Iqmoeq 42
Yaolsai nail algao juq Iljiltuv milkhaoq bha ail-a nail ganl
1 Yaqkov neq, Iljiltuv milkhaoq bhai gov jiav nail dai, gaiq nia-u phao, aivq nail yaqyov juq bhai ge bhiq-a nail: "Nul juq teevq gaq nee teevq gaq hel daiq hel daiq-ail, khul khi mail jaol nail-aiq.
2 Iljiltuv milkhaoq bha gov jiav nail dai, ngal ya gaiq-a nail ngaol. Ngadao juq maq ya sil dai, aqdoevq ya doevq nail haqbhoil a bhai ail khi mail ul-ail yaoq" dai, khoel bhiq-a nail ngaol.
3 A bhai nee ngal-aq, Yaolsai nail algao 10 gaq neq, gov ul nail haqbhoil, Iljiltuv milkhaoq bha dov ail-a nail ngaol.
4 Thail hai ngaol-aoq, Yaqkov neq, Yaolsai nail jaqbheq Bheinqyaqminq bhai teevq phaq ga nav pevq lal nail bhai gee sil nail ngel-i mail, aivq nail algao juq nee mail maq bhi ail-al.
5 Khaqnanq milkhaoq teevq khaoq khaoq lao bhai, moevq nail sivq nail kev lee bhiq thaq nail ngel-i mail, Yaqkov nail yaqyov juq neq, yu milkhaoq gov ul nail juq nee mail teevq gaq khe-ai, Iljiltuv milkhaoq bhai ail kev-a nail ngaol.
6 Yaolsai Iljiltuv milkhaoq bhai uv thaiq nail gaq pevq nail ngel-i mail, gov ul lee nail tsaol-aq juq iqsanl bhai, gaoq bhiq-a nail ngaol. Aq-u phao, Yaolsai nail algao juq iqsanl mail lee kev khi, Yaolsai nail sivtavq bhai peevqceevq kovdoiq doiq-a nail nee ovqtavq, maivphaoq miltsaq bhai gaol bav khi mail jaol nail ngaol.
7 Yaolsai neq, aivq nail algao juq bhai moel-u phao, heeq nia khi ngaol-aoq, maq heeq nia nail khe-ai dan khi, "Nul juq khaq bha nee mail lee-a nail-aiq" dai, aqkav kav dai nal daiq bhiq-a nail ngaol. Aqyu juq ge nail: "Nv juq neq, jaq jaq daol daol ul nail galduq Khaqnanq milkhaoq nee mail lee-a nail ngaol" dai, ge kovq bhiq-a nail ngaol.
8 Yaolsai neq, aivq nail algao dai, heeq nia khi ngaol-aoq, aqyu juq neq, Yaolsai bhai maq heeq nia-ail.
9 Yaolsai neq, jel lal-a nail mee nia kovq khe aivq nail algao juq nee tavq lai khi, aivq-i mail nvmav mav-a nail ganl bhai noeq dov lal bhiq-a nail ngaol. Aivq ge bhiq-a nail: "Nul juq neq, milkhaoq bhai khoiq hel daiq lee thaq nail tsaol-aq niil. Nv juq nail milkhaoq khe gaq bhaq nail phaq bhai, khoiq hel daiq lee thaq nail juq pevq nail ngaol" dai, ge bhiq-a nail ngaol.
10 Aqyu juq ge nail: "Maq ngel-ail, nv juq nail heeqphaq-ol, naoq nail yaqkav pevq nail nv juq neq, jaq jaq daol daol ul nail galduq taivq-ail, lee-a nail ngaol.
11 Nv juq neq, aqbhu teevq bhu nee mail doevq lee-a nail aqivq jaqbheq juq pevq nail ngaol. Naoq nail yaqkav pevq nail nv juq neq, milkhaoq bhai khoiq hel daiq lee-a nail juq maq ngel ail. Aqsee aqdaol daol dai, doevq nail juq ngaol" dai, ge bhiq-a nail ngaol.
