إِنْجِيلْ لُوقَا 22

المُؤَامْرَة وِالخِيَانَة مْتَاعْ يَهُوذَا

(مَتَّى 26‏:1‏-5‏،14‏-16؛ مَرْقُسْ 14‏:1‏-2‏،10‏-11؛ يُوحَنَّا 11‏:45‏-53)

‏1 وِقْرُبْ عِيدْ الفْطِيرْ الِّي يِتْسَمَّى عِيدْ الفِصْحْ. ‏2 وْرُؤَسَاءْ الكُهَّانْ وِالكُتَّابْ مْتَاعْ اليْهُودْ مَازَالُوا يِتْحَيّْلُوا بَاشْ يُقْتْلُوا يَسُوعْ، آمَا كَانُوا خَايْفِينْ مِالنَّاسْ. ‏3 وِدْخَلْ الشِّيطَانْ فِي يَهُوذَا الإِسْخَرْيُوطِي وْهُوَ وَاحِدْ مِالأَثْنَاشِنْ تِلْمِيذْ. ‏4 مْشَى لْرُؤَسَاءْ الكُهَّانْ وِالقَادَة مْتَاعْ حَرَسْ الهَيْكِلْ وِحْكَى مْعَاهُمْ كِيفَاشْ بَاشْ يْخُونْ يَسُوعْ. ‏5 فَرْحُوا وِتْفَاهْمُوا بَاشْ يَعْطِيوْهْ فْلُوسْ. ‏6 يَهُوذَا رْضَى وِقْعَدْ يِسْتَنَّى فِي الفُرْصَة بَاشْ يْخُونُو وَقْتِلِّي النَّاسْ مَا يْكُونُوشْ مُوجُودِينْ.

التَّحْضِيرْ لْعِيدْ الفِصْحْ مْعَ التْلاَمْذَة

(مَتَّى 26‏:17‏-25؛ مَرْقُسْ 14‏:12‏-21؛ يُوحَنَّا 13‏:21‏-30)

‏7 وْجَا نْهَارْ عِيدْ الفْطِيرْ الِّي كَانْ لاَزِمْ يِتْذْبَحْ فِيهْ عَلُّوشْ عِيدْ الفِصْحْ. ‏8 بْعَثْ يَسُوعْ بُطْرُسْ وْيُوحَنَّا وْقَالْ: «إِمْشِيوْ وْحَضّْرُولْنَا مَا نَاكْلُوا فِي عْشَاء الفِصْحْ.» ‏9 يَاخِي سِأْلُوهْ: «وِينْ تْحِبْ نْحَضّْرُوهْ؟» ‏10 قَالِلْهُمْ: «دُوبْ مَا تُدْخْلُوا لِلمْدِينَة يُعْرِضْكُمْ وَاحِدْ هَازْ قُلَّة مْتَاعْ مَاء، تَبّْعُوهْ لِلدَّارْ الِّي يُدْخْلِلْهَا. ‏11 وْقُولُوا لْمُولَى الدَّارْ هَاذِيكَا: "قَالِّكْ المُعَلِّمْ وِينْ بِيتْ الضْيُوفْ الِّي بَاشْ نَاكُلْ فِيهَا عْشَاء الفِصْحْ مْعَ تْلاَمِذْتِي." ‏12 وْهُوَ بَاشْ يْوَرِّيكُمْ بِيتْ كْبِيرَة فِي الطَّاقْ الفُوقَانِي فِيهَا دْبَشْ وْحَاضْرَة، فِي البِيتْ هَاذِيكَا حَضّْرُولْنَا عْشَاء عِيدْ الفِصْحْ.»

‏13 مْشَاوْ، وِلْقَاوْ كُلْ شَيْء كِيفْ مَا قَالِلْهُمْ، وْحَضّْرُوا عْشَاء الفِصْحْ.

