رِسَالِةْ بُولُسْ لْرُومَة 15

أَعْمْلُوا الشَّيْء الِّي يْرَضِّي اللهْ

‏1 أَحْنَا القْوِيِّينْ فِي الإِيمَانْ يِلْزِمْنَا نْعَاوْنُوا الضْعَافْ بَاشْ يْهِزُّوا الحْمِلْ مْتَاعْهُمْ، مَا يِلْزِمْنَاشْ نلَوّْجُوا عْلَى الشَّيْء الِّي يْرَضِّينَا، ‏2 وْخَلِّي كُلْ وَاحِدْ فِينَا يْرَضِّي خُوهْ لْمَصْلِحْتُو بَاشْ يِبْنِيهْ. ‏3 رَاهُو المَسِيحْ مَا لَوِّجْشْ عْلَى الشَّيْء الِّي يْرَضِّيهْ هُوَ، آمَا كِيفْ مَا هُو مَكْتُوبْ فِي الكْتَابْ المُقَدَّسْ: «السَّبَّانْ الِّي يْسِبُّوا فِيكْ بِيهْ خْلَطْلِي آنَا.» ‏4 وْأَيْ حَاجَة تْكِتْبِتْ قْبَلْ فِي الكْتُبْ المُقَدّْسَة رَاهِي تْكِتْبِتْ بَاشْ تْعَلِّمْنَا كِيفَاشْ يْوَلِّي عِنْدْنَا أَمَلْ بِالصَّبْرْ وِالتَّشْجِيعْ الِّي فِي الكْتُبْ المُقَدّْسَة. ‏5 إِنْ شَاءْ اللهْ الإِلاَهْ مْتَاعْ الصَّبْرْ وِالتَّشْجِيعْ يَعْطِيكُمْ إِنّْكُمْ تْكُونُوا عِنْدْكُمْ رَايْ وَاحِدْ كِيفْ مَا عَلِّمْنَا المَسِيحْ يَسُوعْ، ‏6 بَاشْ الكُلْكُمْ مْعَ بْعَضْكُمْ تْمَجّْدُوا إِلاَهْ وْبُو رَبّْنَا يَسُوعْ المَسِيحْ بْقَلْبْ وَاحِدْ وبْصُوتْ وَاحِدْ.

التَّبْشِيرْ بِينْ الشْعُوبْ الأُخْرِينْ

‏7 إِمَّالاَ اقْبْلُوا بْعَضْكُمْ كِيفْ مَا المَسِيحْ قْبِلْكُمْ بَاشْ تْمَجّْدُوا اللهْ. ‏8 رَانِي نْقُلْكُمْ الِّي المَسِيحْ وَلَّى خَادِمْ لِليْهُودْ بَاشْ يْوَرِّي الِّي اللهْ صَادِقْ بَاشْ يْثَبِّتْ الوُعُودْ الِّي عْطَاهُمْ اللهْ لِلجْدُودْ. ‏9 وْبَاشْ الشْعُوبْ الأُخْرِينْ يْمَجّْدُوا اللهْ عْلَى رَحْمْتُو كِيفْ مَا تِكْتِبْ فِي الكْتُبْ المُقَدّْسَة:

هَاذَاكَا عْلاَشْ فِي وُسْطْ الشْعُوبْ الأُخْرِينْ بَاشْ نِحْمْدِكْ،

وْبِالغْنَاء نْسَبِّحْ لإِسْمِكْ

‏10 وِيْقُولْ الكْتَابْ زَادَا:

أَفْرْحُوا يَا الشْعُوبْ الأُخْرِينْ مْعَ شَعْبْ اللهْ!

‏11 وِيْقُولْ مَرَّة أُخْرَى:

سَبّْحُوا الرَّبْ يَا الأُمَمْ الكُلْكُمْ.

احْمْدُوهْ يَا الشْعُوبْ الكُلْكُمْ.

‏12 وْقَالْ إِشَعْيَاءْ زَادَا:

وِلْدْ يَسَّى بَاشْ يْجِي

يْقُومْ وْيُحْكُمْ فِي الشْعُوبْ الأُخْرِينْ

وِيْكُونْ عِنْدْهُمْ أَمَلْ فِيهْ.

‏13 إِنْ شَاءْ اللهْ إِلاَهْ الأَمَلْ يِمْلاَكُمْ بِالفَرْحَة وِالسَّلاَمْ بْإِيمَانْكُمْ بِيهْ بَاشْ الأَمَلْ مْتَاعْكُمْ يْفِيضْ بْقُوِّةْ الرُّوحْ القُدُسْ!

