A Beina Tungta
7
1 TOPA thu kei tungah hong tunga, 2 "Mihing tapa aw, hih in Israel gam tawh kisai-a Thupipen TOPA thugen ahi hi: Bei ta! Tua gam kiulite bei ta. 3 Nang tungah beina hong tung hi. Ka hehna nang kong thuaksak ding hi. Na gamtatna zui-in thu kong khen dinga, a kihhuai na hihsate khempeuh kong thuaksak ding hi. 4 Hong hehpihin kong zah tuan kei ding hi. Note lakah a kihhuai-a na hihsate uh tawh kizui-in kong thuk taktak ding hi. Tua ciangin note in keimah TOPA ka hilam na thei ding uh hi.5 "Hih in Thupipen TOPA gen ahi hi: Siatna! A kiza ngei nai lo siatna ba hong tung ding hi. 6 A beina hi ta! Note tungah ama thu hong tung ahi hi. Hong tung ta! 7 Gam sunga teng mite aw - note tungah siatna hong tung ta hi. A ni hong nai a, a hun tung ta hi; mualtungah lungnopna om loin patauhna a om hi. 8 Ka thangpaihna no tungah hong sungin ka hehna ka zang ding hi. Na gamtatsa uh tawh kizui-in thu kong khen dinga a kihhuai na gamtatsa khempeuh uh tawh kizui-in kong thuaksak ding hi. 9 Hehpihna tawh hong en loin kong hawi kei dinga; na gamtatna uh le a kihhuai na gamtatnasate uh tawh kizui-in kong thuk kik ding hi. Tua ciangin note in tua banga hong thuaksak keimah TOPA ka hilam na thei ding uh hi.
10 "A ni hong tung ta! Hong tung zo hi! Siatna palhkhia a, khetbuk pakin kisaktheihna palh ta hi! 11 Ngongtatna sungah cb kheltatnate dan piakna cianggolh suak hi; mihonte khat beek - hauhna peuhmah, kimanna a nei peuhmah, mite a kinusiat kei ding hi. 12 A hun hi ta a, a ni tung ta hi. Mipi buppi tungah thangpaihna tung ahi manin a leite nuam loin a zuakte zong dah tuan kei hen. 13 A zuakpa in a leinapa tawh a nuntak sungun a zuaksa leitang a ngah kik nawn kei ding hi, ahang in, mihon buppi tawh kisai-a mangmuhna pen tangtung loin a om kei ding hi. Amaute mawhna hangin khat beek a kihinkhawi kei ding hi. 14 Amaute in kiging kholsa in pengkul mut ta le uh mihon buppi tungah ka thangpaihna tung khin ahi manin galkap dingin kuamah a kuan kei ding hi.
15 "A pua ah namsau, a sungah pulpi le kialpi; gam sunga omte namsau in si ding uh a, khuapi sunga omte kialpi le pulpi in a nawmvalh ding hi. 16 A suakta a omlai sunte khempeuh amau mawhna hangin mual kawmah om ding uh a, mual kuama kawlvakhute bangin a thum ciat ding uh hi. 17 Khut khempeuh kha dakdak dinga khuk khempeuh tui bangin nem ding hi. 18 Amaute puanhampi silhin launa-in a kituam ding uh hi. A sam uh kimettolsak dinga, maizum mahmah ding uh hi. 19 A ngunte uh lam lak ah pai ding uh a, a khamte uh nin a suak ding hi. A ngunte uh le a khamte un TOPA thangpaih ni-in amaute a hon thei kei ding hi. Tuate in amaute mawhna-ah kimuktusak ahi manin amaute gilkialna phasak loin a gil uh a vahsak kei hi. 20 Amaute in a kizepnate uh melhoihna kisaktheihpih uh a, a kihhuai milimte le milim zepna-in a bawl uh hi. Tua ahi ciangin amau adingin tuate a siang lo na ka suaksak ding hi. 21 Gamdang mite khutah tuate galvanlakin ka pia dinga, migilote sutsakin amaute in tuate a siang lo a suaksak ding uh hi. 22 Amaute ka lehngatsan dinga, amaute in ka goukholna mun ninsakin, a sungah buluhte lutin a ninsak ding uh hi.
23 "Gamsung teng sisan kiluansakna dima, khuapi sung ngongtatna dim ahi manin sik khainiang bawlkhol un. 24 Keimah in a gilo pen minamte hong kuansakin amaute inn ka sutsak ding hi. A thahatte uh kiphatsakna ka beisak dinga, a munsiangthote uh a kibuahsak ding hi. 25 Launa a tun ciangin kilemna a zon uh hangin bangmah a om kei ding hi. 26 Tuahsiatna khat khit khat tung dinga, kam lengsawn khat khit khat a tung ding hi. Amaute in kamsangte panin mangmuhna ngah ding hanciam ding uh hi; siampite in thukham a hilhzia ding uh thei loin, upate in thu kidongte a dawng thei kei ding uh hi. 27 Kumpipa thum dinga kumpi uliante in lungdonna puanin silh ding uh a, gam sunga mite khut a ling ding hi. Amaute sepsa tawh kituakin ka thuaksak dinga amau hihna zahzahin amaute tungah thu ka khen ding hi. Tua ciangin amaute in keimah TOPA ka hilam hong thei ding uh hi," hong ci hi.