عْشَاء الرَّبْ

(مَتَّى 26‏:26‏-30؛ مَرْقُسْ 14‏:22‏-26؛ كُورِنْثُوسْ الأُولَى 11‏:23‏-25)

‏14 وْكِجَا الوَقْتْ قْعَدْ يَسُوعْ بَاشْ يَاكُلْ هُوَ وِالرُّسُلْ. ‏15 وْقَالِلْهُمْ: «شْتْهِيتْ بَرْشَة بَاشْ نَاكُلْ مِنْ عِيدْ الفِصْحْ مْعَاكُمْ قْبَلْ مَا نِتْعَذِّبْ. ‏16 رَانِي نْقُولِلْكُمْ: مَا عَادِشْ بَاشْ نَاكُلْ مِنُّو مَرَّة أُخْرَى حَتَّى لِينْ يْتِمْ الشَّيْء المَقْصُودْ بِيهْ فِي مَمْلِكْةْ اللهْ.» ‏17 وْكِخْذَا الكَاسْ شْكَرْ وْقَالْ: «خُوذُوا هَاذَا وْإِقْسْمُوهْ مَا بِينَاتْكُمْ. ‏18 نْقُولِلْكُمْ: مِنْ تَوْ مَا عَادِشْ بَاشْ نُشْرُبْ مِنْ العَصِيرْ مْتَاعْ العْنِبْ حَتَّى لِينْ تْجِي مَمْلِكْةْ اللهْ.» ‏19 وْكِخْذَا خُبْزَة شْكَرْ اللهْ وِقْسِمْهَا وِعْطَاهُمْ وْقَالْ: «هَاذَا بَدْنِي الِّي يِتْعْطَى عْلَى خَاطِرْكُمْ. أَعْمْلُوا الشَّيْء هَاذَا بَاشْ تِتْذَكّْرُونِي.» ‏20 وِخْذَا كَاسْ بَعْدْ العْشَاء وْقَالْ: «الكَاسْ هَاذَا هُوَ العَهْدْ الجْدِيدْ بْدَمِّي الِّي سَالْ عْلَى خَاطِرْكُمْ. ‏21 وْرَاهِي اليِدْ الِّي بَاشْ تْسَلِّمْنِي مُوجُودَة مْعَايَا عْلَى المِيدَة. ‏22 رَانِي آنَا إِبْنْ الإِنْسَانْ لاَزِمْنِي نْمُوتْ كِيفْ مَا تْقَدِّرْلِي وْيَا وِيلُو الرَّاجِلْ الِّي بَاشْ يْخُونِّي! الرَّاجِلْ هَاذَاكَا خِيرْلُو لُوكَانْ مَا تُولِدْشْ.» ‏23 يَاخِي بْدَاوْا التْلاَمْذَة يِسْأْلُوا فِي بْعَضْهُمْ عْلَى شْكُونُو فِيهُمْ الِّي بَاشْ يَعْمِلْ العَمْلَة هَاذِي.

شْكُونْ هُوَ العْظِيمْ

‏24 وِبْدَاوْا يِتْنَاقْشُوا عْلَى شْكُونُو فِيهُمْ الِّي أَعْظِمْ مِالأُخْرِينْ. ‏25 يَاخِي قَالِلْهُمْ يَسُوعْ: «المُلُوكْ مْتَاعْ الشْعُوبْ يِتْحَكّْمُوا فِيهُمْ وِلِّي عِنْدْهُمْ سُلْطَة يْحِبُّوهُمْ يْقُولُوا عْلِيهُمْ الِّي هُومَا لاَهِينْ بِيهُمْ. ‏26 آمَا إِنْتُومَا مَا يِلْزِمْشْ الشَّيْء هَاذَا يْكُونْ مَا بِينَاتْكُمْ. بِالعَكْسْ خَلِّي الكْبِيرْ فِيكُمْ يْكُونْ كِيفْ الصْغِيرْ، وِلِّي يْقُودْ كِيفْ الِّي يِخْدِمْ. ‏27 شْكُونْ هُوَ الكْبِيرْ: الِّي قَاعِدْ عْلَى المِيدَة وِلاَّ الِّي يِخْدِمْ فِيهْ؟ يَاخِي مُوشْ الِّي قَاعِدْ عْلَى المِيدَة؟ آمَا آنَا فِي وُسْطْكُمْ كِيفْ الِّي يِخْدِمْ. ‏28 إِنْتُومَا الِّي ثْبِتُّوا مْعَايَا فِي وَقْتْ الشِّدَّة. ‏29 آنَا نَعْطِيكُمْ مَمْلْكَة كِيفْ مَا بَابَا عْطَانِي مَمْلْكَة. ‏30 بَاشْ تَاكْلُوا وْتُشْرْبُوا عْلَى طَاوِلْتِي فِي المَمْلْكَة مْتَاعِي وْتُقْعْدُوا عْلَى العَرْشْ وْتُحْكْمُوا عْلَى العْرُوشَاتْ الأَثْنَاشْ مْتَاعْ بَنِي إِسْرَائِيلْ.»

