رِسَالِةْ بُولُسْ لْرُومَة 14

مَا تُحْكْمُوشْ عْلَى بْعَضْكُمْ

‏1 إِقْبْلُوا الِّي هُوَ إِيمَانُو ضْعِيفْ مَا بِينَاتْكُمْ وْمَا تْلُومُوهِشْ عْلَى رَايُو. ‏2 ثَمَّة نَاسْ يِمّْنُوا الِّي هُومَا يْنَجّْمُوا يَاكْلُوا مِنْ كُلْ شَيْء، وْثَمَّة شْكُونْ مِنْهُمْ الِّي إِيمَانُو ضْعِيفْ مَا يَاكُلْ كَانْ الخُضْرَة. ‏3 الِّي يَاكْلُوا مِنْ كُلْ شَيْء مَا يِلْزِمْهُمْشْ يَحْقْرُوا الِّي مَا يَاكْلُوشْ، وِلِّي مَا يَاكْلُوشْ يِلْزِمْهُمْ مَا يُحْكْمُوشْ عَلِّي يَاكْلُوا مِنْ كُلْ شَيْء، رَاهُو اللهْ قْبِلْهُمْ. ‏4 شْكُونِكْ إِنْتِ بَاشْ تُحْكُمْ عْلَى الخَادِمْ مْتَاعْ غِيرِكْ؟ هُوَ يَاقِفْ وِلاَّ يْطِيحْ مِنْ عِينْ سِيدُو. رَاهُو سِيدُو هُوَ الِّي يْقَرِرْ إِذَا كَانْ يَاقِفْ وِلاَّ يْطِيحْ. وْرَاهُو بَاشْ يَاقِفْ عْلَى خَاطِرْ الرَّبْ قَادِرْ بَاشْ يْخَلِّيهْ يَاقِفْ.

‏5 ثَمَّة نَاسْ يِعْتَبْرُوا فِي نْهَارْ خِيرْ مِالنْهَارَاتْ الأُخْرِينْ، وْثَمَّة نَاسْ أُخْرِينْ يْشُوفُوا النْهَارَاتْ الكُلْهُمْ كِيفْ كِيفْ. وْخَلِّي كُلْ وَاحِدْ يِثْبِتْ عْلَى رَايُو. ‏6 الِّي يَعْمِلْ قِيمَة لِنْهَارْ رَاهُو يَعْمِلُّو قِيمَة بَاشْ يِكْرِمْ الرَّبْ. الِّي يَاكُلْ كُلْ شَيْء زَادَا يَاكُلْ بَاشْ يِكْرِمْ الرَّبْ مَا دَامُو يُشْكُرْ فِي اللهْ، وِلِّي مَا يَاكُلْشْ رَاهُو يِكْرِمْ الرَّبْ وْيُشْكُرْ اللهْ. ‏7 حَتَّى وَاحِدْ فِينَا مَا هُو عَايِشْ لْرُوحُو، وْحَتَّى وَاحِدْ فِينَا مَا يْمُوتْ عْلَى خَاطِرْ رُوحُو. ‏8 إِذَا كَانْ نْعِيشُوا رَانَا نْعِيشُوا عْلَى خَاطِرْ الرَّبْ، وْإِذَا كَانْ مُتْنَا رَانَا نْمُوتُوا عْلَى خَاطِرْ الرَّبْ. إِمَّالاَ إِذَا كَانْ نَحْيَاوْ وِلاَّ إِذَا كَانْ نْمُوتُوا، رَانَا لِلرَّبْ. ‏9 رَاهُو عْلَى خَاطِرْ الشَّيْء هَاذَا المَسِيحْ مَاتْ وِحْيَى مِنْ جْدِيدْ بَاشْ يْكُونْ الرَّبْ مْتَاعْ المُوتَى وِالحَيِّينْ. ‏10 عْلاَشْ تُحْكُمْ عْلَى خُوكْ؟ وِلاَّ عْلاَشْ تَحْقِرْ فِي خُوكْ؟ رَانَا الكُلْنَا بَاشْ نَاقْفُوا فِي المَحْكْمَة مْتَاعْ اللهْ، ‏11 رَاهُو مَكْتُوبْ فِي الكْتَابْ المُقَدَّسْ:

يْقُولْ الرَّبْ، نِحْلِفْ بِحْيَاتِي

كُلْ رُكْبَة بَاشْ تِثّْنَى قُدَّامِي

وْكُلْ لْسَانْ بَاشْ يْسَبَّحْلِي.