12 Yaolsai ge nail: "Nul juq ge nail neq, maq ngel-ail. Nv juq nail milkhaoq khe gaq bhaq nail phaq bhai khoiq hel daiq lee thaq nail niil" dai, ge bhiq-a nail ngaol.
13 Aq-u phao, aqyu juq ge nail: "Naoq nail yaqkav pevq nail nv juq neq, Khaqnanq milkhaoq bhai jaol nail aqbhu teevq gaq nee doevq lee-a nail yaqyov 12 gaq pevq nail ngaol. Jaq bheq teevq gaq neq, sil khi jaqbheq bheqsaq gaq neq, niil aq-il aqbhu nee mail teevq gaq khe-ai, bhi jaol ail ceevq-a nail ngaol" dai, ge bhiq-a nail ngaol.
14 Thail hai ngaol-aoq, Yaolsai teevq pov gaoq ge bhiq-a nail: "Ngaq-i mail ge nail khe-ai, nul juq neq, khoiq hel daiq lee thaq nail tsaol-aq juq ngaol.
15 Nul juq-i mail ge nail tsaq nail maq tsaq nail neq, niail hai tsao tsel daiq nail ngaol. Nul juq nail jaqbheq bheqsaq gaq niil niai maq khul leevq-u kev dai, nul juq milkhaoq niil khaoq nee, maq ya dov lai-ail dai, ngal Phaqlaol nail doevqyeel nee khanq khi ge nail ngaol.
16 Nul juq nail lavqkhoel khe teevq gaq bhai phaiq kovq bhiq khi, nul juq nail jaqbheq bhai ya khul leevq nail ngaol. Nul juq nail daoq, tsaq nail maq tsaq nail bhai ya heeq kivq dai, jaol-ail ceevq nail juq neq, thaonq bhai ya laol thaiq gai nail ngaol. Nul juq nail jaqbheq maq khul leevq haq neq, nul juq neq, maldil khoiq hel daiq lee thaq nail juq ngaol dai, ngal heeqphaq Phaqlaol nail doevqyeel nee khanq khi ge nail ngaol" dai, ge bhiq-a nail ngaol.
17 Aqyu juq bhai 3 n bhee dai, thaonq bhai laol thaiq gai bhiq-a nail ngaol.
18 3 n bhee lal-u phao, Yaolsai neq, aqyu juq bhai ge bhiq-a nail: "Ngal neq, Miqyail bhai gee sil khi ev nail gaq ngaol. Ngaq-i mail ge nail khe-ai, nl haq neq, nul juq aqdoevq ya doevq nail ngaol.
19 Nul juq aqsee aqdaol daol nail tsaol-aq ngaol dai, salkhil pevq nia nail galduq, nul juq nail lavqkhoel khe, teevq gaq niil niai khe thaonq bhai ya jaol-ail ceevq nail ngaol. Jail nail juq neq, moevq nail sivq nail nul juq nail phaqyaq ma yaq nail haqbhoil, gov ul khi kovq lai yaoq.
20 Thail hai ngaol-aoq, nul juq nail jaqbheq bheqsaq gaq ngal jaol nail bhai hel leevq yaoq. Nul juq thail hai nl haq neq, nul juq nail daoq tsaq-ail nial dai, ngal heeq kivq nail ngaol. Al ovqtavq, nul juq gail, maq ya sil yaoq-aol" dai, ge bhiq-a nail ngaol. Aqyu juq gail, Yaolsai-i mail ge nail khe-ai nl nail bhai, neema tsaq nail ngaol.
21 Aq-u phao, aqyu juq teevq gaq nee teevq gaq ge nail: "Ngadao nail jaqbheq bhai khal nl bhiq-a nail khe-ai, ngadao juq bhai maldil kev lee-aoq nial. Aivq bhai gaoq haq nail galduq, ngadao juq bhai thaoq hal khi ngaol-aoq, ngadao juq neq, aivq-i mail neema noeq haq nail bhai heeq kivq-ai thaq khi, maq gaoq haq bhiq-al. Al heel ngel-i mail, niil aq-il, ngadao juq gaoq ya daq kovq nail niil" dai, ge pheel jaq-a nail ngaol.