يَسُوعْ تْنَبَّأ الِّي بُطْرُسْ بَاشْ يُنْكْرُوا

(مَتَّى 26‏:31‏-35؛ مَرْقُسْ 14‏:27‏-31؛ يُوحَنَّا 13‏:36‏-38)

‏31 وْقَالْ الرَّبْ: «سِمْعَانْ! سِمْعَانْ! هَاوْ اللهْ سْمَحْ لِلشِّيطَانْ بَاشْ يْغَرْبِلْكُمْ كِيمَا يِتْغَرْبِلْ القَمْحْ. ‏32 آمَا آنَا صَلِّيتْ مِنْ أَجْلِكْ بَاشْ إِيمَانِكْ مَا يْضِيعِشْ، وْإِنْتِ وَقْتِلِّي تَرْجِعْ قَوِّي إِخْوْتِكْ.» ‏33 يَاخِي قَالُّو بُطْرُسْ: «يَا رَبْ آنَا مُسْتْعَدْ حَتَّى بَاشْ نِمْشِي مْعَاكْ لِلحَبْسْ وْلِلمُوتْ زَادَا.» ‏34 يَاخِي قَالْ يَسُوعْ: «آنَا نْقُلِّكْ يَا بُطْرُسْ، رَاهُو اليُومْ مَا يْصِيحْ السَّرْدُوكْ إِلاَّ بَعْدْ مَا تْكُونْ نْكَرْتْ ثْلاَثَة مَرَّاتْ الِّي إِنْتِ تَعْرِفْنِي.»

حَضّْرُوا رْوَاحْكُمْ لِلغَصْرَة الكْبِيرَة

‏35 وْمِنْ بَعْدْ قَالِلْهُمْ: «كِبْعَثْتْكُمْ من غِيرْ فْلُوسْ وْلاَ صُرَّة وْلاَ صَنْدَالْ، اسْتْحَقِّيتُوشْ لْحَاجَة؟» قَالُوا: «لاَ!» ‏36 يَاخِي قَالِلْهُمْ: «إِمَّالاَ تَوَّا الِّي عَنْدُو فْلُوسْ، يْهِزّْهُمْ وِلِّي عَنْدُو صُرَّة كِيفْ كِيفْ، وِلِّي مَاعَنْدُوشْ يْبِيعْ الكَبُّوطْ مْتَاعُو وْيِشْرِي سِيفْ. ‏37 رَانِي نْقُولِلْكُمْ الِّي لاَزِمْ يْتِمْ الِّي تِكْتِبْ عْلِيَّ فِي الكْتَابْ المُقَدَّسْ: "وْحِسْبُوهْ وَاحِدْ مِالمُجْرْمِينْ" رَاهِي الحَاجَاتْ الِّي تْكِتْبِتْ عْلِيَّ لاَزِمْهَا اتِّمْ.»

‏38 يَاخِي قَالُوا التْلاَمْذَة: «يَا رَبْ هَاوْ عِنْدْنَا زُوزْ سْيُوفَا» قَالِلْهُمْ يَسُوعْ: «يِكْفِي!»

يَسُوعْ يْصَلِّي فِي جْبَلْ الزِّيتُونْ

(مَتَّى 26‏:36‏-46؛ مَرْقُسْ 14‏:32‏-42)

