Iqmoeq 29
Laqbhanq nail ilkhaol bha Yaqkov ail kev-a nail ganl
1 Yaqkov neq, gailkhaol gaoq dov ail khi, nlma dov khoeq phao khe milkhaoq bha, lai kev-a nail ngaol.
2 Milkhaoq al khaoq bhai neq, daiyal bhai yaol 3 munl jaol jaoq-ai thaq nail ulcuvq lovduq bhai ya moel-a nail ngaol. Thail hai jaol jaoq-ai thaq nail neq, yaol juq bhai ulcuvq lovduq al duq khe ulcuvq ya bhi daol nail ngel-i mail ngaol. Ulcuvq lovduq nail moeqkhoeq bhai neq, lovmav heeq ma-i mail pheeq thaiq-ai thaq nail ngaol.
3 Yaol mavq mav juq ulcuvq lovduq nail aqjail bhai kev lee gil-u phao, yaol lovq nail juq neq, lovmav al heeq bhai ya bavq ha khi ulcuvq ya keivq daol bhiq nail ngaol. Gaq lai haq neq, lovmav al heeq ulcuvq lovduq nail moeq khoeq bhai, gaoq ya bavq pheeq ail ceevq nail ngaol.
4 Yaqkov neq, yaol lovq nail juq bhai, "Aqivq jaqbheq juq-ol, nul juq khaq bha nee mail lee-a nail-aiq" dai, nal daiq bhiq-a nail ngaol. Aqyu juq gail, "Haqlanq nail meenq nee mail lee-a nail ngaol" dai, ge kovq bhiq-a nail ngaol.
5 Yaqkov neq, "Naqhaoq nail aqjievq Laqbhanq bhai heeq kivq ail laiq" dai, gaoq nal daiq bhiq-a nail ngaol. Aqyu juq gail, "Nv juq heeq kivq naol" dai, ge kovq bhiq-a nail ngaol.
6 "Aivq jaol hal dov naol laiq" dai, Yaqkov gaoq nal daiq bhiq-a nail ngaol. Aqyu juq ge nail: "Dov naol. Hel daiq daiq, yaol mavq mav nee mail lee thail thaiq nail gaq neq, aivq nail yaqmiq Laqkheiqlal ngaol" dai, ge bhiq-a nail ngaol.
7 Yaqkov ge nail: "Niil aq-il neq, n-gaol laol ma ngel-ai haq nail ngel-i mail, yaol mavq mav bhai bhi jil lai nail aqyanq maq ngel-ai haq-al. Nul juq yaol mavq mav bhai ulcuvq bhi daol gaq haq neq, gav jaq duq bhai gaoq bhi jaq-ail yaoq" dai, ge bhiq-a nail ngaol.
8 Aq-u phao, aqyu juq ge nail: "Nv juq thail hai maq nl kivq ail. Yaol mavq mav juq iqsanl mail niil niai kev gil lee khi mail pultavq, yaol lovq nail juq neq, lovmav bavq ha khi ulcuvq ya keivq daol bhiq nail ngaol" dai, ge bhiq-a nail ngaol.
9 Yaqkov neq, yaol lovq nail juq nee mail daoq ge tsaoq thail thaiq-u phao, Laqkheiqlal aivq nail aqbhu nail yaol mavq mav nee mail kev lee-a nail ngaol. Laqkheiqlal iqsanl, yaol lovq nail gaq ngaol.
10 Yaqkov neq, aivq nail algoi Laqbhanq nail yaqmiq Laqkheiqlal nee mail yaol mavq mav lee nail bhai ya moel-u phao, ulcuvq lovduq bha ail khi, lovmav bavq phail bhiq-a nail nee ovqtavq, Laqbhanq nail yaol juq bhai ulcuvq bhi daol-a nail ngaol.
11 A bhai nee ngal-aq, aivq neq, Laqkheiqlal bhai moeq saol saol khi aqthel nioil dov-a nail ngaol.
12 Aivq ge nail: "Ngal neq, Leiqbhailkavq nail yaqyov ngaol. Naoq nail aqbhu nail aqivq jaqbheq aqthel ngaol" dai, Laqkheiqlal bhai ge bhiq-a nail ngaol. Al heel ngel-i mail, Laqkheiqlal neq, tsaoq kol laivq khi, aivq nail aqbhu bhai ge bhiq lai-a nail ngaol.