22 Aq-u phao, Lulbheiq neq, "Ngal nul juq-ai, yaqyov al gaq bhai thaq nl laiq dai, ge khi ngaol-aoq, nul juq maq nal daiq-a nail, maq ngel-ail laiq. Al heel ngel-i mail, niil aq-il ngadao juq gaoq ya daq kovq nail niil" dai, ge bhiq-a nail ngaol.
23 Aqyu juq teevq gaq nee teevq gaq, khal ge nail iqsanl bhai, Yaolsai heeq nia nail ngaol. Aivq neq, aqyu juq nee mail daoq ge tsaoq-u phao, daoq oil dov nail gaq bhai yuq khi mail ge tsaoq nail ngel-i mail, aqyu juq teevq gaq nee teevq gaq, ge tsaoq nail bhai maq heeq nia-ail dai, dul nail ngaol.
24 A bhai nee ngal-aq, Yaolsai neq, aqyu juq jaol nail nee mail dov ail khi, nioil-a nail ngaol. Aivq nioil gaq khi aqyu juq jaol nail bha gaoq aol lai-a nail nee ovqtavq, aqyu juq nail lavqkhoel khe, Silmiqoq bhai tsel khi aqyu juq nail sivtavq bhai phee thaiq-a nail ngaol.
Yaolsai nail algao juq Khaqnanq milkhaoq bha kovq lai-a nail ganl
25 Yaolsai neq, "Aqyu juq nail daqiq bhai gov teevq bhee hoel bhoel bhiq khi, aqyu juq-i mail bivq-a nail phul iqsanl, aqyu juq nail daqiq bhai gaoq oil bhoel bhiq nail nee ovqtavq, gailkhaol bhai jaq nail haqbhoil gail, oil bhoel bhiq yaoq" dai, aivq nail yaqkav juq bhai daoq bivq-a nail khe-ai, aqyu juq iqsanl, nl-a nail ngaol.
26 Yaolsai nail algao juq gail, moeqphaq laljieiv nail kovtavq bhai gov nail daqiq kavq dav khi mail, ail dov-a nail ngaol.
27 Nqkivq kivq lee khi, gaq naq naq nail yanq kev lal-u phao, aqyu juq nail lavqkhoel khe teevq gaq neq, moeqphaq laljieiv bhai gov bhi jaq-ail nail dai khi aivq nail daqiq he phao-u phao, daqiq nail moeqkhoeq-ai, aivq nail phul aol nail bha ya moel-a nail ngaol.
28 Aivq neq, aivq nail aqivq jaqbheq juq bhai, "Ngaq nail phul gaoq oil bhoel lavq thaq-il" dai, ge khi, gov nail daqiq khe phul oil daiq bhiq-a nail ngaol. Aq-u phao, aqyu juq tsaoq deel-nq ail bhiq khi, gee sil nail lavqkhoel teevq gaq nee teevq gaq, "Miqyail neq, ngadao juq bhai khul nl lavq thaq nail meeq" dai, ge nail ngaol.
29 Khaqnanq Milkhaoq bhai jaol nail aqyu juq nail aqbhu Yaqkov jaol nail bha kovq kev lai-u phao, khal pevq lal-a nail ganl iqsanl, aivq bhai ge bhiq gil-a nail ngaol.
30 Aqyu juq ge nail: "Iljiltuv milkhaoq bhai uv thaiq nail gaq neq, nv juq bhai daoq aqkav kav dai, ge tsaoq lal nail ngaol. Nv juq bhai, aqyu juq nail milkhaoq khe gaq bhaq nail phaq bhai khoiq hel daiq lee thaq nail tsaol-aq dai, ge lavq-a nail ngaol.
