Jang iko guru-guru Torat deng orang-orang Farisi pung kalakuang
23:1-36
23
1 Abis itu, Yesus bilang par orang banya deng par Antua pung murid-murid kata, 2 “Guru-guru Torat deng orang-orang Farisi pung tugas par ajar Kitab Torat par orang-orang, sama deng Musa dolo. 3 Tagal itu, kamong musti dengar deng iko samua yang dong ajar. Mar jang iko dong pung kalakuang, tagal dong sandiri seng biking apa yang dong ajar. 4 Dong biking atorang-atorang barát la suru orang iko akang, mar dong sandiri seng tolong orang par iko akang. Itu sama deng dong ika barang barat-barat la taru akang di orang pung bahu, mar dong seng mau sonto akang.5 Samua hal yang dong biking cuma biar orang lia la puji dong. Conto sa, dong biking dong pung kotak sombayanga labe basar deng biking dong pung ambu-ambub di kaki baju panjang luar labe panjang.* 6 Dong suka dudu di muka waktu pesta makang basar ka di tampa-tampa sombayang. 7 Dong sanang kalo orang-orang taru hormat par dong di pasar-pasar. Dong jua sanang kalo orang panggel dong par ‘tuang guru’.
8 Mar kamong ni, jang kamong mau dapa panggel par ‘tuang guru’, tagal kamong pung Tuang Guru cuma satu sa deng kamong samua ni basudara. 9 Jang kamong panggel satu orang lai di dunya ni par ‘bapa’, tagal kamong pung Bapa cuma ada satu sa deng Antua ada di sorga. 10 Jang kamong mau dapa panggel par ‘pamimping’, tagal kamong pung Pamimping cuma ada satu sa. Antua tu Orang yang Allah su Angka par Kasi Salamat Manusia. 11 Sapa yang paleng basar dari kamong, dia musti jadi jongos par yang laeng.* 12 La sapa yang angka diri, Allah nanti kasi jatu dia. Mar sapa yang anggap diri seng pung arti apapa, Allah nanti angka dia.*
13 Cilaka kamong guru-guru Torat deng orang-orang Farisi! Kamong tu munafik. Kamong tutu jalang dari orang-orang yang mau jadi Allah pung orang-orang. Kamong sandiri seng mau jadi Allah pung orang-orang la dong yang mau, kamong pele-pele dong.
[ 14 Cilaka kamong guru-guru Torat deng orang-orang Farisi! Kamong tu munafik. Kamong parlente janda-janda par rampas dong pung harta samua. Mar, kamong tutu kamong pung busu tu deng kamong pung sombayang yang panjang-panjang. Tagal itu, kamong nanti dapa hukumang yang labe barát.]
15 Cilaka kamong guru-guru Torat deng orang-orang Farisi! Kamong tu munafik. Kamong nai turung gunung, balayar putus tanjong langgar lautang par bawa satu orang maso agama Yahudi. Mar waktu dia su iko kamong, kamong biking dia dua kali labe jahat dari kamong deng pantas par maso naraka.
16 Cilaka kamong pamimping-pamimping buta e! Kamong ajar orang kata kalo dong sumpa demi Tampa Sombayang Pusat, dia seng taika deng dia pung sumpa tu kalo dia seng biking akang. Mar kalo dia sumpa demi mas yang ada dalang Tampa Sombayang Pusat, dia taika deng sumpa tu jadi dia musti biking akang. 17 Hoe kamong orang-orang bodo yang buta! Mana yang labe panting, mas ka Tampa Sombayang Pusat yang kasi kudus akang mas tu? 18 Kamong ajar lai kalo orang sumpa demi tampa bakar korbang par Allah, dia seng taika deng dia pung sumpa tu kalo dia seng biking akang. Mar kalo dia sumpa demi korbang di atas tampa bakar korbang tu, dia taika deng sumpa tu jadi dia musti biking akang. 19 Hoe orang-orang buta e! Mana yang labe panting, korbang ka tampa bakar korbang yang kasi kudus korbang tu? 20 Tagal itu, sapa yang sumpa demi tampa bakar korbang, dia su sumpa demi tampa bakar korbang tu deng demi samua yang ada di atas akang. 21 La sapa yang sumpa demi Tampa Sombayang Pusat, dia su sumpa demi Tampa Sombayang Pusat deng demi Allah yang ada di situ lai. 22 Deng sapa yang sumpa demi sorga, dia su sumpa demi Allah pung kadera raja deng demi Antua yang dudu di kadera tu.*
23 Cilaka kamong guru-guru Torat deng orang-orang Farisi! Kamong tu munafik. Kamong rajing kasi parpuluhang, sampe yang paleng kacil dari kamong pung hasil kabong macang selasi, adas manis, deng jintang jua kamong kasi. Mar, yang paleng panting dalang Hukum Torat macang biking apa yang batul par orang laeng, pung hati bae, deng pegang janji, kamong seng biking akang.* Kasi parpuluhang tu panting, mar yang labe panting, kamong jua musti biking apa yang batul par orang laeng, pung hati bae, deng pegang janji lai. 24 Hoe kamong pamimping-pamimping buta! Apa yang kurang panting dalang Hukum Torat tu, kamong biking akang. Mar apa yang paleng panting, kamong seng biking akang. Akang sama deng kamong tapis agas dari kamong pung aer minong, mar onta yang ada dalang aer tu kamong talang.
