A Phak Mipa
8
1 Mualpang pan Jesu a paisuk ciangin mihon tampi in amah zui uh hi.
2 Miphak aa khat va pai-a a mai-ah khukdinin,
"Topa aw,
ut peuh lecin nong siangsak thei hi,"
a ci hi.
3 Jesu in a khut zanin tuapa lawnga,
"Ka ut hi.
Siang ta in!"
a ci hi.
Thakhatin a phak natna a dam bb pah hi.
4 Tua ciangin Jesu in ama kiangah,
"Kuama kiangah gen kei in.
Ahi hangin pai-in siampipa kiangah va kilak inla amaute tunga teci panna-in Moses thupiak bangin biakna na pia in,"
a ci hi.
Galkap Zakhat-ukpa Upna
5 Capernaum ah Jesu a lut ciangin ama kiangah zakhat-uk bupa va pai-in huhna a ngen hi.
6 "Topa aw,
ka nasempa pumzawtin lumcip-a,
a gim mahmah hi,"
a ci hi.
7 Jesu in,
"Hong pai-in ka damsak ding hi,"
a ci hi.
8 Zakhat-ukpa in,
"Topa aw,
ka inn sungah nang kong lutsak ding kilawm lo hi.
Kammal khat gen ziau lecin ka nasempa dam ding hi.
9 Kei mahmah zong thuneihna nuai-a om mi ka hi-a,
keima nuai-ah galkapte a om hi.
Khat kiangah,
‘Pai in,’
ka cihleh pai-a,
adang khat kiangah,
‘Hong pai in,’
ka cihleh hong pai hi.
Ka nasempa kiangah,
‘Hih sem in,’
ka cih ciangin a sem hi,"
a ci hi.
10 Jesu in hih thu a zak ciangin lamdang sa a,
amah a zuite kiangah,
"Thutak kong geninah,
Israel-te lakah hih zah-a lian upna a nei khat beek ka mu nai kei hi.
11 Ken kong cihinah,
ni suahna le nitumna pan mi tampi hong pai-in vantung gam pawipi-ah Abraham,
Isaac le Jacob-te tawh a tukhawm ding uh hi.
12 Ahi hangin kumpi-gam mite ahi uh leh kahna le hagawina a omna mun khuamial lakah kipaii ding hi,"
a ci hi.
13 Tua ciangin Jesu in zakhat-ukpa kiangah,
"Pai in.
A piang dinga na up bangin piang ding hi,"
a ci hi.
Tua hun lianin a nasempa a dam hi.
Jesu in Tampi Damsak
14 Peter inn sungah Jesu a lut ciangin Peter sungnu nattuna lupna-a lum a mu hi.
15 Jesu in a khut lawnsaka,
nattun a dam hi.
Amah tho in zin a do hi.
16 Nitak lam ciangin dawilut mi tampite ama kiangah paipih uh a,
kammal khat tawh dawite hawlkhia in cina khempeuh a damsak hi.
17 Hih in kamsangpa Isaiah tunga genkholhna:
"I zawngkhalnate amah in la-a,
i natnate a pua hi,"
cc cih thu a tangtunna ahi hi.
Jesu Nungzuih Man
18 Jesu in a kima mihonpite a muh ciangin tuili galkhat lama pai dingin thu a pia hi.
19 Tua laitakin thukham siapa khat va pai-a,
"Sia aw,
na paina peuhpeuh ah kong zui ding hi,"
a ci hi.
20 Jesu in,
"Ngiate in kua nei a,
huihlak vasate in bu nei uh hi.
Ahi hangin Mihing Tapa in a lutang ngak nading mun a nei kei hi,"
ci-in a dawng hi.
21 Nungzui dang khat in,
"Topa aw,
va ciahin ka pa va vui masa phot leng,"
a ci hi.
22 Ahi hangin Jesu in,
"Ka nung hong zui in,
misite in amau misite na vui uh hen,"
ci-in a gen hi.
Jesu in Huihpi Daisak
23 Tua ciangin amah gunkuang sungah tuanga,
a nungzuite in a zui uh hi.
24 Theih kholh lohin tui tungah huihpi nasiatakin kinuai a,
tuihualte in gunkuang a zialnelh hi.
Ahi hangin Jesu a ihmu lai hi.
25 Nungzuite pai-in,
"Topa,
hong honkhia in!
Tui ka kia petmah uh hi!"
ci-in a phong uh hi.
26 Amah in,
"No upna neute aw,
bang dinga tua zah a lau lawmlawm na hi uh hiam?"
ci-in a dawng hi.
Tua ciangin amah tho a huih le tuihualte a tai ciangin a daipah dikdek hi.
27 Tua mite in lamdang sa mahmah uh a,
"Hih pa bangci mi hiam?
Huih le tuihual nangawn in a thu a mang tazen a!"
a kici uh hi.
Dawilut Mi Nih Damsakna
28 A galkhat lam Gadarenes dd kualah Jesu a tun ciangin hanlak,
panin dawilut mi nih paikhia-in na dawntuah uh hi.
Amaute ngongtat lua uh ahi manin tua lai tawn ngam kuamah a om kei hi.
29 Amaute in,
"Pasian Tapa aw,
ko bang cih hong sawm na hi hiam?
A kisehsa hun a tun ma-in kote bawlsia dinga hih lai-a hong pai na hi hiam?"
ci-in a kiko uh hi.
30 Tua pan a gamla simah vok honpi khat a gamta hi.
31 Dawite in Jesu kiangah,
"Ko nong hawlkhiat leh vokte sungah hong lutsak tapeuh in,"
ci-in a ngen uh hi.
32 Jesu in amaute kiangah,
"Pai un!"
a ci hi.
Tua ciangin amaute pusuak in vokte sungah a lut uh hi.
Vok honte kensang pan tuili sungah tuaksukin a si khin uh hi.
33 Vok cingte khuapi sungah tai uh a,
dawilutte gel tunga thupiang le hih thu teng a ko uh hi.
34 Tua ciangin Jesu dawn dingin khuazangpi in a kuankhia uh hi.
Amah a muh uh ciangin amaute in tua kual a nusiat nadingin a thum uh hi.