Iqmoeq 44
Yaolsai nail phul nail khaoqanq
1 Yaolsai neq, aivq nail ilkhaol khe bhi hel daiq phail thaq nail aqivq gaq bhai ge bhiq-a nail: "Aqyu juq nail daqiq bhai gov, aqyu juq thaoq dil nia dai, hoel bhoel bhiq yaoq. Al ovqtavq, yovqgavq nail phul yovqgavq iqsanl, daqiq lavqkhoel bhai oil bhoel kovq bhiq yaoq.
2 Jaq bheq bheq saq gaq nail daqiq bhai neq, ngaq nail phul nail khaoqanq dai khi aivq nail gov nail aqphoiq phul oil bhoel bhiq yaoq" dai, ge bhiq-a nail ngaol. Aqivq al gaq gail, aivq-i mail khal khoel nail khe-ai, nl-a nail ngaol.
3 Nqhao nqbhaq bhaq lal-u phao, Yaolsai nail tsaol-aq juq neq, aivq nail mailnail juq bhai, moeqphaq laljieiv nee teevq gaq khe-ai, bhi kovq lai-a nail ngaol.
4 Aqyu juq meenq nee mail mao-ail maq eq nail bhai kev lai-u phao, Yaolsai neq, aqivq al gaq bhai niail hai ge bhiq-a nail ngaol: "Aqyu juq nail haoqnao lavqtsail mail the yaoq. The kheel haq neq, 'Nul juq khul khi mail aqmeeq phaq nl lavq-a nail gaq bhai, aqdoil nl kovq bhiq-a nail-aiq.
5 Ngaq nail ilheel gaq nail phul nail khaoqanq, khul khi mail khoiq-a nail-aiq. Khaoqanq thoil khaoqanq neq, ngaq nail ilheel gaq daol khi, yaqhao khe pevq lal nail ganl bhai ge nail khaoqanq pevq nail ngaol. Nul juq doil dee dee nail phaq nl-aoq nail ngaol' dai, ge bhiq yaoq" dai, Yaolsai aqivq al gaq bhai khoel khi bhi lai-a nail ngaol.
6 Aqivq al gaq gail the khi the kheel-u phao, Yaolsai-i mail khal ge lavq-a nail khe-ai, ge bhiq-a nail ngaol.
7 Aq-u phao, aqyu juq ge nail: "Aqivq-ol, khul khi mail, naol thail hai ge nail-aiq. Nv juq neq, thoil heel nail ganl teevq pov gail maq nl daiq-al.
8 Nv juq nail daqiq khe moel-a nail phul gail, Khaqnanq milkhaoq nee mail gaoq oil kol leevq-a nail maq ngel ail laiq. Al heel ngel-i mail, nv juq neq, naoq nail ilheel nail ilkhaol khe phul heel juq bhai, khul khi mail gaoq khoiq heeq.
9 Nv juq nail lavqkhoel khe teevq gaq nail daq iq bhai phul nail khaoqanq thoil moel haq neq, aivq bhai deeq heivq yaoq. Jail nail nv juq gail naoq nail yaqkav jiovq gil nail ngaol" ge bhiq-a nail ngaol.
10 Aqivq al gaq ge nail: "Aqmeeq nial. Nul juq-i mail ge nail khe-ai, pevq nia dei-eiq. Thail hai ngaol-aoq, phul nail khaoqanq khoiq thaq nail gaq taivq-ail, ngaq nail yaqkav bhi jiovq khi jail nail juq bhai neq, phaiq bhiq naol" dai, ge bhiq-a nail ngaol.
11 Al heel ngel-i mail, aqyu juq neq, yovqgav yovqgavq nail daqiq juq miltsaq bhai lavqtsail mail he kha khi, phao daiq bhiq-a nail ngaol.
12 Aqivq al gaq neq, aqivq ivqsaq gaq nee mail daq-n khi, jaqbheq bheqsaq gaq bha kev dai, daqiq bhai hel daiq-u phao, Bheinqyaqminq nail daqiq bhai phul nail khaoqanq aol nail, ya moel-a nail ngaol.