25 Cilaka kamong guru-guru Torat deng orang-orang Farisi! Kamong tu munafik. Barang, dari luar orang lia kamong iko Allah pung atorang, mar dalang hati kamong tu galojo deng baringing. Kamong macang deng orang yang cuci galas deng piring pung bagiang luar sa mar kasi tinggal akang pung dalang badaki-badaki. 26 Hoe orang Farisi buta e! Cuci galas deng piring pung bagiang dalang tu do biar akang pung luar jua barsi.
27 Cilaka kamong guru-guru Torat deng orang-orang Farisi! Kamong tu munafik. Kamong macang deng kubur yang dapa cat puti barsi. Dari luar akang lia bagus, mar akang pung bagiang dalang pono deng orang mati pung tulang-tulang deng sagala macang hal yang busu-busu.* 28 Sama deng kamong lai. Dari luar, orang lia kamong bae paskali, mar di dalang, kamong paleng munafik deng pung hati paleng jahat.
29 Cilaka kamong guru-guru Torat deng orang-orang Farisi! Kamong tu munafik. Kamong biking Allah pung juru-juru bicara pung kubur-kubur deng hias orang-orang yang hidop batul di muka Allah pung tugu-tugu. 30 La kamong bilang kata, ‘Coba kalo katong hidop di jamang katong pung moyang-moyang dolo-dolo, pasti katong seng iko dong par bunu Allah pung juru-juru bicara tu.’ 31 Mar deng kamong pung bicara tu, kamong su mangaku kalo kamong tu turunang dari orang-orang yang bunu Allah pung juru-juru bicara tu. 32 Jadi, kasi tinggal kamong sambung kamong pung moyang-moyang pung dosa dolo-dolo tu.
33 Hoe kamong orang-orang jahat! Kamong tu ular babisa! Jang sangka kata kamong bisa lari dari hukumang di naraka!* 34 Jadi, dengar bae-bae! Beta ada utus Beta pung juru-juru bicara, orang-orang yang pung pikirang tajang, deng guru-guru yang batul par kamong. Mar nanti dari dong ada yang kamong bunu, ada yang kamong salib, ada yang kamong siksa di tampa-tampa sombayang, deng ada yang kamong iko dari kota ka kota par siksa dong. 35 Jadi, kamong nanti dapa hukum tagal kamong pung moyang-moyang su bunu orang-orang yang seng pung sala, mulai dari Habel, orang yang batul tu, sampe ka Berekya pung ana Sakaria yang dapa bunu di tenga-tenga tampa bakar korbang deng Ruang Kudus di Tampa Sombayang Pusat tu.* 36 Dengar bae-bae tagal apa yang Beta bilang ni batul! Kamong yang hidop sakarang ni nanti dapa hukum tagal samua yang dong biking tu.”
Yesus pung hati susa par kota Yerusalem
23:37-39
37 Tarus, Yesus bale bilang, “Sio orang-orang Yerusalem e! Kamong yang bunu Allah pung juru-juru bicara deng lempar orang-orang yang Allah utus par kamong deng batu sampe mati. Su ulang kali Beta rindu par kumpul kamong macang deng ayang mai kumpul akang pung anana di akang pung bawa sayap, mar kamong seng mau. 38 Dengar bae-bae! Allah su lapas tangang dari kamong deng kamong pung kotac tu. 39 Dengar beta bilang par kamong! Mulai dari oras ni jua, kamong nanti seng lia Beta lai sampe kamong bilang, ‘Mari puji Antua yang datang deng Tuhan pung kuasa!’ ”*