إِنْجِيلْ لُوقَا 23

يَسُوعْ يْسَلّْمُوهْ لْبِلاَطُسْ

(مَتَّى 27‏:11‏-14؛ مَرْقُسْ 15‏:1‏-5؛ يُوحَنَّا 18‏:28‏-38)

‏1 وْقَامُوا الكُلْهُمْ وْهَزُّوا يَسُوعْ لْبِيلاَطُسْ. ‏2 وِبْدَاوْا يِتْهْمُوا فِيهْ وِيْقُولُوا: «هَاذَا لْقِينَاهْ يْغَلِّطْ فِي شَعْبْنَا، وِيْقُولْ الِّي مَا يِلْزِمْنَاشْ نَدْفْعُوا الضَّرَايِبْ لِلقَيْصَرْ وِيْقُولْ الِّي هُوَ المَسِيحْ المَلِكْ.» ‏3 يَاخِي سِأْلُو بِيلاَطُسْ: «إِنْتِ مَلِكْ اليْهُودْ؟» جَاوْبُو يَسُوعْ: «إِنْتِ قُلْتْ!» ‏4 يَاخِي قَالْ بِيلاَطُسْ لْرُؤَسَاءْ الكُهَّانْ وِالنَّاسْ: «مَا لْقِيتْ حَتَّى تُهْمَة فِي الرَّاجِلْ هَاذَا.» ‏5 آمَا هُومَا شَدُّوا صْحِيحْ وْقَالُوا: «رَاهُو يْهَيِّجْ فِي الشَّعْبْ بِالتَّعْلِيمْ مْتَاعُو فِي مَنْطِقْةْ اليَهُودِيَّة الكُلْ مِالجَلِيلْ حَتَّى لِهْنَا.»

يَسُوعْ قُدَّامْ هِيرُودُسْ

‏6 وْكِسْمَعْ بِيلاَطُسْ كِلْمِةْ الجَلِيلْ سْإِلْ: «يَاخِي الرَّاجِلْ هَاذَا مِالجَلِيلْ؟» ‏7 وْكِعْرَفْ الِّي يَسُوعْ تَابِعْ لْوِلاَيِةْ هِيرُودُسْ، بْعَثْهُولُو، وْهِيرُودُسْ بِيدُو كَانْ فِي أُورْشَلِيمْ فِي النْهَارَاتْ هَاذُوكُمْ. ‏8 وْهِيرُودُسْ كَانْ يِتْمَنَّى مِنْ مُدِّةْ طْوِيلَة بَاشْ يْشُوفْ يَسُوعْ، هَاذَاكَا عْلاَشْ فْرَحْ بَرْشَة وَقْتِلِّي شَافُو عْلَى خَاطْرُو سْمَعْ عْلِيهْ بَرْشَة حَاجَاتْ وِيْحِبْ يْشُوفُوا يَعْمِلْ فِي مُعْجْزَة. ‏9 وْسِأْلُو عْلَى بَرْشَة حَاجَاتْ آمَا يَسُوعْ مَا جَاوْبُوشْ. ‏10 وْوُقْفُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ وِبْدَاوْا يِتْهْمُوا فِيهْ بْقُوَّة. ‏11 وْهِيرُودُسْ وِالجُنُودْ مْتَاعُو تْمَسْخْرُوا عْلَى يَسُوعْ وْهَانُوهْ وْلَبّْسُو هِيرُودُسْ جِبَّة مُضْخْمَة وْرَجّْعُو لْبِيلاَطُسْ. ‏12 وْفِي النْهَارْ هَاذَاكَا هِيرُودُسْ وْبِيلاَطُسْ وَلاَّوْ صْحَابْ بَعْدْ مَا كَانُوا قْبَلْ مِتْعَارْكِينْ.