13 Aq-u phao, aqyu juq neq, neema cov nail lavqkhoel nee, yovqgav yovqgavq nail phailkhaoq he pav-a nail ngaol. A bhai nee ngal-aq, moeqphaq laljieiv nail kovtavq bhai yalkav gaoq he dav khi, meenq bha gaoq tsao the kol laivq-a nail ngaol.
14 Yuldav dai khi aivq nail mailnail juq Yaolsai nail ilkhaol bha kev lee-u phao, Yaolsai neq, ilkhaol bhai jaol-ai haq nail ngaol. Aq-u phao, aqyu juq neq, Yaolsai nail sivtavq bhai miltsaq bha tuv dai, gaol beiv khi uqhuq thaoq bhiq-a nail ngaol.
15 Yaolsai ge nail: "Nul juq khul khi mail thail hai nl-a nail-aiq. Ngal neq, sivtavq phao khe pevq lal nail ganl bhai heeq kivq nail dai, nul juq maq heeq kivq ail laiq" dai, ge bhiq-a nail ngaol.
16 Aq-u phao, Yuldav ge nail: "Heeqphaq-ol, nv juq naoq bhai khal hai ge heeq meeq nial. Khal hai ge daiq bhiq heeq meeq nial. Nv juq maq nl-a nail ganl bhai salkhil khal hai bhi moel heeq meeq nial. Miqyail neq, nv juq-i mail nl-a nail oeqbal bhai dal lavq-a nail ngaol. Phul nail khaoqanq hal pov moel-a nail gaq taivq-ail maq ngel mail, nv juq iqsanl naoq nail yaqkav jiovq gil nail ngaol" dai, ge bhiq-a nail ngaol.
17 Thail hai ngaol-aoq, Yaolsai neq, "Ngal thail hai maq nl. Phul nail khaoqanq moel-a nail gaq taivq-ail, ngaq nail yaqkav ya jiovq nail ngaol. Jail nail juq neq, nul juq nail aqbhu jaol nail bha neesal ovq nail lavqkhoel nee, kovq lai yaoq" dai, ge kovq bhiq-a nail ngaol.
Bheiqyaqminq nail galduq, Yuldav thaoq hal-a nail ganl
18 Aq-u phao Yuldav neq, Yaolsai nail aqjail bhai jiiv bal laivq khi ge nail: "Heeqphaq-ol, naoq nail yaqkav bhai daoq teevq daoq bhi ge lavq-o. Naol neq, heeqphaq Phaqlaol khe-ai bhaqaoq eeq nail teevq gaq pevq khi ngaol-aoq, naoq nail yaqkav pevq nail ngaq bhai, neema thaq phail lavq dei-eiq.
19 Ngaq nail heeqphaq-ol, naol neq, naoq nail yaqkav pevq nail nv juq bhai, 'Aqbhu jaol-ai haq naol laiq. Jaqbheq jaol-ai haq naol laiq' dai, nal daiq lavq-a nail ngaol.
20 Nv juq gail, 'Joiqmaoq maoq lai-aoq nail aqbhu jaol-ai haq nail ngaol. Aqbhu joiqmaoq maoq lai khi, ya-a nail jaqbheq teevq gaq gail jaol nail ngaol. Jaqbheq al gaq nail algao neq, sil-aoq nail ngel-i mail, aivq nail aqma-i mail bhao-a nail yaqyov juq nail lavqkhoel bhai neq, aivq teevq gaq taivq-ail jail nail ngaol. Aivq nail aqbhu neq, aivq bhai gaiq-a dee dee nail ngaol' dai, ge kovq bhiq-a nail ngaol.
21 Aq-u phao, naol naoq nail yaqkav pevq nail nv juq bhai ge lavq-a nail: "Jaqbheq bheqsaq gaq bhai, niai hel leevq yaoq. Ngal aivq bhai moel movq nail ngaol' dai, ge lavq-a nail ngaol.
