Yesus dapa coba dari Setang pung Raja
4:1-11
4
1 Abis dapa baptis, Allah pung Roh hentar Yesus ka padang gurun biar Setang pung Raja coba Antua.* 2 Di situ, Antua puasa ampa pulu siang ampa pulu malang, la Antua lapar. 3 Tarus, Setang pung Raja yang dapa panggel par tukang coba tu datang la bilang par Yesus kata, “He, kalo memang Se ni Allah pung Ana, coba parenta batu-batu ni jadi roti!”4 Yesus jawab, “Allah pung Tulisang ada bilang, ‘Manusia hidop bukang cuma dari roti sa, mar dari kata apa sa yang kaluar dari Allah pung mulu.’ ”*
5 Abis itu, Setang pung Raja bawa Yesus ka kota kudus Yerusalem la taru Antua di bagiang yang paleng tinggi di Tampa Sombayang Pusat. 6 La dia bilang par Antua kata, “Kalo memang Se ni Allah pung Ana, coba buang diri ka bawa! Barang, dalang Allah pung Tulisang ada bilang, ‘Allah nanti suru Antua pung malekat-malekat par tada Se, biar Se pung kaki seng tatumbu batu.’ ”*
7 Yesus jawab dia, “Allah pung Tulisang jua ada bilang, ‘Jang coba-coba kamong pung Tuhan Allah!’ ”*
8 Abis itu, Setang pung Raja bawa Yesus satu kali lai. Dia bawa Antua ka atas gunung yang paleng tinggi la kasi lia samua karajaang di dunya deng akang pung sagala macang harta par Antua. 9 La dia bilang par Antua kata, “Beta nanti kasi samua tu par Se asal Se tikang lutu somba beta.”
10 Mar Yesus bilang par dia, “He Setang! Pi dari Beta pung dalang muka! Barang, Allah pung Tulisang ada bilang, ‘Somba Tuhan, kamong pung Allah, deng dengar-dengarang Antua sa!’ ”* 11 Abis Yesus bilang bagitu, Setang pung Raja pi kasi tinggal Antua, la malekat-malekat datang tolong Antua.
Yesus pi ka Galilea
4:12-17
12 Satu kali bagini, Yesus dapa dengar kalo Yohanis Tukang Baptis su dapa bui. Jadi Antua bale ka propinsi Galilea.* 13 Antua lewat kampong Nasaret la pi tinggal di kota Kapernaum yang ada di pinggir dano Galilea di suku Sebulon deng suku Naftali pung tana.* 14 Yesus tinggal di situ, la deng bagitu Allah pung kata-kata yang Juru Bicara Yesaya su bilang tu jadi. Dia bilang,
15 “Tana Sebulon deng tana Naftali, di pinggir dano Galilea,
di aer Yordan pung sabala matahari maso, di propinsi Galilea, tampa orang-orang bukang Yahudi tinggal lai.
16 Orang-orang yang tinggal dalang galap tu
su lia tarang yang luar biasa.
La par dong yang taku mati tarus-tarus tagal dong pung dosa-dosa,
su muncul tarang yang kasi tarang dong pung hati biar dong bisa salamat.”*
17 Mulai dari waktu itu Yesus tabaos kata, “He orang-orang e! Kasi tinggal kamong pung dosa-dosa, tagal seng lama lai Allah pegang parenta jadi Raja!”*
Yesus panggel murid-murid yang partama
4:18-22
18 Satu kali bagini, waktu Yesus ada bajalang di pinggir dano Galilea, Antua dapa lia dua orang basudara yang ada buang jareng di dano tu, tagal itu tu dong pung karja. Dong dua tu nama Simon yang dapa panggel par Petrus deng dia pung sudara Andarias. 19 La Antua bilang par dong dua kata, “Mari iko Beta! Kamong dua biasa pi cari ikang, mar Beta nanti ajar kamong bagemana pi cari orang-orang par iko Beta.” 20 Oras itu jua, dong dua langsung kasi tinggal dong pung jareng tu la pi iko Yesus.
21 Abis itu, Yesus bajalang tarus la dapa lia dua orang basudara lai, satu nama Yakobis deng satu lai nama Yohanis. Dong dua ni Sebedeus pung anana. Dong deng dong pung bapa ada biking bae dong pung jareng dalang parau. Antua panggel dong dua, 22 deng langsung dong kasi tinggal dong pung parau deng dong pung bapa la pi iko Antua.
Yesus kasi balajar deng kasi bae orang-orang
4:23-25
23 Abis itu, Yesus bajalang koliling antero propinsi Galilea la kasi balajar orang di orang Yahudi pung tampa-tampa sombayang deng kasi tau Kabar Bae soal Allah pegang parenta jadi Raja. Antua jua kasi bae orang-orang dari sagala macang panyaki deng kasi bae orang-orang cacat.* 24 Orang-orang di antero propinsi Siria dapa dengar soal apa yang Yesus su biking. Jadi, dong bawa samua orang yang pung sagala macang panyaki, orang yang sangsara tagal rasa saki paskali, yang takanal, yang mati-mati ayang, deng yang lumpu par Antua. La Antua kasi bae dong samua. 25 Orang kawang-kawang iko Antua. Ada yang datang dari Galilea, Dekapolis, Yerusalem, Yudea, deng dari sabala aer Yordan.