Daniel in Tuutal le Keeltal Mangin Mu
8
1 Kumpipa Belshazzar kumpi a suah zawh a kum thumna kumin keimah Daniel in kei tunga hong kilaksa banah mang khat ka muh beh lai hi. 2 Ka mangmuhna ah Elam gamkhen sung Susa khuapi ah ka om hi; ka mangmuhna ah Ulai hawkguam gei-ah ka om hi. 3 Ka ettoh leh ka mai-ah ki nih a nei tuutal khat tua hawkguam gei-ah na dinga a kite a sau hi. A ki khat a khat pen sangin po hakzaw napi a sauzaw hi. 4 Tua tuutal ka et gige leh nitumna lam, leilu-lam le leitaw-lam a si kawikawi hi. Amah a zo zo ganhing om lo a, ama vangliatna panin kuamah in a hukhia zo kei hi. Ama lungkim bangin gamta-a, a lian mahmah hi.5 Hih thu ka ngaihsutsut laitakin thakhatin a mitte gel kikal a kilang ki khat a nei keeltal khat leitung buppi kantanin nitumna-lam pan leitung sikkha lo liangin hong tai veva hi. 6 Amah hawkguam gei-a ding ki nih a nei tuutal lam manawhin pai-a nakpi-in a si hi. 7 Tuu bawhgawp a, sii-in a kite gel a siktansak ka mu hi. Tuutal in a nan zawh nadingin hatna a nei kei hi; keel in lei lakah sipai a, tuancilgawp in tuutal a hukhia zo kuamah a om kei hi. 8 Keeltal lian mahmah hi, ahi hangin a hatpen hun laitakin a ki lianpi kitan a, a ki pona munah a kilang ki li, van huih lite lamah a khangto hi.
9 Tuate laka khat tungah ki dawng khat mengsawn a, a men tungin neu napi leitaw-lam, nisuahna-lam le Gam Melhoih lamah a vanglian hi. 10 Tua ki vantungte galkap honte a bat dongin khang a, aksi galkap honte pawlkhat leitungah khiasuk a, a tuancilgawp hi. 11 Amah le amah mihonte Kumpipa zaha lianin kikoih hi; nisima ama biakpiaknate beisakin a munsiangtho zong a niamkhiat hi. 12 Tua lehdona hangin misiangtho honpite aa le nisim biakpiakna tua ki tungah kipia hi. A hihna peuhpeuh ah lawhcing-a leitungah thumaan a kilawnsuk hi.
13 Tua ciangin a siangthopa khat kiko ka za a, a siangthopa khat mah in kei kiangah, "Hih mangmuhna - nisim biak piakna, a hawmmangsak lehdona, munsiangtho le mihonte a kituatcilna mangmuhnate a tangtun ding hun bang tanvei sawt lai ding hiam?" hong ci hi.
14 Amah in kei kiangah, "Zingsang, nitak 2,300 sawt ding hi; tua ciangin munsiangtho a kisiansuah kik ding hi," hong ci hi.
Mangmuhna a Khiatna
15 Keimah Daniel in mangmuhna a khiatna theih ding hanciamin ka et gega laitakin ka mai ah mi tawh a kibang khat hong ding hi. 16 Tua ciangin Ulai panin mihing aw khat ka za a, "Gabriel aw, hih mipa tungah mangmuhna a khiatna gen in," a ci hi.
17 Ka dinna geiah amah hong pai-a laulua in ka khup bawhsuk hi. Amah in kei kiangah, "Mihing tapa aw, na mangmuhna hun tawpna tawh kisai ahilam thei in," hong ci hi.
18 Amah in kei hong hopihpih laitakin khupbawksa in ka ihsip hi. Tua ciangin hong lawnga ka khe-in hong dingsak hi.
19 Hih mangmuhna pen beina hun kiciangtanna bb tawh kisai ahi manin mailama thangpaihna hun ciangin bang piang ding hiam, cih kong gen ding hi. 20 Ki nih a nei tuutal khat na muh pen Media le Persia kumpite ahi hi. 21 Keel mulphapi pen Greece kumpipa hi-a, a mitte gel kikala ki golpi in kumpi masapen ahi hi. 22 Ki khat a kitan khit cianga tua muna po ki lite, a minam zui-in kumpi-gam li piang ding cihna hi a, ahi zongin a vangliatna uh a kikim kei ding hi.
23 Amaute kumpi a suah zawh uh a nunung lamah lehdote a gitloh luat mahmah uh ciangin kumpi khauh mahmah, zuauphuah siam mahmah khat khang ding hi. 24 Amah hat mahmah dinga, ahi hangin ama hatna ahi kei ding hi. A dipkuathuai piangsakin a hihna peuhpeuh a zo ding hi. Amah in mi thahatte le misiangte a susia ding hi. 25 Amah in zuauthu khangsak dinga amah le amah a kiliansak ding hi. Amaute a lung muan uh ciangin amah in tampi that dinga uliante Ukpa langah pang ding hi. Amah a tua cih hangin mihing thahatna kizang loin a kisusia ding hi.
26 Na mangmuhna-a nang hong kimusak zingsang le nitakte a maan ahi hi, ahi hangin mailam hun sawtpi cianga tung pan ding ahi manin imcip phot in," hong ci hi.
27 Keimah Daniel, ka tha bei lua a, ni tampi sung ka ci a na hi. Tua ciangin ka tho a ka kumpi nasep sem dingin ka kuan hi. Ka mangmuhna in hong lauthawngsak lua-a theihtel zawh hi lo hi.