الحُكْمْ عْلَى يَسُوعْ بِالمُوتْ

(مَتَّى 27‏:15‏-26؛ مَرْقُسْ 15‏:6‏-15؛ يُوحَنَّا 18‏:39‏-19‏:16)

‏13 عَيِّطْ بِيلاَطُسْ عْلَى رُؤَسَاءْ الكُهَّانْ وِالأَعْيَانْ وِالنَّاسْ. ‏14 وْقَالِلْهُمْ: «جِبْتُولِي الرَّاجِلْ هَاذَا عْلَى إِنُّو يْغَلِّطْ فِي النَّاسْ، وْهَاوْ آنَا بَعْدْ مَا ثَبِّتّْ فِي كُلْ شَيْء قُدَّامْكُمْ، مَا لْقِيتِشْ فِيهْ حَتَّى تُهْمَة مِالتُّهَمْ الِّي تْهِمْتُوهْ بِيهُمْ. ‏15 وْهِيرُودُسْ زَادَا مَا لْقَاشْ عْلِيهْ حَتَّى تُهْمَة، وْرَجّْعُو لِينَا، إِمَّالاَ هُوَ مَا عْمَلْشْ حَتَّى شَيْء يِسْتَاهِلْ عْلِيهْ المُوتْ. ‏16 وْآنَا بَاشْ نَضْرْبُوا بِالسُّوطْ وِنْسيّْبُو.» ‏17  ‏18 آمَا هُومَا الكُلْهُمْ صَاحُوا: «أُقْتُلْ هَاذَا! وْسَيّْبِلْنَا بَارَابَاسْ!» ‏19 وْبَارَابَاسْ كَانْ فِي الحَبْسْ بِسْبَبْ خُوضَة تْعَمْلِتْ فِي المْدِينَة وْزَادَا بِسْبَبْ جْريمِةْ قْتَلْ. ‏20 يَاخِي كَلِّمْهُمْ بِيلاَطُسْ مَرَّة أُخْرَى وْهُوَ حَابِبْ يْسَيِّبْ يَسُوعْ. ‏21 يَاخِي جَاوْبُوهْ وْهُومَا يْصِيحُوا: «اُصْلْبُو! اُصْلْبُو!» ‏22 وْعَاوِدْ سْإِلْهُمْ مَرَّة ثَالْثَة: «شْنُوَّة الشَّرْ الِّي عَمْلُو؟ مَا لْقِيتْ عْلِيهْ حَتَّى تُهْمَة يِسْتَاهِلْ عْلِيهَا المُوتْ.» ‏23 يَاخِي شَدُّوا صْحِيحْ وْطُلْبُوا مِنُّو بَاشْ يُصْلْبُو وْهُومَا يْصِيحُوا بْصُوتْ عَالِي وْغَلْبُوهْ بِصْيَاحْهُمْ. ‏24 وِحْكُمْ بِيلاَطُسْ بَاشْ الشَّيْء الِّي يْحِبُّوا عْلِيهْ يِتْعْمَلْ. ‏25 وْسَيِّبْ بَارَابَاسْ الِّي كَانْ فِي الحَبْسْ بِسْبَبْ الخُوضَة وِالقَتْلْ: هَاذَاكَا الِّي طَلْبُوا بَاشْ يِتْسَيِّبْ. وْسَلِّمْ يَسُوعْ بَاشْ يِتْحْكَمْ عْلِيهْ كِيفْ مَا حَبُّوا.

يَسُوعْ مْعَلِّقْ عْلَى الصَّلِيبْ

(مَتَّى 27‏:32‏-44؛ مَرْقُسْ 15‏:21‏-32؛ يُوحَنَّا 19‏:17‏-27)

‏26 وَقْتِلِّي هُومَا هَازِّينُو بَاشْ يُصْلْبُوهْ شَدُّوا وَاحِدْ مِنْ مَنْطِقْةْ قِيرِينَة إِسْمُو سِمْعَانْ كَانْ جَايْ مِالرِّيفْ، حَطُّوا عْلِيهْ الصَّلِيبْ بَاشْ يْهِزُّو وْيِمْشِي وْرَاء يَسُوعْ. ‏27 وْكَانُوا يْتَبّْعُوا فِيهْ بَرْشَة نَاسْ وْفِيهُمْ نْسَاء يِبْكِيوْ وْيِنْدْبُوا ‏28 يَاخِي تْلَفّْتِلْهُمْ يَسُوعْ وْقَالِلْهُمْ: «يَا بْنَاتْ أُورْشَلِيمْ مَا تِبْكِيوْشْ عْلِيَّ آمَا ابْكِيوْ عْلَى رْوَاحْكُمْ وِعْلَى وْلاَدْكُمْ. ‏29 هَاوْ بَاشْ تْجِي أَيَّامَاتْ وَقْتِلِّي النَّاسْ يْقُولُوا: "صَحَّة لِلِّي مَا ضْنَاوْشْ وِلِلكْرُوشْ الِّي مَا وِلْدِتْشْ وِالسْدُورْ الِّي مَا رَضّْعِتْشْ."

