Jonah 2

Jonah Thungetna

1 Jonah in ngapi gil sung pan TOPA ama Pasian tungah thu a ngen hi. 2 Amah in:

"Ka lungdon hunin TOPA ka sama,

amah in kei hong dawng hi.

Hankhuk a thukpi panin nong huh ding kong ngena,

kong kikona nong za hi.

3  A thukna mun sung nong denna-a,

tuipi thukpenna munah ka om a,

tui kiveite in kei hong pingpei-in

nangma tuihualte khempeuh le

na tui kilokte in ka tungah a hong vial hi.

4  "Na maitang panin

kei hong kihawlkhia ta hi;

ahi hangin na biakinnpi siangtho lam

ka en kik veve ding hi," ka ci hi.

5  Na tui kipei in kei hong delhcip a a,

tui thukpi in kei hong umcih hi;

tuipi tuipaante in ka lu vialcip hi.

6  Mualliante bulpi dong ka tumsuk hi;

a nuai-ah lei in kei hong dongcip den hi.

Ahi hangin TOPA keima Pasian aw dumpi sung panin ka nuntakna nong laktohsak hi.

7  "TOPA aw, ka nuntakna a bah gawp ciangin

nang kong phawka,

ka thungetna

na biakinnpi siangtho sung nang tungah hong tung hi.

8  Bangmah a man lo milim beelte in,

amau ading hehpihna a taan uh hi.

9  Ahi hangin ke’n lungdamna la tawh

nang kong bia ding hi.

Ka kiciamnasa ka tangtungsak dinghi.

TOPA kiang panin hotkhiatna hong pai hi," a ci hi.

10 Tuateh TOPA in ngasa thu pia a, lei keu ah Jonah luakhia hi.