خِدْمِةْ بُولُسْ

‏14 آنَا بِيدِي يَا خْوَاتِي عِنْدِي ثِيقَة فِيكُمْ الِّي إِنْتُومَا مِمْلِينْ بِالصْلاَحْ، وْمِمْلِينْ بِالمَعْرْفَة، وْقَادْرِينْ بَاشْ تْعَلّْمُوا بْعَضْكُمْ. ‏15 آمَا رَاهُو ثَمَّة حَاجَاتْ كْتِبْتِلْكُمْ عْلِيهُمْ بْصَرَاحَة بَاشْ نْذَكِّرْكُمْ بِيهُمْ، بْفَضْلْ النِّعْمَة الِّي عْطَاهَالِي اللهْ ‏16 بَاشْ نْكُونْ خَادِمْ مْتَاعْ المَسِيحْ يَسُوعْ مَا بِينْ الشْعُوبْ الأُخْرِينْ. نِخْدِمْ كِيفْ كَاهِنْ فِي الإِنْجِيلْ الِّي مِنْ عِنْدْ اللهْ، بَاشْ الشْعُوبْ الأُخْرِينْ يْكُونُوا قُرْبَانْ مَقْبُولْ عِنْدْ اللهْ مُقَدَّسْ بِالرُّوحْ القُدُسْ. ‏17 إِمَّالاَ، عِنْدِي الحَقْ، بَاشْ نِتْفُوخِرْ فِي المَسِيحْ يَسُوعْ بِالخِدْمَة مْتَاعْ اللهْ، ‏18 رَانِي مَا عِنْدِيشْ الجُرْأَة بَاشْ نِتْكَلِّمْ بْصَرَاحَة كَانْ عْلَى الشَّيْء الِّي عَمْلُو المَسِيحْ عْلَى طْرِيقِي بَاشْ يْخَلِّي الشْعُوبْ الأُخْرِينْ يْطِيعُوا اللهْ، عْمَلْ الشَّيْء هَاذَا عْلَى طْرِيقْ كْلاَمِي وْأَفْعَالِي ‏19 بْقُوِّةْ المُعْجْزَاتْ وِالعْجَايِبْ وِبْقُوِّةْ الرُّوحْ القُدُسْ. كَمِّلْتْ التَّبْشِيرْ بِإِنْجِيلْ المَسِيحْ مِنْ أُورْشَلِيمْ وِالمَنَاطِقْ الِّي دَايْرِينْ بِيهَا حَتَّى لِلِّيرِيكُونْ ‏20 وْكَانْ الهَدَفْ مْتَاعِي هُوَ إِنِّي نْبَشِّرْ بِالإِنْجِيلْ مُوشْ فِي البْلاَيِصْ الِّي تِعْرَفْ فِيهُمْ المَسِيحْ، بَاشْ مَا نِبْنِيشْ عْلَى سَاسْ عَمْلُو غِيرِي، ‏21 آمَا كِيفْ مَا تِكْتِبْ فِي الكْتَابْ المُقَدَّسْ:

الِّي مَا تْبَشّْرُوشْ بِيهْ بَاشْ يْشُوفُوهْ،

وِلِّي عْمُرْهُمْ مَا سَمْعُوا بِيهْ بَاشْ يِفْهْمُوا.

بُولُسْ يْحِبْ يْزُورْ رُومَا

‏22 وْهَاذَاكَا عْلاَشْ تْعَطِّلْتْ بَرْشَة مَرَّاتْ بَاشْ نْجِيكُمْ ‏23 آمَا تَوَّا مَا دَامْنِي كَمِّلْتْ خِدْمْتِي فِي المَنَاطِقْ هَاذُومَا، وْمَادَامْنِي عِنْدِي سْنِينْ نْحِبْ نْجِيكُمْ، ‏24 نِتْمَنَّى بَاشْ نْشُوفْكُمْ وْآنَا فِي طْرِيقِي لْإِسْبَانْيَا وِتْعَاوْنُونِي بَاشْ نِمْشِي لْغَادِي، بَعْدْ مَا نْعَدِّي مْعَاكُمْ حَتَّى شْوَيَّة وَقْتْ بَاهِي. ‏25 آمَا تَوَّا رَانِي مَاشِي لْأُورْشَلِيمْ بَاشْ نِخْدِمْ الإِخْوَة المُؤْمْنِينْ، ‏26 رَاهُمْ الكَنَايِسْ مْتَاعْ مَقْدُونِيَّة وْأَخَائِيَة حَبُّوا بَاشْ يْعَاوْنُوا الفُقَرَاءْ مَا بِينْ المُؤْمْنِينْ الِّي فِي أُورْشَلِيمْ. ‏27 هُومَا يْحِبُّوا يَعْمْلُوا الشَّيْء هَاذَا وْبِالرَّسْمِي هُومَا مَدْيُونِينْ لِيهُمْ، عْلَى خَاطِرْ إِذَا كَانْ الشْعُوبْ الأُخْرِينْ جَاوْ بَاشْ يْشَارْكُوا فِي البَرَكَاتْ الرُّوحِيَّة مْتَاعْهُمْ رَاهُمْ يِلْزِمْهُمْ زَادَا يِخْدْمُوهُمْ بِالمَادِّيَّاتْ. ‏28 هَاذَاكَا عْلاَشْ بَعْدْ مَا نْكَمِّلْ الشَّيْء هَاذَا وْنَعْطِيهُمْ الشَّيْء الِّي تْلَمْ، نِتْعَدَّالْكُمْ وْآنَا فِي طْرِيقِي لْإِسْبَانْيَا. ‏29 وْنَعْرِفْ الِّي آنَا بَاشْ نْجِيكُمْ بِالبَرْكَة مْتَاعْ المَسِيحْ كَامْلَة.

‏30 نُطْلُبْ مِنْكُمْ، يَا الإِخْوَة، بْإِسْمْ رَبّْنَا يَسُوعْ المَسِيحْ وْبِالمْحَبَّة مْتَاعْ الرُّوحْ القُدُسْ، إِنّْكُمْ تْجَاهْدُوا مْعَايَا بِصْلاَتْكُمْ للهْ، عْلَى خَاطْرِي، ‏31 بَاشْ يْمَنَّعْنِي مِلِّي مَا هُمْشْ مُؤْمْنِينْ فِي مَنْطِقْةْ اليَهُودِيَّة وِيْخَلِّي خِدْمْتِي فِي أُورْشَلِيمْ مَقْبُولَة عِنْدْ الإِخْوَة المُؤْمْنِينْ، ‏32 وْهَكَّا نْجِيكُمْ وْآنَا مَلْيَانْ بِالفَرْحَة، إِذَا كَانْ رَبِّي حَبْ، وْنَرْتَاحْ عِنْدْكُمْ. ‏33 وْإِلاَهْ السَّلاَمْ يْكُونْ مْعَاكُمْ الكُلْكُمْ. آمِينْ.