13 Laqbhanq neq, aivq nail aqdul Yaqkov nail ganl ya gaiq-u phao, aivq jaol nail bha tsaol-aivq khi phal thaiq nail lavqkhoel moeqsaol saol bhiq-a nail nee ovqtavq, ilkhaol bha khul lavq-a nail ngaol. Yaqkov neq, khal pevq lal-a nail ganl iqsanl mail ge gil bhiq-a nail ngaol.
14 Aq-u phao Laqbhanq neq, "Naol neq maldil dai ngaq nail aqsivq haqjoil bhai tavq nail gaq, ngel lao thaq nail niil" dai, ge bhiq-a nail ngaol.
Yaqkov, Leiqaq dai khi Laqkheiqlal bhai hevq-a nail ganl
Yaqkov neq, aivq nail al goi nail ilkhaol bhai bhala teevq heeq galduq jaol-a nail ngaol.
15 Aq-u phao, Laqbhanq aivq bhai ge bhiq-a nail: "Naol neq, ngaq nail aqivq jaqbheq pevq khi ngaol-aoq, ngaq nail galduq ganl aqnieivq-ail nl nail neq, maq tsaq ail. Naoq-i mail oil movq nail aqphoiq bhai ge lavq yaoq" dai, ge bhiq-a nail ngaol.
16 Laqbhanq bhai yaqmiq nvq gaq jaol nail ngaol. Yaqmiq aqivq gaq nail aqmil neq, Leiqaq dai khul khi, yaqmiq jaqbheq gaq nail aqmil neq, Laqkheiqlal dai khul nail ngaol.
17 Leiqaq neq, maivneev aqmeeq ngaol. Thail hai ngaol-aoq, Laqkheiqlal neq, aqmaol hel daiq meeq khi maivphaoq iqsanl, gaiq-a lal heeq phaq-ail pevq nail ngaol.
18 Yaqkov neq, Laqkheiqlal bhai gaiq-a nail ngel-i mail, Laqbhanq bhai ge bhiq-a nail: "Naoq nail yaqmiq Laqkheiqlal bhai bhi hevq lavq haq neq, naoq bhai ganl 7 kovq nl bhiq nail ngaol" dai, ge bhiq-a nail ngaol.
19 Laqbhanq ge nail: "Laqkheiqlal yaoq gaq yaoq bhai bhi maol ail nail nee mail jaiq dai neq, naoq bhai bhi maol ail nail meeq jaiq nail ngaol. Ngaq-ai nee mail jaol yaoq" dai, ge bhiq-a nail ngaol.
20 Yaqkov neq, Laqkheiqlal nail galduq 7 kovq bhee dai, ganl nl-a nail ngaol. Thail hai ngaol-aoq, aivq Laqkheiqlal bhai gaiq-a nail ngel-i mail, aqyanq al juq iqsanl mail teevq yanq lal yanq teevq-eel dai, noeq nail ngaol.
21 Aivq Laqkheiqlal bhai hevq nail aqyanq kev lal-u phao, aivq Laqbhanq bhai ge bhiq-a nail: "Aqyanq bhee lal-aoq nail ngaol. Naoq nail yaqmiq bhai bhi hevq lavq yaoq" dai, ge bhiq-a nail ngaol.
22 A heel ngel-i mail, Laqbhanq neq khaqma hevq nail aqbhee lav sav khi yaoq gaq yaoq-ao nee bhai khul kev bhiq-a nail ngaol.
23 Thail hai ngaol-aoq, aq-u nqkiv Laqbhanq neq, Laqkheiqlal nail haqbhoil Leiqaq bhai, Yaqkov jaol nail bha hevq bhoel laivq bhiq khi, Yaqkov neq, Leiqaq nee mail iq thaiq-a nail ngaol.
24 (Laqbhanq neq, aivq nail yaqkav Sillaqphal bhai Leiqaq-ai bhi tsao jao-ai nail galduq bivq-a nail ngaol.)
