<<    <     Isaiah     61     >    >> 
TOPA Angvan Kum
61
1 Mizawngte tungah lungdamna thu hilh dingin
TOPA in kei sathau hong nilh khin ahi manin
Thupipen TOPA’ Kha kei tungah a om hi.
Amah in lungsim kitamte khui kik ding,
sal-a kimante suahtak nading le
thong a kiate aa khahkhiat nading tangko ding,
2 TOPA angvan kum le
eite Pasian phulak ni tangko-a,
a thumte khempeuh hehnemin,
3  Zion-a om a dahte huhin -
amau lutungah vut tangin
kumpi lukhu a khusak ding,
thumna tangin nuamna sathau,
le lungkiatna kha tangin
phatna puan a pia dingin
kei hong sawl zo hi.
ama thupina a kilat nadingin
amaute, TOPA suansa
thumaanna tehno kungte, kici ding hi.
4  Amaute in tanglai-a kisiasate bawlpha in,
a maimangsate a ding kiksak ding uh hi;
amaute in khuapi kisiate puah kikin,
khang tampi a maimangsa khuapite a puahpha ding uh hi.
5  Pemtate in na tuuhonte uh cing ding uh a;
gamdang mite in na lo uh le na lenggui lote uh a kho ding uh hi.
6  Tuateh note, TOPA’ siampite hong kici dinga,
Pasian’ nasemte ci-in hong kilo ding hi.
Minamte neihsa-in na kivak ding uh a,
amaute hauhna na kisaktheihpih ding uh hi.
7  Ka mite in amau maizumna tangin
a zahnih tang ding uh a,
amaute mindaina tangin
amau luahna nuam a sa ding uh hi;
tua ciangin amau gamah a zah nih luah ding uh a,
tawntung nopsakna amau aa hi ta ding hi.
8  Ahang in, keimah TOPA in thutang ka it a;
mite neihsa suhna le khialhna ka mudah hi.
Ka muanhuaina hangin amaute pahtakman ka pia dinga,
amaute tawh tawntung thukhun ka bawl ding hi.
9  Minamte lakah amaute suan le khakte kitangtheih dinga,
amau suante mite lakah a kitang theih ding hi.
Amaute a mu peuhmah in
TOPA thupha piaksa minam ahilam a tel ding uh hi," a ci hi.
10 TOPA sungah nuam ka sa mahmah a,
ka Pasian sungah ka kha a kipak hi.
Ahang in, zi neipa in siampipa bangin a lu a zep bang le,
suangmanpha-in monu a kizep bangin
amah in hotkhiatna puante kei hong silhsak khin a,
thumaanna puantualpi-in kei hong zem khin hi.
11  Ahang in, lei hoih in mengkhiasakin,
huan in khaici a posak bangin
Thupipen TOPA in minam khempeuh mai-ah
thumaanna le phatna a phulkhiasak ding hi.