Tamlawhna le Kisik nading Sapna
5
1 Israel innkuante aw, note tawh kisai-a ka tamlawhna hih kammal za un:2 "A Bit Israel pukta hi;
tho kik ngei nawn lo ding hi.
Ama leitangah lum dildel hi;
a phong ding kuamah om lo hi."
3 Hih in Thupipen TOPA gen ahi hi:
"Israel khuapi lian in a thahat tulkhat kuansak a,
zakhat bek nungta lai hi;
khuapi khat in a thahat zakhat kuansaka,
sawm bek a nungta lai hi,"
4 Hih in Israel innkuan tunga TOPA gen ahi hi:
"Hong zong unla nungta un;
5 Bethel zong kei un,
Gigal ah pai kei un,
Beersheba ah zin kei un.
Ahang in, Gilgal saltang taktak dinga,
Bethel bangmah lo kisuaksak ding hi," ba
6 TOPA zong unla nungta un,
tua hikei leh Joseph innkuante tungah mei bangin hong kuang dinga,
tua in hulin,
Bethel in a phelh ding kuamah a ngah kei ding hi.
7 Thutang khaatna suah a,
thumaan leilaka a lawn note aw,
8 (Pleiades le Orion bawlpa,
khuamialna nisuak tung a suaksakpa,
sunni mialsaka zan a suaksak,
tuipi tui sama,
lei maitanga a sungpa -
ama min TOPA ahi hi.
9 Mun muanhuaite susia dingin amah manlang a,
a kilim um mahmah khuapi a susia hi)
10 Note in thukhen zuma thumaan gen siamte na mudah uh a,
thumaan gente na hua uh hi.
11 Mizawngte na tuancil uh a,
a antang teng uh ut lopipi-in na kipiasak uh hi.
Tua ahi manin suang kiseek inn na lam uh hangin
a sungah na teng kha kei ding uh hi;
lenggui hoihna lo na neih uh hangin
lenggahzu na dawn kha kei ding uh hi.
12 Ahang in, na langpanna zah uh le
na mawhnate uh a liatna ka thei hi.
A thumaante nengniamin, golhsum na la uh a,
thukhen zumte ah mizawngte thu amaanin na khensak kei uh hi.
13 Tua ahi ciangin hunte gilo ahi manin
tua bang hun ciangin a ngaihsun thei mite daitakin a om uh hi.
14 Na nuntak nadingun
gitlohna zong loin a hoih zong un.
Tua ciangin amah a hi ngeisa hi na cih bang tektekun,
TOPA Thahatpen Pasian note tawh hong omkhawm ding hi.
15 Gitlohna mudah un, thu hoih it un;
thukhen zum ah amaanin thu khen un.
Tua hileh TOPA Thahatpen Pasian in
a baanglai Joseph hong lainat kha thei ding hi.
16 Tua ahi manin Topa Thahatpen TOPA Pasian gen hih ahi hi:
"Lampi dung khempeuh le mihon kikhopna
mun khempeuh ah nasa-in kapa thumna a om ding hi.
Lokho mite a kap dingin kisam dinga,
kah siamte a thum dingin kicial ding hi.
17 Note omna munmun ah hong pai ding ka hi manin
lenggui lo khempeuh ah kithum ding hi,"
TOPA in cikhia hi.
TOPA’ Ni
18 TOPA ni a ngaklah note,
gimna nak thuak na nucia!
Bang hangin TOPA ni ngaklah na hi uh hiam?
Tua ni-in khua vak loin mial bikbek ding hi.
19 Tua in humpinelkai kihta-in a tai leh
vompi a tuak tawh kibang bek dinga,
a inn sungah luta
kawm ah a khut nga leh
gul in a tuk tawh kibang bek ding hi.
20 TOPA ni-in khua vak loin khua kimialsak ding -
mial bikbekin khuavak-zang khat zong om lo ding hi lo ahi hiam?
21 "Na biakna pawite uh mudahin ka simmawh hi;
na kikhopnate uh ka cimtak hi.
22 Meihal biakna le an-a biakna nong puak uh zongin
tuate kong sang kei ding hi.
Kilawmtakna biakna ab tuam nong puak uh hangin
tuate ka thusim kei ding hi.
23 La sa-in gamlum nawn kei dih un!
Na harp gingte uh ka ngai kei ding hi.
24 Ahi hangin gun bangin thutang luangluangin
thumaan ahileh a kang ngei lo luitui bangsak un!
25 Israel innkuante aw, sehnel-gam ah kum sawmli na om sungun
biakpiakna le biakna hong pia na hi uh hiam?
26 Nomau bawltawm - na kumpipa uh biakbukno,
na milimte tunna uh le
na pasian bc uh aksite
na thupisak uh hi.
27 Tua ahi manin note Damascus khengin salin kong puak ding hi,"
ama min TOPA Thahatpen Pasian in a ci hi.