nail milkhaoq khe jaol nail juq neq, maq ya jaq maq ya daol mail, sil thao thaiq dai, pevq lal-a nail ngaol.
14 Yaolsai neq, Iljiltuv milkhaoq dai khi Khaqnanq milkhaoq khe tsaol-aq juq bhai gov gaoq khi ya-a nail phul juq iqsanl mail Phaqlaol nail haol bha oil laiq-a nail ngaol.
15 Iljiltuv milkhaoq khe tsaol-aq juq dai khi, Khaqnanq milkhaoq khe tsaol-aq juq neq, gov ul nail galduq phul gil lai bhiq-u phao, Yaolsai jaol nail bha lal khi mail ge nail: "Nv juq bhai jaq nail phaq bivq jaq lavq yaoq. Maq ya jaq maq ya daol dai, thaq bhi sil lavq. Nv juq ul jaq nail galduq phul maq aol yaoq-aol" dai, ge lai-a nail ngaol.
16 Yaolsai ge nail: "Nul juq phul maq aol haq neq, nul juq nail jaiqyaq juq tseel lavq yaoq. Jaiqyaq juq dai khi gov phal bhiq nail ngaol" dai, ge bhiq-a nail ngaol.
17 Aqyu juq gail jaiqyaq juq the khi, Yaolsai jaol nail bha thel laivq bhiq-a nail ngaol. Yaolsai gail aqyu juq nail moeqphaq, yaol, civqmeiv, niaoqnel dai khi moeqphaq laljieiv juq bhai gov nee mail phal bhiq-a nail ngaol. Aq-u khe kovq bhai milkhaoq yaq juq neq, aqyu juq nail jaiqyaq khal jaol nail iqsanl mail gov nee mail phal jaq-a nail ngaol.
18 Aq-u kovq gil lai khi, haoqnao khe kovq bhai neq, aqyu juq Yaolsai jaol nail bha gaoq lal khi ge nail: "Nv juq nail heeqphaq-ol, nv juq nail aqlavq bhai phul gail maq aol, jaiqyaq juq gail, naoq nail aqlavq bhai jaol gil-aiq nail bhai, naol heeq nia nail ngaol. Nil aq-il nv juq bhai, nv juq nail aqmaol dai khi miltsaq maq ngel nail neq, maq jiav yaoq-aol.
19 Nv juq bhai maq ya jaq maq ya daol dai, thaq bhi sil lavq. Nv juq nail miltsaq gail thaq bhi sunq-ail lavq. Nv juq nail aqmaol dai khi, nv juq nail miltsaq bhai ul lavq yaoq. Nv juq nail miltsaq dai khi, nv juq iqsanl mail Phaqlaol nail yaqkav jiovq nail ngaol. Nv juq maq ya sil dai maqkhaiq, nv juq nail miltsaq bhai kha jaq kha daol kivq dai maqkhaiq, gov nail aqiq bivq lavq yaoq" dai, ge bhiq-a nail ngaol.
20 Al heel ngel-i mail, Yaolsai neq, Iljiltuv milkhaoq khe jiav nail miltsaq iqsanl mail Phaqlaol nail galduq ul-a nail ngaol. Moevq nail sivq nail al jaiq-ail thel nail bhaq da nee, Iljiltuv milkhaoq yaq juq yaoq gaq yaoq-ao nee, yovqgav yovqgavq nail miltsaq ya gaoq-a nail ngel-i mail, miltsaq iqsanl mail, Phaqlaol nail nlmaoq pevq lal-a nail ngaol.
21 Al ovqtavq, Iljiltuv milkhaoq khe khal jaol nail juq iqsanl mail, Phaqlaol nail yaqkav pevq lal-a nail ngaol.
22 Thail hai ngaol-aoq, Iljiltuv nail philma juq neq, Phaqlaol khe jaq jaq daol daol juq ya nail ngel-i mail, aqyu juq neq, miltsaq gaoq nail maq loq-ail. Al heel ngel-i mail, Yaolsai neq, aqyu juq nail miltsaq maq ul dai, bhi jail-a nail ngaol.
23 Yaolsai milkhaoq yaq juq bhai ge bhiq-a nail: "Niil aq-il ngal nul juq dai khi, nul juq nail miltsaq juq bhai, heeqphaq nail galduq ul-aoq nail ngaol. Nul juq nail daiyal bhai, kha jaq kha daol nail galduq gov aqiq juq oil lal yaoq.
24 Gov gaiq khi oil kovq-u phao ngaq bhoil bhoil khi teevq bhoil neq, Phaqlaol bhai ya bivq nail ngaol. Jail nail gov juq neq, nul juq nail gov gov iq dai khi nul juq nail phaqyaq ma yaq jaq nail haqbhoil yuq yaoq" dai, ge bhiq-a nail ngaol.
25 Milkhaoq yaq juq ge nail: "Naol neq, nv juq nail doevqyeel bhai tsao jao-ai lavq-ao nail ngaol. Naol nv juq bhai neema tsaq haq neq, nv juq iqsanl, Phaqlaol nail yaqkav jiovq nail neema tsaq naol" dai, ge bhiq-a nail ngaol.
26 Al heel ngel-i mail, Yaolsai neq, Iljiltuv milkhaoq khe aqheeq allu juq iqsanl khe, ngaq bhoil teevq bhoil bhai, Phaqlaol jaol nail bha ya oil lavq naol dai, aolthaqkovqthaq oil dov-a nail ngaol. Aolthaqkovqthaq al neq, yanqgaol kev dai, ivq nail ngaol. Philma juq nail miltsaq juq taivq-ail aolthaqkovqthaq al bhai nee, ya jel-ail nail teevq-eel ngaol.
27 Ilsaqleiqlav nail tsaol-aq juq neq, Iljiltuv nail milkhaoq Gaolsinq nail miltsaq bhai daoqthaoq thaoq khi jaol-u phao, bhao lee ya lee-a nail nee ovqtavq, tsaol-aq juq gail mao dee dee lal-a nail ngaol.
28 Yaqkov neq, Iljiltuv milkhaoq bhai 17 kovq jaol khi, aivq nail doevqyeel neq, 147 kovq bhee nail ngaol.
29 Aivq ya sil nail aqjail jail lal-u phao, aivq nail yaqyov Yaolsai bhai khul khi ge bhiq-a nail: "Naol ngaq bhai gaiq-a haq neq, ngaq nail aqphaq iqgovq bhai aqlavq tsaoq bhoel khi, ngaq-i mail haoqnao naosaq khe hal nail daoq bhai nal daiq lavq yaoq. Naol ngaq bhai gaiq-a khi saljial ivq-ai nial dai, bhi dov lal nail haqbhoil, Iljiltuv milkhaoq bhai ngaq-ai maq duq pheeq-ail dai, saljial jaq lavq yaoq.
30 Ngal sil-u phao, Iljiltuv nail milkhaoq nee bavq dol laivq khi, aqphiq aqbhal juq nail luqdaol bha duq lai lavq yaoq" dai, ge bhiq-a nail ngaol. Yaolsai iqsanl, "Naol khoel nail khe-ai, nl naol" dai, dai, saljial jaq-a nail ngaol.
31 Thail hai ngaol-aoq, Yaqkov neq: "Nl naol dai khanq yaoq" dai, ge bhiq-a nail ngel-i mail, Yaolsai gail khanq bhiq-a nail ngaol. A bhai nee ngal-aq, Yaqkov neq, aivq nail iq thaiq duq uqhuq phao gaol beiv khi, jaol-a nail ngaol.