22 Nv juq gail: 'Jaq bheq neq, aqbhu nee mail maq bhi pav-ail kivq-ail. Aqbhu nee mail hevq pal-aivq haq neq, aqbhu neq, ya sil nail ngaol' dai, ge-a nail ngaol.
23 Aq-u phao naol neq, 'Nul juq nail jaqbheq maq kheq haq neq, ngal jaol nail bha teevq pov-ail thaq gaoq lee' dai, ge lavq-a nail ngaol.
24 Nv juq nail aqbhu jaol nail bha kovq kev lai-u phao, naoq-i mail ge lavq-a nail khe-ai, aqbhu bhai ge bhiq-a nail ngaol.
25 Aq-u phao, aqbhu ge nail: 'Nul juq ail khi ngadao juq nail haqbhoil gov gaoq ul-ail yaoq' dai, khoel lavq-a nail ngaol.
26 Thail hai ngaol-aoq, nv juq neq, 'Nv juq bhai thaq gaoq bhi ail lavq. Nv juq nail jaqbheq bheqsaq gaq, maq aol haq neq, uv thaiq nail al gaq nail sivtavq bha aol lai nail maq ya-ail. Nv juq nail jaqbheq bheqsaq gaq lee haq neq, nv juq ail naol" dai, aqbhu bhai ge bhiq-a nail ngaol.
27 Aq-u phao, aqbhu ge nail: "Nul juq heeq kivq nail khe-ai, ngaq nail khaqmaa neq, yaqyov nvq gaq bhao khi,
28 yaqyov teevq gaq neq, maq jaol yaoq-aol. Aivq bhai haqtsoiq jaiqyaq-i mail bhi he pav bhi he sav gil aoq-aol jaol-aq. Al heel ngel-i mail, niil aq-il kev dai, ngal aivq bhai maq ya moel-aoq nail ngaol.
29 Niil aq-il yaqyov niil gaq bhai nul juq gaoq hel-aivq khi teevq phaq phaq nee ya thaoq phuq haq neq, nv juq nail aqbhu neq, neema tsaoq pav-ail khi ya sil nail ngaol' dai, ge lavq-a nail ngaol.
30 Al heel ngel-i mail, heeqphaq-ol, jaqbheq maq aol mail, ngal ngaq nail aqbhu jaol nail bha maq kovq lai kivq-ail. Ngaq nail aqbhu nail doevqyeel neq, yaqyov thoil gaq nee tavq nail ngel-i mail,
31 jaqbheq maq hevq kol lavq thaq nail bhai aqbhu ya moel-u phao, aivq sil nail ngaol. Naoq nail yaqkav pevq nail nv juq neq, tsailkheel aqphul phul lee-aoq thaq nail nv juq nail aqbhu bhai, neema bhi noeq haq nail nee teevq gaq khe-ai, bhi sil heeq phaq-ail nl nail khe-ai, dul nail ngaol.
32 Al ovqtavq, ngal neq, nv juq nail jaqbheq nail galduq aqbhu bhai khanq-a nail gaq pevq nail ngaol. 'Ngaq nail jaqbheq bhai naol jaol nail bha maq hevq kol lavq haq neq, ngaq teevq yeel gil dai, oeqbal bhi thaq nail ngaol' dai, aqbhu bhai saljial jaq-ail ceevq-a nail ngaol.
33 Al heel ngel-i mail, heeqphaq-ol, ngaq nail jaqbheq nail haqbhoil, ngal naol jaol nail bha, yaqkav jiovq-ail ceevq naol. Ngaq nail jaqbheq bhai aivq nail algao juq nee bhi kovq lai lavq-o dai, naoq bhai thaoq hal nail ngaol.
34 Ngal neq ngaq nail jaqbheq maq aol mail, aqbhu jaol nail bha khal hai khi mail kovq lai heeq. Aqbhu-i mail ya daq nail noeq haq nail phaq bhai ngaq bhai maq moel movq-il" dai, thaoq hal bhiq-a nail ngaol.