‏30 وْوَقْتْهَا بَاشْ يْقُولُوا لِلجْبَالْ:

طِيحْ عْلِينَا

وْلِلبْلاَيِصْ العَالْيَة

ارْدِمْنَا.»

‏31 «وْإِذَا كَانُوا العُودْ الأَخْضَرْ يَعْمْلُوا فِيهْ هَكَّا، إِمَّالاَ العُودْ اليَابِسْ آشْ بَاشْ يَجْرَالُو؟» ‏32 وْهَزُّوا زَادَا زُوزْ مُجْرْمِينْ مْعَ يَسُوعْ بَاشْ يُقْتْلُوهُمْ. ‏33 وْكِوُصْلُوا لِلبُقْعَة الِّي تِتْسَمَّى الجُمْجْمَة، صَلْبُوهْ الغَادِي مْعَ زُوزْ مْجَرّْمَة وَاحِدْ عْلَى يْمِينُو وْوَاحِدْ عْلَى يْسَارُو. ‏34 وْقَالْ يَسُوعْ: «يَا بَابَا إِغْفْرِلْهُمْ رَاهُمْ مَا يَعْرْفُوشْ فَاشْ قَاعْدِينْ يَعْمْلُوا.» وْعَمْلُوا الجُنُودْ قُرْعَة عْلَى لِبْسْتُو وْقَسْمُوهَا. ‏35 وِالنَّاسْ وُقْفُوا الغَادِي يِتْفَرّْجُوا فِيهْ وِالشْيُوخْ مْتَاعْهُمْ يِتْمَسْخْرُوا عْلِيهْ وِيْقُولُوا: «خَلِّصْ الأُخْرِينْ، تْرَى خَلِّيهْ يْخَلِّصْ رُوحُو إِذَا كَانُو هُوَ المَسِيحْ الِّي خْتَارُو اللهْ.» ‏36 وْزَادُوا تْمَسْخْرُوا عْلِيهْ العَسْكِرْ وْكَانُوا يَطْلْعُولُو وْيَعْطِيوْ فِيهْ فِي الخَلْ. ‏37 وِيْقُولُوا: «إِذَا كُنْتْ إِنْتِ مَلِكْ اليْهُودْ خَلِّصْ رُوحِكْ.»

‏38 وْكَانِتْ ثَمَّة لُوحَة مْعَلّْقَة فُوقْ رَاسُو مَكْتُوبْ فِيهَا: «هَاذَا هُوَ مَلِكْ اليْهُودْ.»

‏39 وْوَاحِدْ مِالمُجْرْمِينْ الِّي تْصَلْبُوا مْعَاهْ بْدَا يَكْفِرْ بِيهْ وِيْقُولْ: «مُوشْ إِنْتِ المَسِيحْ؟ إِمَّالاَ خَلِّصْ رُوحِكْ وْخَلِّصْنَا.» ‏40 آمَا المُجْرِمْ الآخَرْ وَبّْخُو وْقَالُّو: «حَتَّى وْإِنْتِ مَحْكُومْ عْلِيكْ بِالمُوتْ كِيفُو بَاقِي مَاكِشْ خَايِفْ مِنْ رَبِّي. ‏41 أَحْنَا تِحْكَمْ عْلِينَا بِالعَدْلْ وِلْقِينَا فِعْلْنَا. آمَا الرَّاجِلْ هَاذَا مَا عْمَلْ حَتَّى حَاجَة غَالْطَة.» ‏42 مِنْ بَعْدْ قَالْ: «يَا يَسُوعْ اتْذَكِّرْنِي وَقْتْ تْجِي فِي مَمْلِكْتِكْ.» ‏43 يَاخِي قَالُّو يَسُوعْ: «نْقُلِّكْ الحَقْ اليُومْ تْكُونْ مْعَايَا فِي الجَنَّة.»