‏12 إِمَّالاَ، كُلْ وَاحِدْ فِينَا لاَزْمُو يَعْطِي حْسَابْ عْلَى رُوحُو قُدَّامْ اللهْ.

مَا تْخَلِّيشْ خُوكْ يْطِيحْ

‏13 إِمَّالاَ خَلِّينَا مَا عَادِشْ بِالكُلْ نُحْكْمُوا عْلَى بْعَضْنَا، آمَا بِالعَكْسْ خَلِّينَا نْقَرِرُوا بَاشْ مَا نْحُطُّوشْ قُدَّامْ وَاحِدْ مِنْ خْوَاتْنَا حَاجَة تْعَثّْرُوا وِلاَّ اطَّيّْحُو، ‏14 وْآنَا نَعْرِفْ وْمِتْأَكِّدْ إِنُّو فِي الرَّبْ يَسُوعْ مَا ثَمَّاشْ حَتَّى حَاجَة مَنْزُوسَة بِطْبِيعِتْهَا، آمَا رَاهِي مَنْزُوسَة عِنْدْ الِّي يْرَى الِّي هِيَ مَنْزُوسَة. ‏15 إِذَا كَانْ خُوكْ يِتْجْرَحْ بِسْبَبْ الشَّيْء الِّي إِنْتِ تَاكْلُو، رَاكْ مَاكِشْ تِتْصَرِّفْ بِمْحَبَّة. مَا تْخَلِّيشْ الشَّيْء الِّي تَاكْلُو يْدَمِّرْ الإِنْسَانْ الِّي مَاتْ المَسِيحْ عْلَى خَاطْرُو، ‏16 مَا تْخَلِّيشْ الشَّيْء البَاهِي الِّي تَعْمِلْ فِيهْ يِتْقَالْ عْلِيهْ كْلاَمْ خَايِبْ. ‏17 رَاهِي مَمْلِكْةْ اللهْ مَا هِيشْ مَاكْلَة وِشْرَابْ، آمَا هِيَ بِرْ وْسَلاَمْ وْفَرَحْ فِي الرُّوحْ القُدُسْ. ‏18 أَيْ وَاحِدْ يِخْدِمْ المَسِيحْ بِالطَّرِيقَة هَاذِي رَاهُو اللهْ يَرْضَى عْلِيهْ وِالنَّاسْ يِقْبْلُوهْ.

‏19 إِمَّالاَ خَلِّينَا نْتَبّْعُوا الحَاجَاتْ الِّي تْجِيبِلْنَا السَّلاَمْ وْنِبْنِيوْ بِيهَا بْعَضْنَا. ‏20 مَا ادَّمِّرْشْ الشَّيْء الِّي عَمْلُو اللهْ عْلَى جَالْ المَاكْلَة. كُلْ شَيْء طَاهِرْ، آمَا رَاهُو خَايِبْ إِنُّو أَيْ وَاحِدْ يْخَلِّي الأُخْرِينْ يْطِيحُوا بِسْبَبْ الشَّيْء الِّي يَاكُلْ فِيهْ، ‏21 وْرَاهُو بَاهِي انِّكْ مَا تَاكُلْشْ اللْحَمْ وِلاَّ تُشْرُبْ الشْرَابْ وِلاَّ تَعْمِلْ أَيْ حَاجَة تْخَلِّي خُوكْ يِتْعَثِّرْ، ‏22 خَلِّي الشَّيْء الِّي تِمِّنْ بِيهْ بِينِكْ وْبِينْ اللهْ. صَحَّة لِيهْ الِّي مَا يُحْكُمْشْ عْلَى رُوحُو وَقْتِلِّي يَعْمِلْ حَاجَة يْرَى الِّي هِيَ بَاهْيَة. ‏23 آمَا إِذَا كَانُو شَاكْ فِي الشَّيْء الِّي يَاكُلْ فِيهْ، رَاهُو اللهْ يُحْكُمْ عْلِيهْ كِيَاكْلُو عْلَى خَاطْرُو يَعْمِلْ فِي الشَّيْء هَاذَاكَا وْهُوَ مَا عِنْدُوشْ إِيمَانْ. وْكُلْ حَاجَة مَا تِتْعْمَلْشْ بِالإِيمَانْ رَاهِي ذَنْبْ.