Iqmoeq 39
Yaolsai dai khi Paoltilphaq nail khaqma
1 Ilsaqmeiqlav nail tsaol-aq al juq neq, Yaolsai bhai Iljiltuv milkhaoq bha hel-aivq khi, a bhai khe heeqphaq Phaqlaol nail ganl bhai hel daiq phail nail aqivq aqtsu teevq gaq pevq nail, Paoltilphaq bhai gaoq bhiq-a nail ngaol.
2 Heeqphaq Miqyail neq, Yaolsai nee teevq gaq khe-ai jaol nail ngel-i mail, aivq nail ilheel Iljiltuv nail tsaol-aq al nail ilkhaol bhai ganl nl-u phao, aivq-i mail khal nl nail iqsanl mail pevq lai nail ngaol.
3 Heeqphaq Miqyail neq, aivq nee mail teevq gaq khe-ai jaol khi, aivq-i mail khal nl nail iqsanl mail pevq lai nail aivq nail ilheel gaq pevq nail Paoltilphaq ya moel-a nail ngaol.
4 Paoltilphaq neq, Yaolsai bhai neekhaol sil dee dee nail ngel-i mail, aivq nail ilkhaol bhai hel daiq phail nail gaq bhi jiovq-a nail nee ovqtavq, aivq-i mail khal jiav nail ildaoq maoqgaiq dai khi, ilkhaol iqsanl mail bhai bhi uv thaiq gil-a nail ngaol.
5 Aq-u nee mail daq-n khi, Heeqphaq Miqyail neq, Yaolsai bhaq da nee, Iljiltuv nail tsaol-aq al gaq nail ildaoq bhai maqkhaiq, aivq-i mail nl jaq keivq daol nail phao maqkhaiq, geeqlaoq bivq-a nail ngaol.
6 Paoltilphaq neq, aivq khe khal jiav nail yalkav iqsanl mail, Yaolsai bhai av bhiq gil-ai thaq nail ngaol. Aivq-i mail jaq nail aqjal nee jaiq-ail thaq nail neq, khul teevq phaq bhai iqsanl khaoq maq ya laol-ail.
Yaolsai neq, aivq nail aqmaol al jaiq-ail meeq khi, al jaiq-ail hel daiq meeq nail teevq gaq pevq nail ngel-i mail,
7 Paoltilphaq nail khaqma neq, ya lai bhiq khi, "Ngaq-ai nee mail iq thaiq lal yaoq" dai, Yaolsai bhai jalmul mul-a nail ngaol.
8 Thail hai ngaol-aoq, Yaolsai jil ha nail lavqkhoel nee ge nail: "Ngaq nail ilheel neq, ngaq bhai iqsanl mail av-ai lavq khi, aivq-i mail khal jiav nail iqsanl mail hel daiq phail nail galduq ngaq bhai khoel-ai lavq thaq nail ngaol.
9 Al ovqtavq, ilkhaol niil il bhai aivq bhaqaoq jiav-u khe-ai ngal gail jiav nail ngaol. Ngaq nail ilheel neq, aivq nail khaqma nee jaiq-ail haq neq, ngaq bhai maq av-ai lavq thaq nail khul teevq phaq gail maq jiav ail. Al heel ngel-i mail, ngal neq, khal hai khi nii dai nail haqeiv nail phaq nl khi, Miqyail bhai khal hai khi oeqbal nl heeq" dai, ge bhiq-a nail ngaol.
10 Paoltilphaq nail khaqma neq, Yaolsai bhai yaoq n yaoq n nee jalmul mul khi ngaol-aoq neq, khaqmao gail jil ha bhiq-a nail ngaol.
11 Teevq n kev lal-u phao, yaqkav juq teevq gaq gail maq jaol nail aqyanq bhai Yaolsai neq, aivq nail ganl nl nail galduq ilkhaol bhai aol lai-a nail ngaol.
12 Aq-u phao, Paoltilphaq nail khaqma neq, Yaolsai nail haqphal jiavq boev bhai he thaiq-ai thaq khi "Ngaq-ai nee mail teevq gaq khe-ai iq thaiq lal yaoq" dai, ge bhiq-a nail ngaol. Thail hai ngaol-aoq, Yaolsai neq, aivq nail haqphal jiavq boev he loev-ail ceevq khi, ilkhaol lavqniil phao, tsaoq dol-aivq-a nail ngaol.
13 Yaqmai-aq al gaq aivq nail aqlavq lavqkhoel bhai haqphal jiavq boev bhi jiav-ail ceevq khi, Yaolsai ilkhaol lavqniil phao tsaoq dol-aivq-a nail bhai ya moel-u phao,
14 aivq nail yaqkav juq bhai gul khi ge bhiq-a nail: "Niaiq-ai hel daiq daiq. Nul juq nail ilheel-i mail hevq thaq-ai thaq nail Heiqbhail nail tsaol-aq niil gaq, ngaq bhai aqdoil nl lal-a nail ngaol. Aivq neq, ngaq nail iq thaiq duq bha aol lal khi, ngaq-ai nee mail iq thaiq nail dai noeq nail bhaq da nee, ngal gul-a nail ngaol.
15 Ngal gul-a nail bhaq da nee aivq neq, aivq nail haqphal jiavq boev ngaq nail aqlavq bhai bhi jiav-ail ceevq khi, tsaoq dol-aivq-a nail ngaol" dai, ge bhiq-a nail ngaol.
16 Aivq nail yovjil ilkhaol bha maq kovq kev lee-u kev dai, aivq neq, Yaolsai nail jiavq boev he thaq gai-a nail ngaol.
17 Aivq nail yovjil kov kev lee-u phao, "Naoq-i mail hevq thaq-ai thaq nail Heiqbhail nail tsaol-aq yaqkav al gaq neq, ngaq nail iq thaiq duq bha aol lal khi ngaq bhai aqdoil nl nail dai, lai jai-a nail ngaol.
18 Thail hai ngaol-aoq neq, ngaq-i mail gul-a nail ngel-i mail, aivq nail haqphal jiavq boev bhi jiav ail ceevq khi, tsaoq dol-aivq-a nail ngaol" dai, ge bhiq-a nail ngaol.
19 Aq-u phao, Paoltilphaq neq, aivq nail khaqma-i mail ge nail ganl bhai ya gaiq-u phao, neema phail dee dee lal bhiq-a nail ngaol.
20 A bhai nee ngal-aq, aivq Yaolsai bhai nieivq khi heeqphaq bhai nl bheeq khi mail laol-ai thaq nail thaonq bha, bhi nieivq bhoel-a nail ngaol.
Yaolsai neq, thaonq bhai ya aol khi ngaol-aoq,
21 Heeqphaq Miqyail aivq nee mail teevq gaq khe-ai jaol khi, aivq bhai gaoq haq gaiq-a nail ngel-i mail, thaonq khe aqivq gaq nail maivneev bhai, ya lai-a nail gaq pevq lal-a nail ngaol.
22 Thaonq khe aqivq al gaq neq, Yaolsai bhai thaonq khe aol nail juq yaoq gaq yaoq-ao nee mail bhai, bhi hel daiq phail-a nail nee nee ovqtavq, thaonq khe ganl iqsanl mail bhai, bhi hel daiq phail gil-a nail ngaol.
23 Heeqphaq Miqyail neq, Yaolsai nee mail teevq gaq khe-ai jaol nail ngel-i mail, ganl iqsanl mail bhai pevq lai nail bhaq da nee, thaonq khe aqivq al gaq neq, Yaolsai bhai ganl iqsanl mail neema thaq tsaol nail lavqkhoel, av bhiq-a nail ngaol.