مُوتْ يَسُوعْ

(مَتَّى 27‏:45‏-46؛ مَرْقُسْ 15‏:33‏-41؛ يُوحَنَّا 19‏:28‏-30)

‏44 وْتَقْرِيبْ مْعَ نُصْفْ نْهَارْ ظْلاَمِتْ الدِّنْيَا الكُلْهَا حَتَّى لِلثْلاَثَة مْتَاعْ العْشِيَّة. ‏45 وِتْشَقْ حْجَابْ الهَيْكِلْ مِالوُسْطْ. ‏46 وْصَاحْ يَسُوعْ بْصُوتْ عَالِي بَرْشَة وْقَالْ: «يَا بَابَا نْسَلِّمْ رُوحِي بِينْ يْدِيكْ!» وْكِقَالْ الكْلاَمْ هَاذَا طَلْعِتْ رُوحُو. ‏47 وْكِشَافْ القَايِدْ مْتَاعْ المْيَاةْ عَسْكْرِي آشْ صَارْ مَجِّدْ اللهْ وْقَالْ: «بِالحَقْ الإِنْسَانْ هَاذَا كَانْ بَارْ.» ‏48 وِالنَّاسْ الِّي تْلَمُّوا بَاشْ يْشُوفُوهْ وْهُومَا يُصْلْبُوا فِيهْ، وَقْتِلِّي شَافُوا الِّي جْرَى رَوّْحُوا لِدْيَارْهُمْ وْهُومَا يَضْرْبُوا فِي سْدُورَاتْهُمْ. ‏49 وِلِّي يَعْرْفُوهْ الكُلْهُمْ بْمَا فِيهُمْ النْسَاء الِّي تَبّْعُوهْ مِالجَلِيلْ، كَانُوا وَاقْفِينْ يِتْفَرّْجُوا مِالبْعِيدْ عْلَى الشَّيْء الِّي صَارْ الكُلُّو.

دَفْنَانْ يَسُوعْ

(مَتَّى 27‏:57‏-61؛ مَرْقُسْ 15‏:42‏-47؛ يُوحَنَّا 19‏:38‏-42)

‏50 وْكَانْ ثَمَّة وَاحِدْ فِي المَجْلِسْ مْتَاعْ اليْهُودْ إِسْمُو يُوسُفْ وْكَانْ رَاجِلْ طَيِّبْ وْبَارْ. ‏51 وْمَا كَانِشْ مْوَافِقْ عْلَى القَرَارْ مْتَاعْ أَعْضَاءْ المَجْلِسْ وْعَمْلِتْهُمْ. وْيُوسُفْ هَاذَا أَصْلُو مِالرَّامَة الِّي هِيَ وَحْدَة مِنْ المُدُنْ مْتَاعْ اليْهُودْ وْكَانْ يِسْتَنَّى فِي مَمْلِكْةْ اللهْ ‏52 مْشَى لْبِيلاَطُسْ وِطْلَبْ مِنُّو جُثِّةْ يَسُوعْ. ‏53 مِنْ بَعْدْ هَبّْطُو مِنْ فُوقْ الصَّلِيبْ وْكَفّْنُو وْحَطُّو فِي قْبَرْ مَحْفُورْ فِي الحْجَرْ مَا تِدْفِنْ فِيهْ حَتَّى وَاحِدْ قْبَلْ. ‏54 وِالشَّيْء هَاذَا كَانْ فِي يُومْ التَّحْضِيرْ لِلسِّبْتْ الِّي قْرِيبْ يِبْدَى. ‏55 وِالنْسَاء الِّي جَاوْ مْعَ يَسُوعْ مِالجَلِيلْ تَبّْعُوا يُوسُفْ، وْشَافُوا القْبَرْ وِالجُثَّة كِيفَاشْ تْحَطِّتْ فِيهْ. ‏56 رَجْعُوا وْحَضّْرُوا العْقَاقِرْ وِالقْوَارِصْ. وِرْتَاحُوا نْهَارْ السِّبْتْ كِيفْ مَا وَصَّاتْ الشَّرِيعَة.