Makaite le Kamsangte Kitai
3
1 Tua ciangin keimah in,"No Jacob makaite,
Israel innkuan gam-ukte aw, ngai un.
Thutang a thei ding note hi lo maw,
2 no a hoih mudah a, a hoih lo a itte aw,
ka mite vunhawka,
a guh tunga satak kheuhkhiate aw;
3 ka mite’ sa a nete,
a vun uh hawka a guh uh a suzante,
sikbeel a kan ding sa satnen bangin satnen a,
beel sunga suan ding banga a hihte.
Thutang thei lo ding na hi uh hiam?" ka ci hi.
4 Tua ciangin amaute TOPA tungah kiko ding uh a,
ahi hangin a dawng kei ding hi.
Amaute gamtatsia uh ahi manin
tua hun ciangin amaute panin a maitang a sel ding hi.
5 TOPA gen hih ahi hi:
"No kamsangte in
ka mite lam a khialsak,
amaute in an hong vak uh leh
amaute lungnopna tangkosakin
hong vak kei uh leh
gal tuah ding na gelkholhsak uh hi.
6 Tua ahi ciangin note tungah mangmuh kholh lohin zan hong tung dinga,
aisanna loin khuamial hong tung ding hi.
Kamsangte adingin ni tum dinga,
amaute adingin sun a mial ding hi.
7 Thumute maizum ding uh a,
thugenkholte a lungkim kei ding uh hi.
Pasian in dawng lo ahi manin
a vekun a maitang uh a hum ding uh hi," a ci hi.
8 Ahi hangin kei ka hileh
Jacob khialhna le Israel mawhna pulak dingin
vangliatna, TOPA Kha le
thutang le hatna tawh
ka kidim ding hi.
9 No Jacob innkuan makaite,
Israel innkuan gam-ukte,
thutang deih lo-a
thumaan a khialin a heite aw za un;
10 Sisan luangsakin Zion na lam uh a,
kheltatna tawh Jerusalem na lam uh hi.
11 Tuanu makaite in golhguk sum tawh thu khen uh a,
ama siampite in thaman ngah nadingin thu hilh uh a,
ama kamsangte in sum ngah nading bekin kam a sang uh hi.
Tua hi napi TOPA tungah kinga-in,
"Eite lakah TOPA om hi lo hiam?
Eite tungah siatna hong tung kei ding hi," ci uh hi.
12 Tua ahi ciangin nangma hangin
Zion khua sung lo bangin kikho dinga,
Jerusalem ninkholnapi suakin,
biakinnpi omna mual gammang lak a suak ding hi.