25 Nqbhaq bhaq lal-u phao, Yaqkov neq, aivq nail khaqma Leiqaq pevq nail bhai heeq nia-a nail ngaol. Aivq Laqbhanq jaol nail bha lai khi neema phail nail lavqkhoel nee gul bhiq-a nail: "Khul khi mail naol niail hai nl lavq-a nail-aiq. Ngal neq, Laqkheiqlal ya nail galduq ganl nl-a nail ngaol. Ngaq bhai khul khi mail goiqbhaoq bhaoq lavq-a nail-aiq" dai, nal daiq bhiq-a nail ngaol.
26 Aq-u phao, Laqbhanq ge nail: "Niil jaolduq niil duq bhai neq, yaqmiq aqivq gaq maq maol ail dai, yaqmiq jaqbheq gaq maol ail nail aolsaolkovq maq jiav ail.
27 Naol ngaq bhai 7 kovq ganl gaoq nl lavq haq neq, khaqma hevq nail aqbhee jel-ail khi jaol n teevq jao nail lavqkhoel Laqkheiqlal bhai iqsanl, gaoq bhi hevq naol" dai, ge bhiq-a nail ngaol.
28 Yaqkov gail neema tsaq nail ngaol. Khaqma hevq nail aqbhee jel-ail khi, jaol n teevq jao bhee lal-u phao, Laqbhanq neq, aivq nail yaqmiq Laqkheiqlal, Yaqkov bhai bhi maol ail-a nail ngaol.
29 (Laqbhanq neq, aivq nail yaqkav Bhillaqhaq bhai Laqkheiqlal-ai bhi tsao jaol-ai nail galduq bivq-a nail ngaol.)
30 Al heel ngel-i mail, Yaqkov neq, Laqkheiqlal nee gail, iq thaiq tavq-a nail ngaol. Aivq neq, Laqkheiqlal bhai Leiqaq nee maqtsil, gaiq-a jaiq nail ngaol. A bhai nee ngal-aq, aivq Laqbhanq bhai 7 kovq ganl gaoq nl bhiq-a nail ngaol.
Yaqkov yaqmiq yaqyov ya-a nail ganl
31 Yaqkov neq, Leiqaq bhai maq gaiq-a ail dai, Heeqphaq Miqyail heeq nia-u phao, Leiqaq bhai yaq bhi jaol lee-a nail ngaol. Thail hai ngaol-aoq, Laqkheiqlal bhai neq, yaq maq jaol ail.
32 Maq maoq maq heel lal nail lavqkhoel bhai, Leiqaq bhai yaq ceiv lai khi yaqyov teevq gaq bhao-a nail ngaol. Aivq ge nail: "Heeqphaq Miqyail neq, ngaq-i mail haq nail aoq nail bhai moel-aoq nail ngaol. Niil aq-il ngaq nail yovjil neq, ngaq bhai gaiq-a lavq naol" dai, ge khi yaqyov al gaq bhai Lulbheiqa dai, mil bhiq-a nail ngaol.
33 Leiqaq neq, haoqnao teevq gaq yaq gaoq ceiv lai khi, yaqyov teevq gaq gaoq bhao-a nail ngaol. Aq-u phao, aivq ge nail: "Ngaq nail yovjil ngaq bhai maq gaiq-a ail dai, Heeqphaq Miqyail gaiq nia-aoq nail ngel-i mail, yaqyov niil gaq bivq lavq-a nail ngaol" dai, ge khi yaqyov al gaq bhai Silmiqoqb dai, mil bhiq-a nail ngaol.
34 A bhai nee ngal-aq, haoqnao teevq gaq yaq gaoq ceiv lai khi, aivq yaqyov teevq gaq gaoq bhao khi ge nail: "Ngaq nail yovjil nail galduq yaqyov 3 gaq bhao bhiq-ao nail ngel-i mail, aivq neq, ngaq bhai gaq-u phao nee maqtsil, ya lai nail ngaol" dai, ge khi yaqyov al gaq bhai Leiqbhilc dai, mil bhiq-a nail ngaol.
35 Haoqnao teevq gaq yaq ceiv lai khi, yaqyov teevq gaq gaoq bhao-a nail ngaol. Aivq ge nail: "Niil pov neq, ngal Heeqphaq Miqyail bhai tsiq eeq nail ngaol" dai, ge khi yaqyov al gaq bhai, Yuldav ddai mil bhiq-a nail ngaol. A bhai nee ngal aivq yaq maq jaol lee dai, naq lai-a nail ngaol.