Kauphe, Mei le Khaukhai
7
1 TOPA in kei hong lah hih ahi hi: Kumpipa tanh ding teng a kilak khit phet sel kik dinga a kipat laitakin kauphe honpi a omsak hi. 2 Tuate in gamsung khempeuh a gaih siang khit ciangin,"Thupipen TOPA aw, a mawhna maisak hoh in! Jacob in bangci thuak zawh ding ahi hiam? Amah neu lua mahmah hi lo hiam?" ci-in ka awngkhia hi.3 Tua ciangin TOPA in a hehna a khiam hi.
TOPA in, "Hih thu a piang nawn kei ding hi," a ci hi.
4 Thupipen TOPA in kei tungah hong lah hih ahi hi: Thupipen TOPA mei tawh thukhen dingin kipan hi; tua mei in tui thukpite keusak a, leitung a hultum hi. 5 Tua ciangin Thupipen TOPA aw, khawl tapeuh in! Jacob in bangci thuakzawh ding hiam? Amah neu lua mahmah hi lo hiam?" ci-in ka awngkhia hi.
6 Tua ciangin TOPA in a hehna a khiam hi.
Thupipen TOPA in, "Hih zong a piang nawn kei ding hi," ci hi.
7 Hih in ama hong lah ahi hi: Khaukhai maantakin kikhai-a a kiciang kulh gei-ah khaukhai tawi kawmin Topa a ding hi. 8 TOPA in kei kiangah, "Amos aw, bang na mu hiam?" ci-in hong dong hi.
"Khaukhai khat ka mu hi," ci-in ka dawng hi.
Tua ciangin Topa in, "En in, ka mi Israel-te lak khaukhai-in ka en hi; amaute ka hawi nawn kei ding hi.
9 "Isaac munsangte kisusia dinga,
Israel munsiangthote a kisusia ding hi;
Jeroboam innkuante do dingin ka namsau ka kuansak ding hi," a ci hi.
Amos le Amaziah
10 Tua ciangin Bethel a siampipa Amaziah in Israel kumpipa Jeroboam tungah thu puak a, "Amos in Israel-te laizang takah nang do hong sawm hi. Ama thugen gam sung tengin thuak zo lo hi. 11 Tua hi-a Amos in thugen a:
"Jeroboam namsau in si dinga,
amau leitang panin Israel salin
kikaikhia taktak ding hi,’ ci hi," a ci hi.
12 Tua ciangin Amaziah in Amos tungah, "Nang thumupa paikhia! Na Judah gamah ciah kik in. Tua lai-ah na nuntak nading na sem inla kam va sang in. 13 Bethel ah kam sang nawn peuhmah kei in. Bang hang hiam cih leh hihtak kumpite munsiangtho hi-a, kumpi-gam biakinnpi ahi hi," a ci hi.
14 Amos in Amaziah kiangah, "Kei kamsang lah hi loin kamsangpa tapa zong ka hi kei hi, tuucing khat ka hi a, theiba huan kep tawh a thuah ka hi hi. 15 Ahi hangin TOPA in ka tuucinna panin hong lakhia a kei kiangah,"Pai inla ka mi Israel-te tungah thu va gen in," hong ci hi. 16 Tua ahi ciangin tu-in TOPA thugen za in. Nang in,
‘Israel-te langah thu gen nawn kei in,
Isaac innkuante langkhat ah na thu hilhhilh tawp in,’ nong ci hi.
17 "Tua ahi ciangin TOPA thugen hih ahi hi:
"‘Khuapi sungah na zi kizuak dinga,
na tanute na tapate namsau-in a puk ding uh hi.
Na leitang kitehin kihawmthang dinga,
lawkite da gam ah nang na si ding hi.
Tuateh Israel-te amau leitang pan
salin a kikaikhia pelmawh ding hi,’ ci hi," a ci hi.