7
1 Israel ka damsak peuhpeuh cianginEphraim mawhnate pholak in
Samaria tatkhialhnate ki laak ding hi.
Amaute in zuauphuak uh a,
gutate in inn sung luhin,
misuamte in lampi-ah a sut uh hi.
2 Ahi hangin amaute in a mau gamtat sia khempeuh ka ciamteh lam
a phawk kei uh hi;
a mawhnate un amaute valhcip a,
ka mai ah a om den uh hi.
3 "Amaute in a gitlohna uh tawh a kumpipa uh lungkimsak uh a,
a zuau thu uh tawh uliante a nuamsak uh hi.
4 Amaute angkawm vive hi uh a,
annel lom a pawm masiah
a empa in a mei mutkuang
a kullo meikhuk sunga om tawh kibang uh hi.
5 I Kumpipa pawi bawl ni-in,
kumpipa tapate in zu uang kham mahmah uh a,
mi selnohte tawh a kilen uh hi.
6 Amaute lungtang meikhuk tawh kibang a;
amaute in amah gitlohsawmsimna tawh a naih uh hi.
Amaute ukluatna in zan tawntung in kanga,
zingsang ciangin mei kuanglai bangin a kuang hi.
7 Amaute khempeuh meikhuk bangin sa uh a;
amaute in a uliante uh a valhtum uh hi.
A kumpite khempeuh uh puk napi
amaute khat beek in kei hong sam lo uh hi.
8 "Minamte tawh Ephraim kigawma;
Ephraim pen a kilumlet lo mohpheng ahi hi.
9 Gamdangte in amah thanemsak uh a,
ahi hangin amah in tua a phawk kei hi.
Ama sam lakkan napi amah in
a phawk kei hi.
10 Israel kisaktheihna in ama langah teci pang hi;
tua hi napi,
TOPA ama Pasian lamah kihei loin
amah a zong tuan kei hi.
11 Ephraim kawlvakhu tawh kibanga,
khemnop mahmah in ngaihsutna mel nei lo a -
tu-in Egypt samsam in,
tu-in Assyria lamah kihei hi.
12 Amaute a pai uh ciangin ka len ka khuh ding hi;
huih laka vasate bangin amaute ka kaikhiasuk ding hi.
Amaute a ciakkhawm uh ka zak ciangin
amaute ka man ding hi.
13 Ka kiang panin amaute lampial uh ahi manin
gimna thuak ta uh hen!
Amaute in kei hong lehdo uh ahi manin
amaute tungah siatna tung ta hen!
Amaute ka tatkhiat nop hangin
kei langkhatah zuauthu a phuak uh hi.
14 Amaute a lungsimun kei tungah hong kiko lo uh a,
amau lupna tungah a tau uh hi.
Amaute an le zuthak adingin a kikaihkhop aa uh hangin
kei kiang pan a kiheikhia uh hi.
15 Amaute kisinsakin ka thakhauhsak a,
ahi hangin kei langkhat ah a hoih lo sep a sawm uh hi.
16 Sangpen Pa lamah amaute kihei lo uh a,
thalpeu neemsa a bang uh hi.
Amaute thusimlohna kammalte hangin
a makaite uh namsau-in a puk uh hi.
Hih thu hangin Egypt gamah
amaute mi nuihsatin a om ding uh hi.