‏39 مِنْ بَعْدْ قَامْ يَسُوعْ وِمْشَى كِعَادْتُو لِجْبَلْ الزِّيتُونْ وْتَبّْعُوهْ التْلاَمْذَة زَادَا. ‏40 وْكِوْصُلْ لِلبُقْعَة قَالِلْهُمْ: «صَلِّيوْ بَاشْ مَا تُحْصْلُوشْ فِي تَجْرْبَة.» ‏41 وِبْعِدْ عْلِيهُمْ شْوَيَّة، وِرْكَعْ وِبْدَا يْصَلِّي. ‏42 وْقَالْ: «يَا بَابَا كَانْ تْحِبْ بَعِّدْ عْلِيَّ كَاسْ المُرْ هَاذَا، آمَا خَلِّي يْكُونْ الشَّيْء الِّي تْحِبْ عْلِيهْ إِنْتِ، مُوشْ الِّي نْحِبْ عْلِيهْ آنَا.» ‏43  ‏44  ‏45 مِنْ بَعْدْ قَامْ مِالصَّلاَةْ وِرْجَعْ لِتْلاَمِذْتُو، يَاخِي لْقَاهُمْ رَاقْدِينْ مِنْ كَثْرِةْ مَا كَانُوا حْزَانَى. ‏46 وْقَالِلْهُمْ: «شْبِيكُمْ رَاقْدِينْ؟ قُومُوا صَلِّيوْ بَاشْ مَا تُحْصْلُوشْ فِي تَجْرْبَة.»

شَدَّانْ يَسُوعْ

‏47 وَقْتِلِّي يَسُوعْ كَانْ يِتْكَلِّمْ إِذَا بِيهُمْ نَاسْ جَايِينُو وِمْعَاهُمْ يَهُوذَا الِّي هُوَ وَاحِدْ مِالأَثْنَاشْ وْكَانْ يِمْشِي مِالقُدَّامْ وِقْرُبْ مِنْ يَسُوعْ بَاشْ يْسَلِّمْ عْلِيهْ بِالوِجْهْ. ‏48 قَالُّو يَسُوعْ: «يَا يَهُوذَا يَاخِي بْبُوسَة تْسَلِّمْنِي آنَا إِبْنْ الإِنْسَانْ؟» ‏49 وِالتْلاَمْذَة الِّي مْعَاهْ وَقْتِلِّي شَافُوا شْنُوَّة الِّي يَاقَعْ، قَالُوا: «يَا رَبْ نَضْرْبُوا بِالسْيُوفَا؟» ‏50 وِضْرَبْ وَاحِدْ مِنْهُمْ عَبْدْ مْتَاعْ أَعْلَى وَاحِدْ فِي رُؤَسَاءْ الكُهَّانْ وْقَصّْلُو وِذْنُو لِيمِينْ. ‏51 جَاوِبْ يَسُوعْ وْقَالْ: «يِكْفِي، حَدّْكُمْ هْنَا!» وْمَسْ وْذِنْ العَبْدْ وِشْفَاهْ. ‏52 وْقَالْ يَسُوعْ لْرُؤَسَاءْ الكُهَّانْ وِالقَادَة مْتَاعْ حَرَسْ الهَيْكِلْ وِالشْيُوخْ الِّي جَاوْهْ: «يَاخِي رَدِّيتُونِي مُجْرِمْ جَايِينِّي بِالسْيُوفَا وِالعْصِي؟ ‏53 كُلْ يُومْ كُنْتْ مَا بِينَاتْكُمْ نْعَلِّمْ فِي الهَيْكِلْ وْمَا حَطِّيتُوشْ يْدِيكُمْ عْلِيَّ، آمَا هَاذَا رَاهُو الوَقْتْ الِّي تْسَيْطْرُوا فِيهْ إِنْتُومَا وْقُوِّةْ الظْلاَمْ.»

بُطْرُسْ يُنْكُرْ يَسُوعْ

(مَتَّى 26‏:69‏-75؛ مَرْقُسْ 14‏:66‏-72؛ يُوحَنَّا 18‏:12‏-27)

