Iqmoeq 13
Aqbhaqlaq khi mail Laoltavq pav ail-a nail ganl
1 Aqbhaqlaq aqyu nvq maol yaq neq, aqyu phaqyaq-i mail khal jiav nail yalkav juq bhai oil khi, Iljiltuv milkhaoq nee mail, Nilgeiq miltsaq phao dov lal-a nail ngaol. Laoltavq gail aqyu nvq gaq nee mail tsao thel lavq-a nail ngaol.
2 Aqbhaqlaq neq, yaol, niaoqnel, civqmeiv, phul dai khi heel, niil juq jiav nail ngel-i mail, hulmeeq hulbhao ngaol.
3 Haoqnao teevq pov, Nilgeiq miltsaq nee mail gaoq dov lal khi, Bheiqtaqlav nail meenq jiav nail phao lal-a nail ngaol. Aivq-i mail haqphal saiqgov cov khi jaol daiq-a nail Bheiqtaqlav meenq dai khi, Aq-il nail meenq gaoltsi bhai kev lal-a nail ngaol.
4 Jaolduq al duq neq, gaq-u phao, Aqbhaqlaq laolduq teevq pov cov khi Heeqphaq Miqyail nail aqmil bhai khul-a nail khe-ai, niil aq-il iqsanl, teevq pov khul-a nail aqduq pevq nail ngaol.
5 Aqbhaqlaq nee mail teevq gaq khe-ai tsao thel lavq-a nail Laoltavq gail, yaol, civqmeiv, niaoqnel dai khi haqphal saiqgov mao dai jiav nail ngaol.
6 Aqyu nvq gaq bhai jaiqyaq mao dai jaol khi, jaiqyaq bhi gav jaq nail aqduq maq lovq lai nail ngel-i mail, teevq gaq khe-ai jaol nail maq pevq lai nia ail, pevq lal-a nail ngaol.
7 Al heel ngel-i mail, Aqbhaqlaq nail jaiqyaq bhai lovq nail juq dai khi mail, Laoltavq nail jaiqyaq bhai lovq nail juq nail gaiqlaq bhai khaq pheel jaq deeq pheel jaq lal-a nail ngaol. (Aqyanq al yanq bhai neq, Khaqnanq nail tsaol-aq dai khi, Pheiqliqsil nail tsaol-aq juq gail, a bhai jaol nail ngaol.)
8 Aq-u phao, Aqbhaqlaq neq, Laoltavq bhai ge bhiq-a nail: "Ngadao nvq gaq neq, aqivq jaqbheq tavq nail ngel-i mail, naol dai khi ngaq nail gaiqlaq bhai maqkhaiq, naoq nail yaqkav juq dai khi, ngaq nail yaqkav juq nail gaiqlaq bhai maqkhaiq, khaq pheel jil pheel jaq heeq phaq-ail maq tsaq ail.
9 Al heel ngel-i mail, naol dai khi ngal, pav ail bhel. Naoq nail sivtavq bhai miltsaq teevq heeq heeq lao jiav nail ngaol. Naol khal tsel movq nail miltsaq bhai tsel nail ya nail ngaol. Naol lavqmal phao tsel haq neq, ngal lavqtsel phao oil naol. Naol lavqtsel phao tsel haq neq, ngal lavqmal phao oil nail ngaol" dai, ge bhiq-a nail ngaol.
10 Aq-u phao, Laoltavq ji li jaoq laoq tsiq phaol khi mail hel daiq-u phao, Yaoldaq laoljaol daolbhaq lao tsao-ail Saol-aq meenq phao ail nail bhai, ulcuvq jiav khi Heeqphaq Miqyail nail gaoqkhail khe-ai maqkhaiq, Iljiltuv milkhaoq khe-ai maqkhaiq, meeq nail bhai, ya moel-a nail ngaol. (Niil neq, Heeqphaq Miqyail-i mail Saoldoq meenq dai khi Gaolmaollav meenq bhai maq lav cov nail iqmoeq bhai pevq nail ngaol.)
11 Al heel ngel-i mail, Laoltavq neq, Yaoldaq laoljaol daolbhaq teevq lao tsaoq bhai tsel khi, nlma dov khoeq phao, jaol phal lee-a nail ngaol. Al hai khi mail, aqyu nvq gaq pav ail-a nail ngaol.
12 Aqbhaqlaq neq, Khaqnanq miltsaq bhai jaol-a nail ngaol. Laoltavq neq, Yaoldaq laoljaol gaoq daiq bhai jiav nail meenq juq nail gaiqlaq bhai jaol khi, Saoldoq meenq nee mail aqjail bhai haqphal saiqgov cov-a nail ngaol.
13 Saoldoq meenq khe jaol nail tsaol-aq juq neq, haqeiv nail juq pevq khi Heeqphaq Miqyail nail sivtavq bhai oeqbal mao dai nl nail juq pevq nail ngaol.
14 Laoltavq khi mail Aqbhaqlaq pav-ail gaq khi pultavq, Heeqphaq Miqyail neq, Aqbhaqlaq bhai ge bhiq-a nail: "Naol jaol nail nee lavqtsel, lavqmal, sivtavq dai khi haoqnaol phao hel daiq daiq.
15 Naoq-i mail khal moel lal nail miltsaq juq iqsanl mail, naol dai khi, naol-ai nee yavq kha lee thaq nail yaq juq bhai ngal nqmaq maqluv halyeel bivq nail ngaol.
16 Naoq-ai nee mail yavq kha lee thaq nail yaq juq gail, maq ge daiq gil tsaol dai, ngal bhi mao lal nail ngaol. Miltsaq kovtavq khe jiav nail khaqlail bhai ge daiq gil kivq haq neq, naoq-ai nee mail yavq kha lee thaq nail yaq juq bhai iqsanl ge daiq gil kivq nail ngaol.
17 Naol niil aq-il thul khi, miltsaq kha dai eeq kha dai heel nail dai, tsao daiq ail nail nee ovqtavq, taiv daiq ail yaoq. Khul khi mail dai ngal-aq, naoq-i mail khal moel-a nail miltsaq, ngal naoq bhai bivq nail ngaol" dai, ge bhiq-a nail ngaol.
18 Al heel ngel-i mail, Aqbhaqlaq neq, aivq-i mail jaol nail jaolduq nee mail, Heiqbhonq meenq khe jiav nail Manqleiq dai khul nail jaolduq aqbhaol bhaol ma doevq nail bha haqphal saiqgov cov khi, jaol lal-a nail ngaol. Aivq a bhai, Heeqphaq Miqyail bhai laol bhiq nail laolduq cov-a nail ngaol.