Yesus kasi bae orang lumpu satu
9:1-8
9
1 Abis itu, Yesus nai parau la manyabrang dano ka kota Kapernaum, tampa Antua tinggal.* 2 Di situ, ada orang-orang datang bawa orang lumpu satu deng palbet par Antua. Waktu Antua lia dong biking bagitu, Antua tau kalo dong parcaya Antua bisa kasi bae dia, jadi Antua bilang par dia kata, “Ana e, kasi kuat ale pung hati tu! Beta su kasi ampong ale pung dosa-dosa.”3 Pas dengar bagitu, babarapa guru Torat bilang dalang hati kata, “Dia su hojat Allah ni!”
4 Mar Yesus tau dong pung pikirang la bilang par dong kata, “Mangapa kong kamong pikir hal-hal jahat macang bagitu dalang hati? 5 Coba pikir mana yang labe gampang par bilang: Beta su kasi ampong ale pung dosa-dosa, ka badiri la bajalang suda? 6 Mar, biar kamong tau kalo Beta Ana Manusia ni pung kuasa di dunya par kasi ampong orang pung dosa-dosa, lia apa yang Beta mau biking ni!” Tarus, Antua bilang par orang lumpu tu kata, “Badiri, angka ale pung palbet tu, la pulang!”
7 La orang lumpu tu badiri la pulang. 8 Waktu orang banya lia apa yang jadi tu, dong taku la puji-puji Allah yang su kasi kuasa macang bagitu par manusia.
Yesus panggel Matius par jadi Antua pung murid
9:9-13
9 Abis itu, Yesus pi dari situ. Waktu di jalang, Antua dapa lia tukang tagi pajak satu ada dudu di tampa bayar pajak. Dia nama Matius. Antua bilang par dia kata, “Mari iko Beta!” Pas dengar bagitu, Matius badiri la iko Antua.
10 Abis itu, Antua deng Antua pung murid-murid pi makang di Matius pung ruma. Waktu itu, tukang tagi pajak banya deng orang-orang yang orang Yahudi anggap bardosa jua ada datang la dudu makang sama-sama deng Yesus dong lai. 11 Waktu orang Farisi lia bagitu, dong bilang par Antua pung murid-murid kata, “He, mangapa kong kamong pung Guru tu dudu makang sama-sama deng tukang tagi pajak deng orang-orang bardosa tu?”*
12 Yesus dengar apa yang dong bilang tu, la bilang par dong kata, “Orang yang seng saki seng parlu dokter. Cuma orang saki sa. 13 Coba pi cari tau Allah pung Tulisang ni pung arti, ‘Orang yang kasi unju dia pung hati bae par orang laeng, itu yang biking Beta pung hati sanang labe dari korbang yang dia kasi par Beta.’ Barang, Beta datang bukang par panggel orang-orang yang rasa diri batul, mar panggel orang-orang bardosa.”*
Yesus pung ajarang seng bole baku tacampor deng ajarang lama
9:14-17
14 Abis itu, Yohanis Tukang Baptis pung murid-murid datang par Yesus la tanya kata, “Katong deng orang Farisi jaga puasa. Mar mangapa kong Bapa pung murid-murid seng?”
15 La Yesus jawab dong deng ande-ande kata, “Beta ni macang deng panganting laki-laki la Beta pung murid-murid tu macang deng panganting laki-laki tu pung tamang-tamang. Waktu ada pesta kaweng, dia pung tamang-tamang pung hati seng susa tagal dia ada sama-sama deng dong to? Mar satu waktu, orang nanti ambe dia dari dong. Waktu itu baru dong pung hati susa la puasa.”
16 Abis itu, Antua bilang ande-ande dua lai par kasi balajar dong. Antua bilang, “Seng ada orang tambal kaeng sapanggal yang masi baru di baju lama. Barang kalo dia biking bagitu, nanti kaeng yang baru tu susut la akang biking baju lama pung tampa tarobe tu labe tamba basar. 17 Bagitu lai deng anggor. Seng ada orang yang simpang anggor baru dalang tampa simpang anggor bakas dari kambing pung kuli tu. Barang kalo dia biking bagitu, nanti anggor baru tu biking tampa simpang anggor bakas tu kambong la pica. Tarus anggor tu tumpa la tampa simpang anggor tu seng tapake lai. Mar orang musti simpang anggor baru dalang tampa simpang yang baru lai, biar dua-dua seng rusak.”
