Israel Uliante ading Tamlawhna
19
1 "Israel uliante taamlawh inla:2 "Na nu uh humpinelkaite lakah
humpinelkai pi a bang hi!
Humpinelkai khanglaite lakah lumin
a note khansuah hi.
3 A note khat pantah a
humpinelkai thahat khat a suak hi.
A samatte balzan zia sinin
mihing a ne hi.
4 Minamte in a thu za uh a,
a gum-uah awksak uh hi.
Amaute in sikkawi-in kai uh a,
Egypt gam tunpih uh hi.
5 "‘Tuanu a lametna tangtung loin
a sawmna a tun loh ciangin
a no dangkhat pantah leuleu a,
humpinelkai thahat khat a suah hi.
6 Amah humpinelkai thahat hita ahi manin
humpinelkaite lakah a vaksuk a vakto hi.
A samatte balzanzia sinin
mihing a ne hi.
7 Amah in a kulh muanhuaite uh balkhamin aa
a khuapite uh a sumaimang hi.
Amah hawk a,
gamsunga tengte khempeuh a lausak hi.
8 Tua ciangin a kimkot panin
amah do dingin minamte kuan uh hi.
A lenthang uh zaak uh a,
amaute’ gum sungah awksak uh hi.
9 Amah sikkawi-in kai uh a, a bawm sungah khumin
Babylon kumpipa kiangah puak uh hi.
Amaute in thong sungah khum uh ahi manin
Israel mualte tungah
a hawk a kiza nawn kei hi.
10 "‘Na nu uh na lenggui lo bb sungua
tui gei-a kisuan lenggui tawh kibang hi.
Tui kicingtakin ngah ahi manin
a hiang pha mahmah a, gah mahmah hi.
11 A hiangte khauh a
gam-ukpa ciangkhut dingin a hoih hi.
A hiang tam mahmahin
a teh pha mahmah a,
a tunglamin khanga
a sanna kilawm mahmah hi.
12 Ahi hangin hehna tawh kizungbawh a,
leilak kidenna hi.
Nisuahna huih in nuaigawp a,
agah a zutkhiamang hi;
ahiang khauh teng keugaw-a,
mei in a kangtum hi.
13 Tu-in lei keuna, tui omlohna mun
sehnel gamah kisuan hi.
14 A hiang paipite cc khat panin mei kuanga,
agah kangtum hi.
Gam-ukte ciangkhut dinga hoih
a hiang khauh a om nawn kei hi, ci in,’
Hih in tamlawhna khat hi-a, tamlawhna-a kizang ding khat ahi hi," hong ci hi.