‏54 وْكِشَدُّوهْ هَزُّوهْ وِمْشَاوْ حَتَّى لِينْ دَخْلُوا بِيهْ لْدَارْ أَعْلَى وَاحِدْ فِي رُؤَسَاءْ الكُهَّانْ وْبُطْرُسْ كَانْ يْتَبَّعْ فِيهْ مِنْ بْعِيدْ. ‏55 وَقْتِلِّي شَعّْلُوا النَّارْ فِي الوُسْطِيَّة مْتَاعْ الدَّارْ وْقَعْدُوا بِحْذَاهَا، قْعَدْ بُطْرُسْ مْعَاهُمْ. ‏56 يَاخِي ثَمَّة خْدِيمَة شَافِتُّو قَاعِدْ بِحْذَا النَّارْ، ثَبّْتِتْ فِيهْ وْقَالِتْ: «هَاذَا زَادَا كَانْ مْعَاهْ.» ‏57 آمَا بُطْرُسْ نْكَرْ وْقَالْ: «يَا مْرَا آنَا مَا نَعْرْفُوشْ!» ‏58 وْبَعْدْ شْوَيَّة شَافُو وَاحِدْ آخَرْ وْقَالْ: «إِنْتِ زَادَا مِنْهُمْ.» آمَا بُطْرُسْ قَالْ: «يَا بَشَرْ مَا نِيشْ آنَا!» ‏59 وْبَعْدْ مَا تْعَدَّاتْ سَاعَة تَقْرِيبْ ثَمَّة وَاحِدْ آخَرْ شَدْ صْحِيحْ وْقَالْ: «بِالحَقْ هَاذَا زَادَا كَانْ مْعَاهْ، عْلَى خَاطْرُو مِالجَلِيلْ.» ‏60 قَالْ بُطْرُسْ: «يَا بَشَرْ مَا نِيشْ فَاهْمِكْ فَاشْ قَاعِدْ تْقُولْ!» وْبِالوَقْتْ وْهُوَ مَازَالْ يِتْكَلِّمْ السَّرْدُوكْ صَاحْ. ‏61 تْلَفِّتْ الرَّبْ وِخْزَرْ لْبُطْرُسْ، يَاخِي تْذَكِّرْ بُطْرُسْ كِلْمِةْ الرَّبْ كِقَلُّو: «قْبَلْ مَا يْصِيحْ السَّرْدُوكْ تْكُونْ إِنْتِ نْكَرْتْنِي ثْلاَثَة مَرَّاتْ.» ‏62 وْقَامْ بُطْرُسْ وِخْرَجْ لْبَرَّة وِبْكَى بَرْشَة.

يَسُوعْ يِتْحْكَمْ عْلِيهْ فِي المَجْلِسْ مْتَاعْ اليْهُودْ

(مَتَّى 26‏:59‏-66؛ مَرْقُسْ 14‏:55‏-68؛ يُوحَنَّا 18‏:19‏-24)

‏63 وِالرْجَالْ الِّي كَانُوا يْعِسُّوا عْلَى يَسُوعْ، بْدَاوْا يِتْمَسْخْرُوا عْلِيهْ وْيَضْرْبُوا فِيهْ. ‏64 وِيْغَمّْضُولُو فِي عِينِيهْ وْيِسْأْلُوا فِيهْ: «تْرَا تْنَبَّأ وْطَلِّعْ شْكُونْ الِّي ضَرْبِكْ؟» ‏65 وْكَانُوا يْعَايْرُوا فِيهْ ابَّرْشَة حَاجَاتْ خَايْبَة.

‏66 وْكِطْلَعْ النْهَارْ عَمْلُوا رُؤَسَاءْ الكُهَّانْ وِالكُتَّابْ مْتَاعْ اليْهُودْ إِجْتِمَاعْ المَجْلِسْ مْتَاعْ اليْهُودْ وْهَزُّوهْ لْغَادِي. ‏67 وْقَالُوا: «إِذَا كَانِكْ إِنْتِ المَسِيحْ قُلْنَا!» يَاخِي قَالِلْهُمْ: «إِذَا قُلْتِلْكُمْ مَا كُمْشْ بَاشْ تْصَدّْقُونِي. ‏68 وْإِذَا سْإِلْتْكُمْ مَا كُمْشْ بَاشْ تْجَاوْبُونِي. ‏69 آمَا آنَا إِبْنْ الإِنْسَانْ مِنْ تَوَّا بَاشْ نْكُونْ قَاعِدْ عْلَى يْمِينْ اللهْ القَادِرْ عْلَى كُلْ شَيْء.» ‏70 يَاخِي قَالُوا الكُلْهُمْ: «إِمَّالاَ إِنْتِ إِبْنْ اللهْ؟» يَاخِي قَالِلْهُمْ: «إِنْتُومَا قُلْتُوا الِّي آنَا هُوَ!» ‏71 يَاخِي قَالُوا: «مَازِلْنَاشْ نِحْتَاجُوا تَوَّا لِشْهُودْ؟ هَانَا سْمَعْنَاهْ شْهِدْ عْلَى رُوحُو بْفُمُّو.»