Yesus kasi hidop ana parampuang satu deng kasi bae parampuang satu yang dapa mens seng barenti-barenti
9:18-26
18 Waktu Yesus masi bicara, ada satu dari orang Yahudi pung kapala tampa sombayang datang par Antua. Dia tikang lutu somba Antua la bilang kata, “Bapa, beta pung ana parampuang ada baru mati sa, mar mari tolong pi ka ruma la taru Bapa pung tangang di atas dia jua biar dia bisa hidop kombali.”
19 La Antua badiri la Antua deng Antua pung murid-murid pi sama-sama deng dia.
20 Waktu di tenga jalang, ada parampuang satu yang su sapulu dua taong dapa mens seng barenti-barenti iko Antua dari balakang la sonto Antua pung baju panjang luar pung ujung. 21 Barang, dalang hati dia bilang kata, “Asal beta sonto Antua pung baju panjang luar sa, beta pasti bae.”
22 La Antua bale lia dia la bilang kata, “Nona e, kasi kuat nona pung hati tu. Tagal nona parcaya Beta, nona bae.” Oras itu tu jua dia bae.
23 Waktu Antua maso ka kapala tampa sombayang tu pung ruma, Antua lia ada orang-orang tiop suling deng jua ada orang banya baribot tagal manangis ana parampuang tu. 24 La Antua bilang par dong kata, “Kamong samua kaluar! Ana ni seng mati, cuma tidor sa.” Mar dong tatawa Antua. 25 Abis dong kaluar, Antua maso la pegang ana parampuang tu pung tangang, la dia hidop kombali. 26 La kabar soal apa yang jadi tu tasiar sampe ka antero daera tu.
Yesus kasi bae orang buta dua
9:27-31
27 Abis itu, Yesus pi dari tampa tu. Di tenga jalang, ada orang buta dua iko Antua dari balakang kong bataria kata, “Raja Daud pung Turunang e! Tolong kasi unju hati bae par katong jua!”
28 Tarus, waktu Antua su maso ka ruma satu, orang buta dua tu datang par Antua. La Antua tanya dong kata, “Kamong parcaya kalo Beta bisa kasi bae kamong pung mata?”
La dong jawab kata, “Iya Bapa, katong parcaya.”
29 Tarus, Antua pegang dong pung mata la bilang kata, “Jadi macang apa yang kamong parcaya tu.” 30 Oras itu jua dong bisa dapa lia. La Antua larang dong deng karas kata, “Dengar! Jang paskali satu orang lai tau soal ini.”
31 Mar kaluar dari situ, dong pi carita soal Antua ka antero daera tu.
Yesus kasi bae orang bisu satu
9:32-34
32 Waktu orang buta dua tu kaluar, ada orang bawa orang bisu satu yang takanal par Yesus. 33 Tarus, Antua user setang tu dari dia la dia bisa bicara. Lia bagitu, orang banya taherang-herang paskali la bilang, “Katong balong parna lia hal macang bagini di Israel ni.”
34 Mar orang-orang Farisi bilang kata, “Dia pake Setang pung Raja pung kuasa par user setang-setang.”*
Yesus rasa kasiang lia orang banya yang parlu dengar Allah pung ajarang
9:35-38
35 Yesus bajalang koliling samua kota deng kampong di propinsi Galilea la kasi balajar orang di orang Yahudi pung tampa-tampa sombayang deng kasi tau Kabar Bae soal Allah pegang parenta jadi Raja. Antua jua kasi bae orang-orang dari sagala macang panyaki deng kasi bae orang-orang cacat.* 36 Waktu Antua lia orang banya yang iko Antua, Antua rasa kasiang deng dong. Barang, dong bingong tagal seng tau jalang yang batul deng seng ada orang par tolong dong. Dong sama deng domba sakawang yang kalalerang tagal seng ada orang jaga.* 37 Tarus, Antua bilang par Antua pung murid-murid kata, “Banya orang su siap par dengar deng parcaya Kabar Bae, mar orang yang mau kasi tau akang par dong tu cuma sadiki sa. Itu sama deng hasil kabong ada banya, mar orang karja par ambe hasil tu cuma sadiki sa. 38 Jadi, orang karja parlu minta dari tuang kabong par kiring orang-orang tamba par ambe hasil tu. Bagitu lai deng kamong. Sombayang minta Tuhan Allah utus orang-orang labe banya lai par kasi tau Kabar Bae par orang-orang yang balong dengar akang.”*