31 Thail hai ngaol-aoq, nv juq aivq bhai, 'Nv juq neq, Aqsee aqdaol daol nail juq ngaol. Khoiq hel daiq lee-a nail juq maq ngel ail.
32 Aqbhu teevq bhu nee mail doevq lee-a nail, aqivq jaqbheq 12 gaq ngaol. Teevq gaq neq sil khi, jaqbheq bheqsaq gaq neq, aqbhu nee mail Khaqnanq milkhaoq bhai jaol-ail ceevq-a nail ngaol' dai, ge bhiq-a nail ngaol.
33 Milkhaoq al khaoq bhai uv thaiq nail gaq ge nail: 'Nul juq aqsee aqdaol daol nail tsaol-aq ngel maq ngel dai, ya heeq kivq dai, niail hai ya khi nail ngaol. Nul juq nail lavqkhoel khe teevq gaq, ngal jaol nail bha ya bhi jaol-ail ceevq nail ngaol. Jail nail juq neq, gov ul khi, nul juq nail phaqyaq ma yaq jaol nail bha kovq lai yaoq.
34 Nul juq nail jaqbheq bheqsaq gaq ngal jaol nail bha hel leevq yaoq. Thail hai nl haq neq, nul juq aqsee aqdaol daol nail tsaol-aq pevq nail bhai maqkhaiq, milkhaoq bhai khoiq hel daiq lee thaq nail tsaol-aq maq ngel nail bhai maqkhaiq, ngal ya heeq kivq nail ngaol. Thaonq bhai aol nail nul juq nail mailnail gail, nul juq bhai gaoq bivq kovq nail ngaol. Al ovqtavq, nul juq milkhaoq niil khaoq bhai jaol khi jaiqgaiq jaiq kha kha nail ya nail ngaol' dai, ge lavq-a nail ngaol.
35 A bhai nee ngal-aq, aqyu juq gov nail daqiq thaoq hoel-u phao, yaoq gaq yaoq-ao nee, yovqgavq nail phul yovqgavq nail daqiq-ai aol nail bhai ya moel-u phao, aqbhu nee mail teevq gaq khe-ai, yaqyov juq iqsanl mail tsaoq deel-nq ail bhiq-a nail ngaol.
36 Aqyu juq nail aqbhu Yaqkov ge nail: "Nul juq neq, ngaq nail yaqyov juq bhai teevq gaq gil lai haq neq, teevq gaq bhi sunq ail-aiq nail laiq. Yaolsai gail maq jaol, Silmiqoq gail maq jaol, niil aq-il gail Bheinqyaqminq bhai gaoq hel-aivq yaoq nail laiq. Iqsanl mail neq, ngaq bhai thel gil lee-aoq thaq nial" dai, ge bhiq-a nail ngaol.
37 Aq-u phao, Lulbheiq ge nail: "Bheinqyaqminq bhai, aqbhu jaol nail bha maq hevq kol lavq kivq haq neq, ngaq nail yaqyov nvq gaq bhai heivq nail ya nail ngaol. Aivq ngaq nail aqlavq lavqkhoel-ai av lavq yaoq. Aivq bhai ngal gaoq hevq kol lavq naol dai, ngal saljial jaq nail ngaol" dai, ge bhiq-a nail ngaol.
38 Thail hai ngaol-aoq, Yaqkov ge nail: "Ngaq nail yaqyov bhai nul juq nee mail teevq gaq khe-ai, maq bhi ail movq-ail. Aivq nail algao sil khi aivq teevq gaq jail ail teevq-eel ngaol. Ngal neq, joiqmaoq maoq lee-aoq nail ngaol. Maq yeivq-ail khi, gailphail lail ma bhai aivq teevq phaq ga nav nee mail ya thaoq phuq haq neq, ngaq nail neema noeq haq dee dee nail lavqkhoel, tsaoq pav-ail khi mail sil lee nail ngaol" dai, ge bhiq-a nail ngaol.